***
Buwisit na buwisit pa rin si Janice pagkauwi niya nang dahil sa hambog na iyon. Ano bang akala nito sa kaniya? Oportunista? At sino ba ang lalaking iyon para hangarin niyang mag-propose sa kaniya?
Kahit sa panaginip, hindi niya hahangarin iyon!?
Pagkapasok ni Janice sa loob ng bahay nila, medyo napawi naman ng halik ni Sasha ang pagkainis niya. Sumalubong din sa pang-amoy niya ang kung ano mang iniluluto ng papa niya.
"Oh, anak, nandito ka na pala?" wika ng ama na saglit napalingon. Naroon ito sa kusina, sa harap mismo ng stove at may kung anong hinahalo.
"Opo, Papa," tugon niyang ibinaba sa sopa ang dala niyang bag.
"Sige, magbihis ka na lang muna. Mukhang mayamaya pa kasi itong inilalaga ko, eh," pahayag nitong ngumiti s
