Anna's pov
HINDI mapigilang hindi bumuhos ang luha ni Anna nang makita niya ang kanyang anak na si Lara. Alam niyang hindi siya nakilala ng kanyang biyenan nang hulihin ito ni Joaquin. Isa pa ay hindi naman siya nagpakita rito. Hinintay niyang kunin ng mga pulis ang ina ni Marcus bago siya lumapit sa kanyang anak na si Lara. Sinadya talaga ni Joaquin na maiwan siya kay Lara. Hindi rin nasaksihan ni Lara ang paghuli ng mga pulis sa Lola nito dahil pinapasok ito ni Joaquin sa silid nito.
Isang taon niya rin itong hindi nakasama at sobrang nangungulila na siya sa anak.
"Lara?" tawag niya sa pangalan ng kanyang anak pagkatapos niyang buksan ang silid nito. Hindi niya akalain na ang anak na kanyang ipinagluksa ay buhay na buhay. Sobrang saya ng kanyang puso at muli niya itong makakasama.
