Ilang sandali pang nakatitig si Sheila sa susi at maliit na card na nakapatong sa kanyang lamesita. Hindi niya alam kung matutuwa ba siya o maiinis kay Matilda. Wala na kasi itong ibang sinabi sa kanya bago ito makaalis. Hinabol niya pa ito at pilit na tinanong kung ano ang ibig nitong sabihin ngunit hindi na ito sumagot. Sumakay na ito kaagad sa van na sinakyan nito. Ngayon ay nasa loob na siya muli ng kanyang bahay at pilit na prinoproseso ang mga sinabi nito.
Pumunta si Matilda sa bahay niya para sabihan siyang pumuntang Maynila upang kausapin si Anton. E ilang araw na silang hiwalay nito! Nalilito siya dahil noong huli nilang pagkakausap ay galit na galit pa ito sa kanya dahil nga ipinagpatuloy pa rin niya ang pakikipagrelasyon kay Anton. Kahit na nalaman niya na ex ito ng kanyang ana
