Dominic’s pov
HINDI na siya tumuloy pa sa bahay ni Madizon kung saan nito dinala si Mari dahil dinala niya na muna si Aling Rosa at Mang Bien sa funeral parlor. Gusto niyang bigyan ng maayos na burol ang mga ito. Wala man lang siyang nagawa para protektahan ang mga ito. Kalunos-lunos ang sinapit ng mga ito sa mismong araw ng kanyang kasal. Maging ang kanyang asawang si Mari ay hindi niya rin naprotektahan. Muntikan na rin itong nawala sa kanya.
Hindi niya mapigilan ang pagtulo ng kanyang luha habang nagmamaneho. Pauwi na siya sa bahay ni Madizon. Tinawagan siya nito upang sabihin ang address nito. Pagdating niya sa bahay ni Madi ay may mga pulis na nakabantay sa labas ng bahay nito. Nagmamadaling bumaba siya ng kanyang sasakyan at pumasok ng bahay. Gusto niyang makita ang kanyang asawa.
