PAGKATAPOS ng hapunan, hayun at nasa labas ang tatlong lalaki at nag-inuman. Silang mag-iina ay nasa bintana, tinatanaw ang tatlo.
"Lalasingin ng dalawang 'yan si Zeph," komento ng Nanay niya. Napahagod naman sa buhok si Ate Ara.
"Nay, hindi 'yan naglalasing," nag-aalalang sabi ni Ate Ara. "Pigilan n'yo si Tatay."
"'Yaan mo na," sabi ng ina. "Ngayon lang naman 'yan."
Pinili ni Daisy na hindi na umimik. Ang cell phone ang inilabas niya. Kung ang Ate niya ay si Kuya Zeph ang inaalala, siya ay si Edgar na uuwi pa sa kabilang barangay.
Nag-text siya sa lalaki.
Uuwi ka pa, Kuya Ed.
Mula sa kinaroroonan nila ay nakita niya ang pagsipat nito sa cell phone. Ang inaasahan ni Daisy ay babasahin lang nito ang text message. Hindi naman talaga siya naghihintay ng reply. Gusto lang niyang ipaalal
