Ilang gabi nang umuuwi ng lasing si Dominic. At iyon ang kinababahala ni Gianna. Maayos naman sila kinaumagahan nang gabing umuwi rin ito ng lasing dahil sa naging maliit na hindi pagkakaintindihan. Alam niyang on-leave ito kaya naman nagtataka siya kung saan ito nagpupunta. Hindi rin naman kasi niya nakakagisnan ito sa umaga dahil maaga raw itong umaalis.
Naramdaman na lang niyang may yumakap sa kanya. Hindi na niya kailangan lingunin ito upang mapagsino ito. She knew every bit of him. Gabi-gabi naman ay ganito ang eksena nila mula nang umuuwi ito ng ganoon. Yayakapin siya nito nang mahigpit at bago pa niya maibuka ang bibig para magsalita ay nakatulog na ito.
Nang maramdaman niyang nakatulog na ito ay humarap siya rito. Tumulo ang luha niya nang makita sa mukha nito ang kamisirablehan.
