Ang handaan ay ginanap din sa garden restaurant kung saan naganap ang pag-iisang dibdib ng mga bagong kasal. Inupahan nila ang buong lugar para sa araw na iyon.
"Kuya Bal," pukaw ni Sabel. "Ligtas ba tayo rito? Wala bang makakasingit na espiya?"
"Huwag kang mag-alala," sagot nito. "Ang buong pakigid ay nababalutan ng mahiwagang hamog. Isa sa kakayahan ng mga engkanto at diwata, ang angkan na pinagmulan namin ni Ina. Ligtas tayong magsaya ngayon."
"Mabuti naman kung ganoon, Kuya." Nakahinga nang maluwag si Sabel. "Ito rin ba ang nilagay mo sa mansyon?"
Tumango si Bal. "Mayroon at mayroong makakahalata na may nakatirang ibang nilalang sa mansyon kaya't kailangang gawan ng ganitong uri ng mahika para maitago namin ang aming pagkatao. Para din makagamit kami ng maliliit na mahika na hindi
