ANG MAG-ALAY ng misa para sa mga kaluluwa ang unang ginawa ni Lara nang umagang iyon ng linggo. Nag-attend siya ng first mass. Mabagal ang mga hakbang niya pabalik sa kotse ni Miguel. Lampas dalawang linggo na mula nang ilibing si Miguel pero walang nagbago. Hindi pa rin naiibsan ang sakit, sobrang bigat pa rin ng dibdib niya.
Mag-isa na naman siya ngayon. Ang lupit lang ng mundo sa kanya. Lahat ng mahal ni Lara sa buhay, lagi siyang iniiwan. May umalpas na naman na luha sa pisngi niya.
Naalala ni Lara ang nangyari kanina. Nagpahabol siya ng isang pangalan para sa misa sa mga kaluluwa.
“Pakidagdag ho ito sa mga pangalan,” si Lara sa babaeng nakausap, inabot niya ang note. Ang mga pangalang nauna na niyang ibinigay kanina ay ang pamilya niya, ang mga kaibigan at si Mi
