Gusto niyang kalimutan. Gusto niyang takasan ang lahat. Ngunit kahit anong pilit niyang balewalain, ang bangungot ng nakaraan ay kusang bumabalik at walang tigil na humahabol sa kanya. Hindi na niya matukoy kung kabilang pa ba siya sa mga taong simpleng nabubuhay, o isa nang nilalang na kinatatakutan ng sanlibutan. Nawawala na siya sa kanyang sarili, at paulit-ulit ang tanong sa kanyang isipan: Mayroon pa ba siyang lugar sa mundong ito kung saan maaari siyang magpahinga nang payapa? Siya si Ichen—isang magandang dalagang tila pinagkaitan ng magandang kinabukasan. Dahil sa mabigat na kasalanang ginawa ng kanyang ama, siya ang naging biktima ng isang madilim na sumpa. Unti-unti siyang magbabago, unti-unting mawawala ang kanyang pagkatao, kahit wala siyang kinalaman sa krimen ng kanyang magulang. Walang nakakaalam kung saan nanggaling ang sumpa, o kung ano pa ang nakatago sa likod nito. Ang parusang dapat sana ay magpahamak sa kanya, ay magiging susi upang mabunyag ang isang lihim na matagal nang ibinaon ng panahon—isang katotohanang magbabago sa lahat ng kanyang alam tungkol sa kanyang sarili. Darating ang isang lalaking magmamahal sa kanya nang tapat, ngunit siya rin ang magiging tulay upang malantad ang katotohanang itinago ng kapalaran sa loob ng mahabang panahon. Sa pagitan ng kanyang dating pagkatao at ng nilalang na unti-unting lumalabas, mananatili pa kaya ang pag-asa? Mamahalin pa kaya siya kahit anong anyo ang kanyang kinahihinatnan?