NATUTULIRONG nagparoo’t parito si Lavender sa bahay nila. Hindi niya mapaniwalaan ang sitwasyong kinasuungan niya. Kanina ay ang ganda-ganda ng gising niya. Excited siya sa unang araw niya sa Love Clinic. Lumabas siya ng bahay para mag-jogging.
Pag-uwi niya ay may karga na siyang bata. Umiiyak pa rin ito pero pahina na nang pahina. Nakasukbit sa magkabilang balikat niya ang dalawang bag nito.
Hindi niya malaman kung paano napunta sa kanya ang responsibilidad sa bata. Ang sabi ng mga guwardiya, may dumating na taxi sa clinic na lulan ang batang babaeng karga niya. Ayon sa driver ay sa bus station daw sumakay ang babae na may kasamang bata. Ipinakita raw ng babae sa driver ang isang papel na may pangalan at address ni Pablo Vicente Munis. Alam ng driver na hindi basta-basta ang mga nakati
