PALIHIM na nakadalo si Lorrene sa libing ng ina. Nakatago siya sa likod ng punong-kahoy habang pinagmamasdan ang mga dumalo sa ʼdi kalayuan. Natanaw niya si Froilan na umiiyak sa tabi ni Bianca. Kumulo bigla ang kaniyang dugo at gusto sanang lumapit sa dalawa para ipasok sa libingan. Ngunit kailangan niyang magtimpi dahil ayaw niyang masira ang mga plano laban sa dalawa.
Lumipas ang oras at paisa-isang nagsialisan ang mga tao. Nang masigurong wala nang ibang makakakita sa kaniya ay nagmamadali siyang lumapit sa puntod ng kaniyang nanay. Napahagulgol siya ng iyak habang marahang hinahaplos ang libingan ni Nanay Divine.
“Nanay. . .ʼnay, patawarin niyo po ako kung hindi kita natulungan, ha? Sana pinigilan na lang kita na puntahan si Froilan, eh. Hindi mo man lang nakita ang apo niyo,” mada
