Chapter 6
Habang hila ni Sam ang kamay ko ay hindi ko mapigilan na ilibot ang mata ko sa buong lugar.
Mataas nga ang second floor ng bahay nila at halos malula ako sa lawak ng sa ibaba. Maraming tao ang kumakain, may mga estudyante, may iba namang dumayo pa. Busy rin ang lahat sa pagbibigay ng mga order ng mga kostumer.
Ang galing! Sa ibaba ay isang malaking karinderya at ang sa taas naman ay ang tuluyan ng mga trabahante rito.
“Welcome to LUZVIMINDA KARINDERYA, Ate!” masayang bati ni Sam.
May iilan na napatingin sa pwesto namin, may iilan namang walang pakialam at tuloy pa rin sa mga tawanan. Ngumiti ako sa kanya at marahang kinurot ang malambot niyang pisngi.
Natawa na lang ako sa pagnguso niya. Hinila niya na ako papunta kay Nanay na busy sa kahera dahil sa sunod-sunod na order.
