Inabala ko ang aking sarili sa trabaho pagkabalik na pagkabalik ng Maynila. Kayod kalabaw na naman ako at kabi-kabila ang raket dahil malapit na ang enrollment ng mga kapatid ko.
At syempre, kasama na doon si Totoy. Kailangan ko nang makapagpadala ng pera pang matrikula at pambili ng gamit sa eskwela sa susunod na linggo. Medyo gipit kasi ngayon dahil iyong ipon ko ay nagamit pampalibing ni Tiyo Berting.
"Inday, sama ka sa amin mamaya ni April magpapa footspa at facial kami. Magrelax naman tayo," magiliw na anyaya ni Dory.
"Pass muna ako Dory, malapit na ang enrollment. Gastos lang iyan." Ngumuso siya at sinimangutan ako. Si April naman ay nakahalumbaba habang tinitignan akong ilagay ang aking sapatos sa locker.
"Sige na, Inday sama ka na. Namiss ka namin. Dalawang linggo ka nawala,
