DALAWANG ATV ang inarkila ni Dominic at tig-isa sila na naglibot sa ibang bahagi ng isla. Wala naman silang pagmamadali. Humihinto sila sa kung saan na may makatawag ng atensyon nila. Walang katapusan na kuhanan ng litrato. Kuha sa cellphone niya at kuha din sa cellphone nito. Nang abutan sila ng gutom para sa tanghalian, kung saan lang may natanaw silang makakainan ay doon na din sila kumain.
Pang-anim na araw na nila sa Boracay. Nasubukan na nilang mag-banana boat, may-flying fish at mag-helmet diving. Nag-jet ski din sila. Siyempre pa ay angkas lang siya nito. Hindi niya magawang mag-adventure na magkahiwalay sila. Kaya kahit na inaaya siya nitong mag-wind surfing sila ay hindi siya napahinuhod nito. Kailangan ng skill para doon at wala siya noon. Hindi pa rin ganoon kalakas ang loob n
