“Inutil!” Mabagsik ang boses ni Señor Silvio, galit na galit ito. Sa sobrang galit ay nagsisilitawan na ang mga ugat nito sa sentido at leeg. “Ano ang inaatupag ninyong dalawa ng fiancée mo at nagkanda-letse letse ang kompanya natin? Bakit nabibilad tayo ngayon sa eskandalo?” Halos lumundag palabas ang mga mata nito sa matinding pandidilat.
Nakaluhod si Sev sa harapan ng kanyang ama, sa gitna ng malawak na sala ng malaking bahay. Nakayuko siya. Hindi niya ito magawang tingnan sa mata.
“Sumagot ka!” sigaw ng señor nang wala itong makuhang sagot mula sa kanya.
Nanatiling tikom ang mga labi niya. Dahil ano ang itutugon niya rito? Hindi niya rin alam kung paano naging tulay na gumuho ang akala niya’y tuwid na daan patungo sa rurok. Ginawa niya naman ang lahat ng makakaya niya. Hindi siya
