"LIBRENG burger!" Narinig ni Daisy ang masiglang boses ni Ate Ara. Nasa sala silang lahat nang sandaling iyon, abala sa pinapanood sa telebisyon. Dahil tutok ang atensiyon sa pinapanood, lalo na ang tatay nila na paborito ang programang may kinalaman sa imbestigasyon at pagsugpo sa krimen, walang pumansin sa bagong dating na kapatid. Maging si Edgar na bisita na naman nila, hindi rin nilingon si Ate Ara.
"Wala man lang natuwa sa uwi kong burger? Wala man lang babati sa akin na may bago na akong trabaho?" narinig ni Daisy na sabi ng kapatid sa nag-eemote na tono. "Ano ba 'yang pinapanood n'yo? Balita? Eh, masama naman lagi ang mga balita. Kaliwa't-kanang aksidente at krimen, bibigat lang ang dibdib n'yo." Paglingon niya ay nauna nang kumain ng burger ang kanyang Ate. Napangiti si Daisy. Ha
