NAPAKURAP-kurap si Moira nang ipitik ni Perrie ang mga daliri nito sa may mukha niya. Nasa Nekka’s sila at hinihintay na dumating ang sundo ng kaibigan.
“Kanina ka pa walang kibo d’yan, ano ba’ng iniisip mo?” tanong ni Perrie.
“Wala,” tipid niyang sagot at ibinaba ang tingin sa librong nakabuklat sa harapan niya, nagkunwari siyang nagbabasa. Agad ring umangat ang tingin niya nang biglang hilahin ni Perrie ang libro.
“`Yong totoo? Ilang araw ko nang napapansin na palaging malalim ang iniisip mo, eh.”
Ilang sandali rin siyang nakatingin lang sa babae, maya-maya ay napabuga siya ng hangin. “Iniisip ko kasi kung itutuloy ko pa `yong plano ko na ipakilala siya kina Daddy.”
Buo na sana noon ang loob niya na ipakilala si Slater sa mga magulang, pero kapag naaalala niya ang mga sinabi ng Da
