ISANG LINGGO na ang nakalipas mula nang makumpirma ni Bea na nagdadalang-tao siya ngunit hindi pa rin niya malaman kung paano sasabihin kay Ryan ang tungkol doon. Maraming beses niyang inabot ang telepono at akmang tatawagan ang binata ngunit naduduwag siya sa huling sandali. Alam niya na hindi niya iyon maipagpapaliban habang-buhay, humahanap lang siya ng magandang tiyempo. At nag-iipon ng lakas ng loob.
Wala pa rin siyang pinagsasabihang iba maliban kay Andres. Nais niyang huwag munang ipaalam sa kanyang itinuturing na pamilya bago niya masabi ang kondisyon kay Ryan. Nais niyang ang ama ng kanyang dinadala muna ang makaalam.
Hindi madali ang pagtatago dahil hindi maiwasang hindi siya pumasok sa kusina at mas naging sensitibo ang kanyang pang-amoy. Hindi siya makapagluto dahil madalas s
