Simula
SIMULA
Jasmine Del Castillo’s Pov
BUMANGON ako sa kama na may ngiti sa labi. Walang pasok ngayong araw dahil Sabado. Late na akong natulog kagabi kaya late na rin ako nagising. Tumayo na agad ako bago pa ako maunahan ni mama at mahuli na ngayon pa lang ako bumangon.
Inayos ko na muna ang higaan saka ako nag-inat ng katawan. Nang matapos akong mag-ayos ng higaan ko ay naisipan kong lumabas ng kwarto ko. Bumungad sa akin ang katahimikan, mukhang lumabas yata ang mama ko.
Naisipan ko na lang na pumunta sa kusina ngunit biglang bumukas ang pintuan ng main door namin at nakita kong may buhat-buhat si mama. “Saan ka po galing, mama?” tanong ko sa kanya at mabilis na lumapit sa kanya.
“Galing ako sa palengke, anak.” tugon niya habang tinutulungan ko siyang buhatin ang dala niya.
“Ang bibigat naman po ng dala mo, mama. Dapat ginising mo nalang po pala ako ng maaga para masamahan po kitang mamalengke,” wika ko habang hirap na hirap akong buhatin ang basket na dala niya.
“Naku, wala kang pasok kaya hinayaan na kitang matulog muna,” sagot niya habang nagpupunas ng pawis niya sa noo.
“Sabi ko naman po sa’yo, mama eh.. maghanap ka na po ng lalaking makakasama sa buhay mo para may katuwang ka. Ayos lang naman po sa akin kung mag-asawa po kayo eh. Magiging masaya pa po ako dahil magkakaroon ako ng ama.” pagpupursige ko sa mama ko dahil ‘yun talaga ang pangarap ko sa kanya.
“May magkakagusto pa ba sa akin? Tignan mo nga itsura ko.. nabulok na ang ganda,” sabi niya kaya nanlaki ang mata ko.
“Aba, sino pong may sabi na nabulok ang ganda mo, mama? Kakaltukan ko sila. Konting ayos lang po ng buhok at pananamit ay babalik na po ang ganda mo. Kaya makakahanap ka pa po ng bagong lalaki na magmamahal po sa’yo,” wika ko habang nakangiti kay mama.
Single mom si Mama at siya lang ang nagpalaki sa akin. Iniwan kami ng tatay ko para magpaka-ama sa anak ng ibang babae. Hindi naman sila kasal ng tatay ko kaya pwedeng pwede siyang maghanap ng ibang minamahal. 18 years old na ako kaya kayang-kaya ko na ang sarili ko kung sakali man na mag-asawa si mama.
Bata pa naman ang mama ko, nasa 38 years old pa lang naman siya. Para sa akin ay may pag-asa pa. May nanliligaw naman sa mama ko pero kapag nalalaman nila na may anak si mama ay nag ba-backout sila. Kaya hanggang ngayon ay walang karelasyon si mama. Mas pinili niyang alagaan na lang ako at mag live selling para kumita ng pera.
Hindi naman sumagot si mama. May pangiti ngiti pa siya kaya pinaningkitan ko siya ng mata ko. “Naku! Ang mama ko.. nakangiti ahh.. may pumasok yata sa isipan.” panunukso ko. Iba kasi ang ngiti niya.
“Eh kasi.. may nakilala akong lalaki, anak. Last month ko pa siya nakilala pero nahihiya lang kasi akong magkwento sa’yo kaya hindi ko na muna sinabi.” saad ni mama kaya nakuha niya ang atensyon ko.
“Talaga po? Gwapo po ba, mama? Mabait din po ba? Naku, dapat una mo pong sabihin na may anak ka po, mama. Para naman hindi masayang ang oras mo sa pakikipagkilala sa kanya,” wika ko sa seryosong boses.
“Sinabi ko naman sa kanya, anak. Ayos lang sa kanya. 40 years old na siya at isa siyang businessman.” masiglang sabi ni mama.
“Paano mo naman siya nakilala, mama?” tanong ko.
“Dahil sa asawa ng tita Nilda mo. Hindi ba nagpaalam ako sa’yo nong nakaraang buwan na may pupuntahan kami ng tita mo. Doon ko nakilala ang isang mayamang negosyante na si Sir Sebastian. Nilapitan niya ako nong araw na ‘yun kaya pinakilala ako ng tito mo,” pagkukwento niya sa akin.
“Kung ganun.. nanliligaw na po siya sa’yo, mama?” tanong ko sa kanya.
“Oo, anak eh. Okay lang ba talaga sa’yo na may magkaroon ako ng karelasyon?” tanong niya saka niya hinaplos ang batok niya. “Bumili din kasi ako ng mga damit ko kanina para naman hindi ako mukhang kawawa kapag nagdate kami ni sir Sebastian.” sabi niya sa nahihiyang boses.
“Tama lang po ‘yan, mama. Bumili ka lang po ng damit mo at mag-ayos ka po. May mga makeup po ako dyan sa kwarto ko, pwede mo pong hiramin, mama.” nakangiti kong sabi. Nakakatuwa naman kasing malaman na may nakilala si mama na lalaking tanggap na may anak siya. Sana ito na ang hinihintay ko na magkaroon ako ng ama.
Lumipas ang mga buwan ay napapansin ko ang pagbabago ni mama. Talagang gumaganda siya lalo. Lagi din siyang nakikipag date. Ako naman ay supportado ang ginagawa niya. Hanggang sa ipakilala na niya sa akin ang boyfriend niya.
Pupunta daw dito sa bahay ang boyfriend niya. Excited ako na makilala ang lalaking nagpapatibok ng puso ng mama ko.
Naghanda ng pagkain si mama. Tinulungan ko naman siya para mas mabilis.
Pinagmamasdan ko ang mukha ng mama ko at nakikitang masaya siya. Talagang nahanap na niya ang lalaking para sa kanya.
“Mama..” tawag ko sa kanya.
“Ano ‘yun, anak?” tanong niya.
“Masaya po ako para sa’yo. Sana ito na po talaga ang lalaking magmamahal sa’yo. Mukhang seryoso na po kasi talaga dahil pupunta na po dito at ipapakilala mo na po sa akin,” sabi ko habang nakangiti.
“Oo nga, anak eh. Ngayon lang talaga ako nakaramdam ng saya dahil kay Sebastian. Pakiramdam ko ay gusto na niya akong pakasalan,” sabi ni mama.
Sasagot pa sana ako ngunit hindi natuloy dahil may sasakyan na huminto sa tapat ng bahay namin. “Nandito na siya, anak..” sabi ni mama saka siya nagmadaling naglakad papunta sa sala. Sasalubungin yata niya ang boyfriend niya.
Inayos ko na lamang ang sarili ko para hindi naman nakakahiya sa boyfriend ni mama.
Ilang sandali pa ay pumasok si mama, kasama niya ang isang matangkad na lalaki. Makisig ito at napakaseryoso ng mukha. Hindi ko akalain na makakabingwit si mama ng isang gwapong lalaki. Akala ko ay modelo ang kasama ni mama.
“Ahm.. anak, si Sebastian Alcantara nga pala, boyfriend ko.” sabi ni mama habang nakangiti.
Ngumiti ako sa lalaki na nakatitig sa akin. “Si Jasmine nga pala.. anak ko. Siya ‘yung sinasabi ko sa’yo na nag-iisa kong anak. 18 years old na siya at talagang kinukulit niya ako na maghanap ng boyfriend,” sabi ni mama kaya agad akong lumapit sa kanila.
“Hello po, sir! Masaya po akong makilala ka,” magalang kong sabi. Nakipagkamay sa akin ang boyfriend ni mama ngunit hindi siya ngumiti. Siguro ay ganun talaga siya, seryoso talaga siyang tao.
“Nakahanda na nga pala ang pagkain. Kain na tayo!” sabi ni mama sa boyfriend niya. Tumango naman ito kaya agad silang naglakad papunta sa kusina.
Sumunod naman ako upang makilala ang boyfriend ni mama. Napakaswerte ni mama dahil isang businessman pa talaga ang nahanap niya. Siguro ito ang dahilan kaya hindi nakahanap ng jowa si mama dati dahil may isang lalaki pala talaga ang nakalaan para sa kanya.
Kumain kami at tinatanong ko ang boyfriend ni mama kung anong negosyo niya. Nalaman ko na hotel and restaurant pala ang mga pagmamay-ari niya.
Gusto ko sanang tanungin kung may balak ba siyang pakasalan ang mama ko soon pero nahiya ako. Baka masyado akong nagmamadali na itanong sa kanya.
Hahayaan ko na munang magkaroon ng panahon na magkasama sila. Papasan ba’y magkakaroon din ako ng ama. Ikakatuwa ko talaga kung siya man ang magiging asawa ni mama. Hindi na ako makapaghintay na dumating ang araw na sasabihin ng mama ko na pwede ko ng tawaging papa ang boyfriend niya.
