"Bakit hanggang ngayon wala kang maibalita kung nasaan si Georgia, Art?! Lumipas na naman ang isang linggo!"
Hindi niya mapigilan ang mataas na boses dahil sa init ng ulo niya. Hindi siya lumalabas sa opisina niya isang linggo na ang lumipas. Kumpleto naman siya roon ng pagkain at komportable siyang matulog sa sofa. Pero ang higit na ipinag-aalala niya ay ang biglang pagkawala ni Georgia matapos ang gabing ibinunyag ni Lolita sa harap ng maraming reporter ang nangyari sa kanila sa isla.
Kahit ang telepono sa opisina ay hindi rin gustong patahimikin si Carmel. Lahat ng reporter ay gusto siyang makapanayam. Nagdulot ng malaking eskandalo ang isiniwalat ni Lolita. At gusto man niyang sakalin ang dating asawa sa ngayon dahil sa matinding galit ay hindi niya puwedeng gawin. Mamamatay d
