Louise
TARANTA akong bumangon nang hindi ko makita si Jacob dito sa kama.
“Ayos na kaya siya?” bulong ko bago lumabas ng kuwarto. Pagpasok ko sa kusina ay naabutan ko siyang nagluluto.
Aba’y talaga namang matigas ang bungo ng isang ’to. Parang hindi inapoy ng lagnat kagabi, ah. Gusto yatang mabinat at magkasakit na naman?
Pinagkrus ko ang aking mga kamay sa tapat ng aking dibdib at saka humilig sa hamba ng pintuan bago tumikhim nang malakas para kunin ang kaniyang atensiyon. Mukhang nagulat ko yata siya kaya bahagya akong natawa. Napapitlag siya at kamuntikan pang mabitiwan ang hawak niyang sandok.
Lumingon siya sa gawi ko. Nang makita ako’y napangiti siya nang malawak. Iyong klase ng ngiti na nakahahawa dahil sa sobrang tamis. Pinatay niya ang kalan. Naghugas ng kamay, saka iyon p
