Chapter 17
"Uuwi"
Pagkatapos pagkaguluhan ng mga kasama at masagot ang mga tanong nila, pinakawalan na nila ako. Gaya noong nakaraan hindi ko na ikinuwento ang ibang detalye lalo na sa parteng tinanong ko si Illias. Hindi ko pa nga lubos maisip na sinabi nga niya na may gusto siya sa akin. Napaka-imposible talaga. Pero hindi ang kagaya ni Illias ang magbibiro ng ganun. He is always kind and honest. Sa maikling panahong pagkakakilala ko sa kanya sigurado akong mabait nga siya. Kaya nakakaramdam ako ng hiya at guilt. Ngunit mas mali kung paasahin ko siya.
Ang dami kong iniisip dumagdag pa ang pagiging malamig ni Sir Raikko. Bago lamunin ng antok, iniisip ko pa kung ano kaya ang tumatakbo sa isipan niya. Hindi ko talaga siya maintindihan pero mas hindi ko na yata maintindihan ang sarili ko
