Masakit ang ulo nang imulat niya ang mga mata. Naramdaman niya ang panginginig ng mga kalamnan mula sa nabasang damit dulot ng ulan kanina. Dinagdagan pa iyon ng pagdampi ng malamig na hangin sa kanyang balat. Inilibot niya ang paningin sa paligid. Tila nasa loob siya ng isang may kalakihan at may modernong style na kubo. Kumpleto ang mga gamit na nasa loob ng tila bakasyunan na bahay na iyon. May maliit na kusina ito at may kakapalang kutson na tulugan na nakalatag lang sa sahig. Bukas din ang malaking pintuan noon na mismong ilang hakbang lang ang pagitan mula sa kanyang harapan. Ang nagtatakip lang doon ay ang tila see thru na puting kurtina na maaaninag ang dilim ng paligid mula sa labas. Rinig niya ang malakas na tunog ng mga alon. Palagay niya ay malapit lang siya sa dalampasigan.
