SANDINO
MARIIN akong nakatitig sa nabasag na basong hindi ko sinasadyang natabig habang nakapatong sa gilid ng lamesa. At sa mga oras na iyon ay bigla na lamang kumabog ang aking dibdib sa hindi ko maintindihang dahilan.
"Boss," mahinang tawag sa akin ni Dolfo, "Okay lang po ba kayo?" tanong nito. Nag-angat ako ng tingin dito at bahagyang tumango. Mababakas pa sa itsura nito tila pagtataka.
Nasa isang malaki at kilalang restaurant kami ngayon dito sa Hong Kong. Kahapon lang kami dumating dito, at biglaan din lang ang pagpunta ko rito dahil sa nakuhang impormasyon ni Dolfo tungkol sa taong natitirang kasosyo ni Grace Roco na si Menchie Punzalan.
Walang ibang nakakaalam tungkol sa negosyong ito ni Grace Roco. At ang restaurant na ito, na kasalukuyan kong kinaroroonan ang dahilan kaya't n
