"Here's your gift from Ate." Padabog na nilapag ni Yula ang red velvet paper bag sa table ko.
Napangisi ako sabay angat ng tingin sa kaniya at nahuli ko siyang umirap bago nagligpit ng gamit.
"Meron din ako?" Excited akong tumili. "Ang bait ng ate mo, hindi ko pa siya nakikita pero may pasalubong agad ako. Hindi ko inaasahan."
"Pasalamat ka kinwento kita, kako pamangkin ni Edcharl Elvis," aniya.
Natutuwa kong sinilip ang laman at napaawang ang labi nang makita ang pamilyar na box ng perfume.
"Oh, perfume nga! Pakisabi sa ate mo salamat!" Niyugyog ko pa ang balikat niya. "Sana makita ko siya—sa birthday ko pala! Next week na yun!"
"Ano ba, Evergreen!" Nakanguso niya akong tinulak nang yugyugin ko siya sa balikat. "She's just on vacation, babalik din siya agad sa Japan after a week."
