MALAMIG ang hangin na pumapasok mula sa bintana. Hindi iyon nakasara dahilan para magtuloy-tuloy ang pasok ng pang-umagang hangin. Bahagya pa nitong isinasayaw-sayaw ang kurtinang nakatabing roon. Naroon pa rin ang tasa ng kapeng inilapag ni Jacob kagabi. May mga langgam na nga roon na nakalinya’t pinagpipiyestahan ang kape.
Tila hinihila pa ako ng hangin para matulog muli, ngunit ramdam ko rin ang mainit na hangin na bumubuga sa likod ng aking tenga kaya hindi ko na magawang ipikit ang aking mga mata. Napatingin ako sa aking bewang dahil may tila mabigat na bagay ang nakapulupot dito.
Nawala tuloy ang antok ko at nanlaki ang aking mga mata nang makita ang isang mabalbon at malaking kamay na nakayakap sa aking bewang. Kamuntikan na akong mapatili kung hindi ko lang agad naalala na katab
