DAMIA CASSANDRA

DAMIA CASSANDRA TUSUN -2

TUSUN-2

* * * * * * *

~MICHAEL POV ~

"Berth sayau, nama berita nuan diatu? Baka ni pendiau seduai nuan baby ba Dunya Sepiak din? Lantang?" ku aku bejaku kediri sambil nunga pendam niang tunang aku Alizabeth.

Baka selama ninting tiga bulan sekali aku datai ngundang pendam niang Alizabeth Jaspora sambil ngemai segupung bungai rose bechura burak. Iya indu ti semampai dikenang aku taja pan udah lelang midang tiga taun lalu. Niang Alizabeth parai kena lantak kerita maya iya ngelayang jalai sehari sebedau kami duai jadi.

**TIKAL PULAI NGAGAI HARI NIANG ALIZABETH KENA LANTAK KERITA..

Sehari tu kami duai Alizabeth ngambi baju kawin ngagai kedai ti alai kami duai nempah baju kawin. Chukup pengaga ati kami duai begulai laban enda sabar deka jadi melaki bini pagila. Nyadi kami duai Alizabeth tu bepangan kenyau ari belajar ba University Oxford London ngujungka lalu betunang. Empat taun betunang kami duai pan mutus ati deka jadi melaki bini laban Alizabeth ke nyau udah ribat sebulan lebih. Sigi baka iya, seperis bansa ke laju. Kami duai Alizabeth nadai betagang begulai bayam pangan diri, dulu mungkal merimba tanah temuda sebedau ngentakka langkau alai ngenduh.

"King.., aku tetenguk deka makai sekelin ti dijual orang nyin." Alizabeth madahka sera nyawa iya sambil nunjukka ngagai seberai jalai. Maya tu kami duai baru pansut ari kedai endur ngambi baju kawin. Ya. King nya mih gela ti diberi iya ngagai aku, lalu aku ngela iya Queen.

"Queen nganti ditu au? aku meli ke nuan pengudah nganjung baju tua ngagai kerita," pia ku aku nyaut iya. Enda aku nyagi iya ngelayang jalai kediri.

Kami duai pan bepegai jari bejalai ngelawa nalan penyangkai kerita enda jauh ari kedai nya. Laban ti kiruh nyimpan baju dalam kerita, aku enda sedar kemaya Alizabeth mupuk kediri bejalai enda bepadah. Sekali tak..

PRRAKKK! BEDEBUMMMM!!

Dinga aku munyi utai bedegum naka penginggar. Maya aku nguing tunga ngagai munyi bedegum nya, tegepang sereta tepengkering aku meda tubuh Alizabeth ke nyau ngelambung dilantak kerita sebedau labuh terempas atas jalai alun. Bisi sepuluh sikin pia mih aku tebelenga enggau mata pepeli, udah nya baru aku sedar pemgudah ninga bala mayuh nyau chapuh ngesah.

"Berth!!! My Queen!!!"

Aku belanda sambil manjung ngangauka Alizabeth. Maya aku datai ba endur iya ke tegali atas jalai alun, peda aku tak nyau engkeching aja darah pansut ari belakang pala iya.

"My King, i love you..," nya aja sempat disebut Alizabeth lalu nya mih kepenudi aku ninga sura nyawa iya.

Nama mih penyadi. Ku jaku pagila kami duai kawin, tang nyau betukar nyadi hari ngintu pemati Alizabeth. Lama diri aku enda ulih nerima pemegi iya. Aku nyau disemaka baka bangkai idup. Semua jaku ajar aki nadai mansa lalu ba pending aku. Lelak diri aki bejaku baka orang ti nyiuhka ai atas daun keladi. Siang malam aku betapuk dalam pangking, nyentukka aku nyauka munuh diri da. Tang nasit Petara agi nyangkung seput aku. Maya aku baru deka mapaka sebutul ubat tinduk, aki tama ngabas aku ke pangking.

Sehari nya mega aki lalu ngangauka kaban iya ti gawa nyadi lutur pakar meri jaku lalau enggau peransang dalam pengidup. Dalam kandang setaun aku betemu enggau lutur nya, baru emosyen aku baik agi.

**PULAI BARU NGAGAI MAYA TU**

KRINGGG! KRINGGG! KRINGGG!

Telefon binching ti bemunyi dalam kambut tanchut ngebuka lansa kenang aku pasal niang Alizabeth. Peda aku nama Mr. President ti ngaga kangau talipun nya.

"Hello Mr. President," ku aku dulu nyapa pengudah ngenyakka saut kangau.

"Hello Michael, nuan bisi awak puang diatu? Ulih datai ke rumah aku kitu?" ku saut Mr. President.

"Nadai pengawa aku diatu Mr. President. Au mih, nganti enda lama aku datai kia."

"Okay. Terima kasih."

"Sama-sama."

Pengudah nutup kangau talipun, aku pan bejalai ngelawa kerita. Ari pendam nya aku terus deriba nuju rumah Mr. President.

* * * * * *

Datai ba pelaman rumah Mr. President, aku pan dikelaluka ama iya tama. Sekumbang ke bejalai ngelawa opis Mr. President, mata aku nyau geginau enggau penuh pengarap bisi meda uchu iya Damia Cassandra. Enda nemu nama kebuah ati aku tak mapap nemu lelengauka iya.

Tama aja dalam opis Mr. President, ati aku pan belabuh keketap meda bisi Damia dia. Amat menawa ati tu. Tadi ngiga senaya iya, diatu tak keketap ga pengudah meda iya ba mua mata.

"Duduk Michael," ku Mr. President ngelaluka aku.

"Bisi kebuah aku ngasuh nuan datai kitu," Mr. President nampung jaku iya baru. Aku enda engkeretik semina nyeling belalai ngagai Damia ti duduk ngimbai iya.

"Nama nya Mr. President?" ku aku nyau kepemuas ti enda bemunyi.

"Aku minta tulung nuan tu Michael."

"Tulung? Tulung nama?"

"Jadi enggau uchu aku Damia."

"What?! Aki! Nadai aku nemu jadi enggau iya ti penuh bebulu nya, nyau baka jelu mayas."

"Ragum nya uchu, ragum. Ukai bulu."

Tekenyit aku ninga jaku renjan Damia nya. Jelu mayas ku iya nganu aku? Empai nemu penyigat Michael tu nuan Damia, ila nganti aku udah nyukur ragum bisi ari nuan nyingkang enda betangga nitihka aku. Aku tu mih King. Diberi orang indu ensumbar bujang sigat mali lebu, diperening tau ngasuh mata juling, ditegu ngasuh ati sesengit mai betemu.

"Aku setuju," ku aku nadai nganti lama sereta berunding panjai lalu nyanggup.

"Good. Pagila bai aki nuan kitu. Kitai berunding nimpuh hari alai seduai jadi," ku Mr. President.

"No! Aku enda setuju. Aki!!" ku Damia nyakal penemu aki iya.

"Damia.., tu atur aki ke nuan. Anang mantah uchu, terima mih Michael dalam pengidup nuan."

"Enggai! Aku bedau deka belaki."

"Damia.."

"Okay fine!"

Pengudah munyi nya, Damia pan bejalai kekendit pansut sambil nyabak. Nyau bedegum aja munyi pintu empa pemalat ditikupka iya.

"Minta ampun pasal ulah Damia nya. Ati iya keru sereta siru taja pan dipeda baka ke mangah. Iya sigi udu meraya laban teleba diasika aku. Ngarapka nuan Michael ulih magi pengerindu enggau penyayau ngagai iya. Damia nya mih reta ti pemadu berega dalam pengidup aku di dunya tu."

"Aku danji Mr. President, enda nempayaka Damia sengapa."

"Terima kasih Michael, aku ngarap endar nuan ngamatka jaku nuan nya. Lantang asai seput nyema aku lelang midang pagila lusa. Aku nadai penangi agi laban Damia enda tinggal sebatang kara di dunya tu. Bisi kebuah aku minta nuan jadi enggau Damia diatu. Enggai ke nuan enda nemu, Damia suba kala beputung laban iya sakit jantung belubang. Kelimpah ari nya, nuan pan nemu ketegal pangkat aku diatu, mayuh orang enggai meda aku. Nya alai aku minta tulung nuan nyaga pengelikun iya. "

**BA AWAK TI SAMA, DAMIA POV**

Ari luar pintu opis aki aku ulih ninga semua jaku iya. Nya baru aku nemu nama kebuah aki ngaga pemutus ngenyit baka tu. Ati aku ti ensiban tadi lalu bebali chelap lindap. Taja pan aku bedau besedia deka belaki diatu, tang aku sanggup neruska aja nitihka peminta aki.

"Aki, aku minta ampun udah ngelaban nuan tadi. Eeeeeeeii..," enggau sesabak aku belanda tama baru ke dalam opis aki. Tubuh aki lalu diberap sambil nyium kening iya.

"Syhh, anang nyabak agi uchu. Jaga pengerai jantung nuan nya. Kati baka diatu dih? Nuan Setuju jadi enggau Michael?"

Aku enda nyaut aki, semina nagunka pala aja nandaka aku setuju. Panjai tuchum aki laban gaga ati aku ulih nerima peminta iya.

Urung pukul 12.00 tengah hari, kami duai Michael seretai pansut ari opis aki laban deka neku ke lengan dulu. Nyadi aki nitih dudi laban benung nyaut kangau talipun. Baru datai ba tengan tangga, enda memukai kaki aku salah singkang mimit da agi nyauka tegelinchir labuh ari tangga. Tang nasit aku manah laban sempat dipaut Michael tubuh aku ari belakang.

"Bejimatka maya nyingkang kaki," pia ku Michael bejaku enggau ayun sura lundai sebedau aku ngasaika kaki nadai berindik agi. Nemu nya aku dikatung Michael ngenyit.

Mata aku enda engkesap nyerenih mua Michael ti semak amat maya iya ngatung tubuh aku nurun tangga. Jantung aku pan belabuh mih keketap laju.

"Anang lama merening aku, enggaika mata juling." Michael bejaku sambil ngijapka mata iya. Jegak udu.

"Mayas..," ku aku enda berasai bejaku munyi nya.

"Mayas tu mih nyadi laki nuan enda lama agi. Mayas tu mih lelaki ti dipeda nuan ninting hari sebedau tinduk enggau dani pagi," ku Michael nimbal aku sebedau ngengkahka tubuh aku begadai. Udah nya iya pan mupuk ninggalka aku. Tang tunga pejalai iya tak nuju pintu, ukai nuju nalan makai.

"Michael wait!" ku aku ngangauka iya ti deka pansut ari rumah.

Michael enda nyaut sereta enda ngemuningka aku. Nemu mih aku iya ringat digela aku mayas tadi. Meda baka nya, dia dih ati aku bisi berasai besalah amat ngagai iya.

"Michael wait! I'm sorry!"

Aku majak ngangauka Michael ti udah pansut lalu bejalai ngelawa kerita iya. Kira ke semeter pia mih agi datai ba kerita iya, Michael ngenyit ngetu bejalai lalu bekuing ke belakang. Aku ti enda sempat nekat tubuh diri laban ke belanda ngagai iya tadi, tak lalu ngelantak tubuh iya. Nya mih nyau baka buah rian labuh pengudah mansau ba pun, Michael pan tegali telentang sekali enggau aku setingkap atas tubuh iya.

DUP! DAP! DUP! DAP!

Jantung aku beketap laju sambil mata tepelut lebuh mulut kami duai Michael besatup enda sengaja. Nyilu kuku sereta lelemi asai iya, disemaka aku asai agar-agar. Aku merening Michael, lalu iya merening aku.

~BETAMPUNG ~

~~~~~~~~~~~~~~~~~~~~~~~~~