Darating dito ang mga Guererro sa susunod na linggo," wika ng Daddy Dash nila habang nasa hapagkainan sila sa mansyon sa Hacienda Luna.
"May okasyon ho ba, Dad?" tanong ni Alejandro sa ama.
"Wala naman, simpleng dinner lang. Makikipagkwentuhan, mangungumusta... Bennett just came back from Hawaii. Alam mo naman ang batang 'yon, magiliw sa amin ng Mommy mo."
Hindi alam ni Denisse kung bakit sa kanya nakatutok ang tingin ng Daddy at Mommy niya. Kaibigan niya naman si Bennett na matanda sa kanya ng dalawang taon. Pero nang mag-aral ito sa Hawaii at nakitira sa tiyahin nito doon, nawalan na sila ng komunikasyon.
"Kumusta na nga ba si Bennett? Gumaling ba ang paa nun? Ang huli kong nabalitaan ay ang pagkakahulog niya sa kabayo nasipa pa ang hita kaya't dinala sa ospital, hindi ba?"
