2 months later . . .
Sumandal si Diego sa railing, nakatingin kay Nadja na tumitingin sa malawak na karagatan mula sa ikalawang palapag ng kubo. “Alam mo sis, ako ang nahihirapan sa ’yo. Mas mahaba pa ang leeg mo kaysa sa giraffe. Pero parang wala ka lang, ‘no?”
“Eh, sabi ni Londyn, papunta na raw sila ni Craig dito sa isla. Hindi ko nga alam na nandito na pala sila sa Pilipinas,” sagot ni Nadja.
“Pagkatapos ng panloloko niya sa ’yo ay nakuha mo pang bigyan ng simpatya?”
“Humingi na sila ng tawad sa ‘kin. Silang dalawa ng asawa niyang si Craig. At napag-usapan na namin iyon nang mag-usap kami sa telepono.”
Nagiging mapait ang lasa ng iniinom na mango shake ni Diego. Umingos ito. “Hay naku, diyan talaga ko bilib sa ’yo. Nakukuha mo pang magpatawad sa mga taong ginawan ka ng masama.”
