DAMIA CASSANDRA

TUSUN - 1 * * * * * * * * MILAN, ITALY Happy birthday to you Happy birthday to you Happy birthday Damia Cassandra Happy birthday to you Abis aja lagu happy birthday to you nya, dipeda siku indu nyepu dian dua puluh tiga batang nandaka umur iya udah manggai 23 taun. Chukup pemajik indu nya tau disemaka baka Kumang nurun ari Panggau Libau. Paras tubuh pan naka pemanah baka raras gitar lumur lapan. Baka nya mega kulit iya chukup lis sereta burak nyau tampak bebendang maya dipanchar mata panas enggau terang bulan. Ahaks.., sapa indu nya? Aku mih nya. Naka nya aja aku ngelagu diri, enggaika kumbai kita udu nanggung bakul diri empu lagi. Aram kitai dulu bekelala sebedau aku nusika kita jauh agi pasal pengidup aku udah tu. Nama aku Damia Cassandra Sebastian. Aku anak tunggal sereta anak patu balu pengudah apai enggau indai aku lesi bebadi ba jalai alun maya umur aku 6 taun suba. Bepun ari nya mih aku diibun aki aku ke benama Ronald Arthur. Taja pan aku anak patu balu, aku nadai kala ngasaika kurang pengasih enggau penyayau laban kelalu diasika aki. Chukup kur aki ngibun aku ari mit, nyentukka sekula pan aku ba rumah aja. Aki ngupah pengajar ngajar aku di rumah. Aku enda nyalah baka burung ti dikurung dalam sangkar emas, laban nadai kala pansut ari genturung rumah. Laban ti udah teleba enda pansut ari rumah, aku nadai kiruh pasal semua nya. Aku enda nyalahka aki laban aku nemu iya ngaga semua nya ketegal deka nyaga pengelikun aku. Aki madahka ba dunya luar, kelalu mayuh orang jai ti deka ngemediska aku laban tikas pangkat aki ukai anchi-anchi. Aki aku mangku pengawa Kepala Menteri Besai menua Italy ditu. Maya umur aku manggai 20 taun, aku ditemu ngembuan penyakit jantung belubang. Chukup tusah ati aki maya nya. Ambis menua alai iya ngiga enti bisi orang deka nyali jantung ngagai aku. Nasit aku manah agi disangkung Petara dia dih bisi orang nyali jantung iya ngagai aku, ngujungka aku ulih idup nyentukka diatu. Taun tu mih keterubah iya hari pengada aku diintu penuh pengerami. Enti taun-taun ke udah, hari pengada aku semina diintu kami duai aki enggau bala ama, bala tukang sumai, bala pengajar peribit aku, bala kaban semak aki enggau bala tukang kebun aja. Anang nanyaka bala ibu, bala aya sereta bala petunggal, laban nadai. Niang apai aku aja mih anak aki enggau niang ini. Baka nya mega niang indai aku, anak patu balu enda ditemu asal penatai laban iya dibuai orang ari ada ba mua pagar Rumah Anak Patu Balu St. Andrews. Baka ni seduai iya betemu? Niang apai enggau niang indai betemu ba kedai kopi nalan niang indai aku gawa. Ari nya mih seduai iya ngepunka pengerindu enggau pangan diri. Aku nemu kisah seduai iya sepengudah macha bup ti ditulis niang indai besehari-hari, sebedau lelang midang pulai ke Batang Mandai. * * * * * * * * * * "Uchu? Lapa nuan tegenung baka empelekung mabuk ambuh dih? Lama aki nganti nuan nyapi kek nya," pia ku sapa aki ti ngasuh semua pansa kenang aku tekebu tekala nya. "Sorry aki," pia ku aku nyaut lalu berumban mutung kek. Udah nya baru aku nyapi kek ngagai aki. "Selamat hari pengada ngagai nuan uchu, ngarapka panjai umur lalu belaki taun tu." "Aki! Apin aku deka belaki. Agi biak amat aku tu. Aku enggai jauh ari nuan aki. Anang ngasuh aku belaki tumu." "Aki makin tuai tu uchu. Nya alai sebedau aki nutup mata pulai ke Dunya Sepiak, aki deka meda pengidup nuan meruan bisi orang nyaga." "Aki.., anang munyi nya. Aku besampi ngarapka nuan panjai umur. Nadai orang alai aku bepanggai kelimpah ari nuan aki." Sinu. Aku belabuh sinu. Bendar aku merap aki enggau sesabak. Amat baka apung balu mih aku anyut ke ulu, anyut ke ili nadai penyadi nyema ditinggalka aki ngenyit. Owh, enggai aku mikirka semua nya. Disemaka sepapung daun ruku mih abis diinsap sepengelama aki ngaum aku, baru ati aku lantang mimit sereta ngetu nyabak. Udah nya, baru kami duai aki bejalai ngelawa mija bala temuai ti bisi datai. "Hello Mr. President Ronald Arthur!" Bekuing kami duai aki seretai ninga bisi sura ti nyapa ari belakang. Peda aku panjai tuchum aki malik ngagai orang nya. Serambau aki orang nya dipelabaka aku. "Hello kaban aku Lukas, anang bekangau ngena gela nya ulih kah? Diatu ukai maya aku gawa," ku aki nimbal sambil seduai iya betabi jari sebedau merap pangan diri. "Akiii!!" Sama nguing tunga ke kiba kami tiga laban ti bisi ninga sura orang nyapa. Peda aku siku lelaki penyigat umbas iya, semina kuyu nyentukka dagu tak penuh dibalut ragum belanda-landa ngelawa kami. Nyau seseput aja iya empa pemendar belanda tadi. Enda nemu nama kebuah, jantung aku tak ngenyit bedegup laju pengudah meda lelaki nya datai semak. DUP! DAP! DUP! DAP! DUP! DAP! Munyi nya mih jantung aku gawa bepangkung dalam din. Berasai tapa jari aku begetar maya ngama dada. "Minta ampun aku laun datai ketegal tepekul ba jalai alun," pia ku lelaki nya bejaku sambil nyintak seput. "Kumbai aku enda nitih mih nuan tadi uchu," pia ku aki tuai ti benama Lukas nyaut lelaki nya. "Owh, uchu iya lelaki mayas tu. Sayau mua sigat abis dilalaika ngena ragum. Kada enda bekurai sereta bekerak dulang mua iya, nya alai iya ngelamun ngena ragum ngemendar nya." pia ku aku betelai dalam ati taja pan jantung agi bedegup laju. "Michael? Nuan tu Michael? Kini nuan ngelama tu, bendar amat betapuk?" Tekenyit aku meda aki begauk amat enggau lelaki nya. Pia ke bejaku, pia ke merap. "Enda keji aki meda ragum iya nya pia?" Majak aku betelai ati diri sambil ngemataka aja ari tisi. "Au. Aku mih tu Mr. President," ku lelaki ti madahka nama diri Michael nya nyaut. "Michael, tu uchu aku. Damia Cassandra nama iya. Semina Damia tu aja mih uchu asi, emperaja mata, seput nyawa aku ba dunya tu." Lelaki ke benama Michael nya pan malik ngagai aku. Kami duai sama nadai bejaku, semina beperening mata aja. Makin lama, makin balat degup jantung aku ngujungka aku ngeremuk dada. Enda berasai aku tejelepi laban nyau lembut tulang. "Mia uchu, lapa nuan? Dini pedis?" Nyau beserak aja tanya aki, dibai kesal meda aku tejelepi sambil bekeremuk dada. Bala temuai ke bisi datai tadi pan nyau begau ngesah kami dia. "Ppeeeddiisss..," mit aja sura nyawa aku nyaut aki. Ninga aku nyaut munyi nya, aki lalu ngasuh Michael ngatung aku ngagai pangking. Maya Michael ngatung aku pulai ke pangking, ati aku tak nyelai amai. Bau rengut minyak wangi ti dikena Michael nya ngasuh aku rindang. Asaika kala nyium bau rengut nya, tang dini? "I like your smell my King," antara sedar enggau enda aku nyebut jaku mapap nya. Udah nya dunya dipeda aku bebali petang tegayam, ngujungka aku nadai nemu utai agi. * * * * * * * ~MICHAEL POV~ "Malam tu bisi makai besai ba rumah Mr. President, ngintu hari pengada uchu iya. Nuan ka enggau aku?" Mansa pending aku pia aja jaku aki ti ngemai aku ngagai rumah Mr. President Ronald Arthur. Maya tu aku benung meri mayau ti pemadu dikesayau aku makai. Mayau indu. Alice nama ti diberi aku ngagai iya. Alit ga ati aku ninga aki madahka Mr. President bisi uchu, laban sekumbang aku udah ngelala iya, nadai kala ninga sereta meda uchu iya ngelama tu. "Bisi uchu iya pia aki? Nadai kala meda aku uchu iya nya. Lelaki ke indu?" ku aku nanya aki ti tetegi ngemataka aku engkani Alice. "Bisi aa.., indu. Nuan ga enda kala nanya. Baka ni deka nemu," pia ku aki nyaut sebedau niki ke pangking iya. "Hmmm.., nama penemu nuan Alice? Kin ke enda aku lagi?" Meowwwww.. Meowwwww.. Aku merambu mayau aku Alice ti engkiau nya setuju mih nyema aku kin malam tu. Udah tembu meri Alice makai enggau mandi, aku pan pansut deka meli tepa ke uchu Mr. President. Jugau endar ga enda ingat nanya aki berapa umur uchu Mr. President nya tadi. Datai ba 'shopping mall', nyau kekalat aja aku ngiga tepa. Kepemuas iya, aku pan tama ba siti kedai jam. Beli aku jam ungkup orang indu jenama Chartier. Pulai ari meli tepa nya jam sigi udah manggai pukul 7.30 lemai. Benung pulai ke penepan bala manuk maya nya disemaka jaku. Laban ke berumban, aku semina mandi kerebau aja. Kapa aku ka mandi peiga-iga, nama udah dipanchitka minyak wangi nyadi mih nya bau rengut. Maya aku ngachitka minyak wangi, bisi ga anak ati berunding deka nyukur ragum. Udah dipegai aku pisau chukur ragum, tang dilekaka aku baru lebuh meda jam nyau majak lanjur. "Shitt!!" Enda berasai aku ngemansutka leka jaku nya sambil mandam 'steering' kerita diruntu ati gerinsa laban tepekul ba jalai alun. Tak naka ga menua Italy tu nadai nemu tinduk bala mensia. Siang malam jalai penuh belama enggau kerita. Urung pukul 9.00 malam baru aku datai ba genturung rumah Mr. President. Nyau jauh aku nyangkaika kerita laban udah penuh magang endur ke semak. Aku bedarat ari penyangkai kerita ngelawa pelaman rumah Mr. President sambil mata gegining ngiga aki. Kepuas ti geginau, baru aku tepedaka aki benung berandau enggau Mr. President. "Tentu indu nya mih uchu iya," pia ku aku bejaku nengali pengudah meda indu siku bediri sambil lengan iya nyengkilung ba lengan Mr. President. Aku pan ngangauka aki sambil belanda-landa ngelawa sida iya. Nyau sengah asai seput laban nanjak bukit. Datai aja semak sida iya, aku dulu minta ampun ketegal laun datai. Nya mih Mr. President nyau merap aku laban lelengau lama udah enda betemu. Suba aku tu mih nyadi pengiring iya bejalai kin kia, sebedau aku muka Kompeni 'bodyguard' kediri empu. Nyau enda ingat aku deka madahka susur galur penatai diri ngagai kita. Nama aku Michael Ricky Johnson. Aku anak tunggal aja laban pengudah ngadaka aku, indai pan lelang midang ketegal mayuh begetah. Maya umur aku 10 taun, apai aku ga layu sulai kena penyakit riman telu pelir. Bepun ari nya aku pan diibun aki ti gawa nyadi sedadu. Maya aki gawa nyadi sedadu, iya betemu enggau Mr. President lalu seduai iya bebakih sampai ke diatu. Nya alai sebedau aku muka Kompeni 'bodyguard' kediri empu suba, aku dulu gawa nyadi pengiring Mr. President. **Naka nya dulu lansa kenang pasal aku. Kitai pulai baru ngagai maya tu.* "Michael, tu uchu aku Damia Cassandra nama iya. Semina Damia tu aja mih uchu asi, emperaja mata, seput nyawa aku ba dunya tu." Aku malik ngagai uchu Mr. President ti benama Damia Cassandra nya. Lama kami duai beperening mata sama enda bejaku enggau pangan diri. DUP! DAP! DUP! DAP! Keketap aja munyi jantung aku. Taja pan baru bepeda udah ngasuh ati aku dup dap asaika labuh ari tangga bilun. Enti dikira, bisi ngelima minit pia mih kami duai Damia betentang mata, peda aku iya tak ngeremuk dada baka ke ngembuan pemedis lalu tejelepi tekala nya. Nyau begau bala mensia ke bisi datai ngagai pengerami hari pengada iya. Semuti ke didinga sura nyawa Damia madahka diri pedis lebuh ditanya aki iya Mr. President. Udah nya, aku pan diasuh Mr. President ngatung Damia ngelawa pangking iya. "I like your smell my King," pia ku Damia bejaku enggau mata pejam. Udah nya iya dipelabaka aku luput ari gaya mua iya ti bebali puchat, lalu jari iya nyau melilai aja. Datai ba pangking iya, begadai aku ngengkah ke tubuh iya atas katil. Baka orang lungau aku semina nyerenih aja iya ari punjung pala nyentukka tapa kaki. Semimit pan aku enda engkebut sereta bekinsit ari duduk nunga iya, taja pan bala lutur enggau Mr. President nyau betekasak sebelah nya ngidupka Damia ti benung luput. 'My King' Betandu-tandu kangau 'My King' ti baru udah disebut Damia nya tadi bemain ba lubang pending aku. Gela nya. Lama amat aku udah enda ninga orang ngangauka aku ngena gela nya. Ni enda nyau tegepang aku tadi. Semina siku aja ti selalu ngangauka aku munyi nya suba. Damia Cassandra.., nuan indu penuh enggau tanda tanya. Taja pan tu keterubah iya aku betemu enggau nuan, tang tua asaika bisi kaul sebedau tu. ~BETAMPUNG ~ ~~~~~~~~~~~~~~~~~~~~~~~~~~