DAMIA CASSANDRA

DAMIA CASSANDRA TUSUN - 3

TUSUN - 3

* * * * * * * *

"Hmm.. Manis asai buah strawberry."

"Hah?!"

"Mulut nuan manis ku aku."

"Kanji."

"You like it Damia?"

"No!"

"But i like it. I want more.."

PIKKK!!!

Aku nempik dada iya. Singin ati deka nampar senentang kuyu iya. Tang laban aku geli meda ragum ti nyau penuh kuyu enggau dagu, nya mih kebuah aku nempik ba dada iya aja.

"Nya ipak nuan kanji mayas."

Pengudah munyi nya, aku berumban angkat ari ti nating tubuh Michael lalu belanda tama ke dalam rumah. Gila. Gila amat Michael nya. Kati aki nemu ngasuh aku jadi enggau lelaki tuyu sereta kanji baka nya? Erhhhgg.

Sambil mut-mut kediri aku belanda niki ke sadau ngelawa pangking. Datai ba pangking aku lalu nuju bilik mandi. Dijapai aku berus ngeli lalu diengkah aku ubat ngeli memayuh sebedau merus ngeli. Udah tembu beberus ngeli, engkurup ga aku ngena ai ubat engkurup empu. Nyau abis sebutul dikena aku.

"Ee.., mayas, mayas, mayas. Nadai geguna nuan jelu mayas udah mungkal mulut bungas aku," pia ku aku bejaku kediri nunga cheremin dalam bilik mandi.

Sepuluh minit udah nya, baru aku nurun ke baruh ngelawa nalan makai. Kumbai aku udah pulai Michael tadi, nemu nya iya udah duduk betunga enggau aki ba mija makai. Sempat aku ngemilutka iya belalai sebedau duduk ngimbai aki.

"Makai Michael, makai. Anang malu-malu. Udah makai lagi anang berumban pulai, bekelala mih enggau Damia dulu. Tentu seduai bisi pekara deka dikerandauka enggau pangan diri," pia ku aki. Nyau nadai ati agi aku deka makai pengudah ninga jaku aki nya.

"Au Mr. President," ku Michael.

"Anang ngangau Mr. President agi nih, kangau aki aja."

"No! Aki ungkup Damia siku," berumban aku nimbal aki.

"Damia uchu, mali munyi nya. Seduai nuan enda lama agi deka jadi melaki bini. Belajar mih bebasaka iya au?"

Enda bemunyi agi aku udah nya. Pala ditensamka aku lalu ngair-ngair pemakai ba pinggai. Ngilikka pala aja aki meda ulah aku baka nya.

"Makai Damia..," ku aki ngelara aku.

"Ka sapi..," ku aku meraya ba aki.

"Damia, Damia. Peda nuan Michael, agi meraya amai Damia tu. Ngarapka nuan besabar enggau iya," ku aki bejaku sambil nyapi aku. Kapa aku kiruhka Michael ti meda. Aku sigi enda belalaika ulah diri meraya ba aki baka nembiak mit.

Tembu merarau tengah hari, aku pan ngelawa pegung ikan gaga ba luar rumah. Sigi nalan aku selalu ngelantangka ati pegung ikan gaga tu laban aku rindang meda ikan.

"Nuan rindu nupi ikan pia?" tekenyit aku disapa Michael ari belakang.

"Enda, aku rindu nupi singa." ku aku nyaut ngelanjur sambil nyelurka dilah ngeleseka Michael.

"Pia.., jelu mayas dih?" ku Michael nanya baru.

"Nya, jauh sekali. Nadai nemu rindu nupi utai bebulu," pia ke nyaut pia aku naburka umpan ikan.

"Nuan rinduka mayau?"

"Enda nemu, laban aku nadai kala bayam mayau."

"Nuan rinduka burung?"

"Owh! Lelak aku nyaut nuan. Mulut nadai nemu ngetu bejaku. Alah mulut engkerasak. Enda lelak pia?"

"Enda. Laban aku rindu berandau enggau nuan."

"Tang aku ke enda rindu berandau enggau nuan nemu mayas?"

"Anang jual mahal mih Damia. Aram tua ngepunka bekaban au?"

Aku enda nyaut Michael tekala nya, tang dulu merening ngagai iya ti benung ngulurka jari mai aku betabi.

"Hmmm.. Nganti aku berunding dulu," pia ku aku sepengudah sepuluh sikin enda nyaut iya tadi. Semperung nalan umpan ikan aku tutup, lalu ditaruh ba nalan iya empu.

"Damia wait!" Michael bejaku sambil entudi aku bejalai tama ke dalam rumah.

"Ish! Sekut dalam aku dititihka nuan tu. Pulai alai!" ku aku nyau enda berasai empiaka Michael.

"Damia uchu! Lapa nuan munyi nya aa..? Nadai aku ngajar nuan enda bebasaka orang baka nya!"

Teketu singkang kaki kami duai Michael pengudah ninga sura nyawa aki ti benung tetegi ba puak-puak rumah.

"Minta ampun aki," pia ku aku bejaku lalu engkundukka pala.

"Minta ampun ngagai Michael, ukai ngagai aki. Jaga perangai nuan Damia," ku aki ngajar aku.

"Minta ampun..," ku aku bejaku sambil ngulurka jari mai Michael betabi.

"Tua bekaban?" pia ku Michael.

"Au." ku aku nyaut semadi.

* * * * * * * * * *

Nitihka semaya kemari, sehari tu Michael enggau aki iya pan datai ke rumah laban deka berandauka pasal pengawa jadi melaki bini kami duai. Mujur amat randau seduai iya. Kami duai Michael dipadu jadi dalam kandang sebulan ti deka datai ba Cathedral Duomo, Di Milano.

Hari beganti hari, minggu betukar ganti enda berasai tinggal seminggu da agi alai kami duai Michael jadi melaki bini. Kaul kami duai pan nyau mupuk manah semanah enggau pangan diri. Badu aku ngangauka Michael mayas agi, pengudah iya nyukur ragum. Tuchum kediri aku nama ingatka maya keterubah aku meda iya nadai beragum agi.

**TIKAL PULAI NGAGAI MAYA NYA SUBA...

Takah dua hari pengudah Michael enggau aki iya ke datai ke rumah, dia dih pagi siti Michael datai baru enda bepadah. Tumu amat iya datai pagi nya lalu ngerak aku ti benung jenak tinduk.

"Good morning sleeping beauty, wake up, wake up.."

Berasai berenyang tilam sepiak aku, sereta ayas-ayas aja sura nyawa nya mansa pending aku. Laban mata bangat agi ka endar tinduk, kumbai aku aki ti ngerak nya tadi.

"Agi tumu tu aki," pia ku aku lalu ngimbit tubuh orang nya enggau mata pejam laban ti disangka aku aki.

"Dani sayau..," meresih aja munyi sura nyawa orang nya betelai ba pending aku, enda nyalah baka orang betelai maya ngayap. Udah nya buk aku ga dikayam iya, sereta kuyu aku dipurus begadai.

"Hmmm..," ku aku bedemuh lalu nensamka mua ba dada orang nya. Sekali sium aku bau rengut minyak wangi nya tak lain ari enggi aki. Sesingut idung aku nyium bau rengut, enda nyalah baka uduk nyidi bau tulang. Begadai aku enchelakka mata, sekali tak peda aku siku lelaki naka penyigat iya benung dikimbit aku. Bisi ngelima sikin kini aku tebelenga sebedau nyerauh.

"Arghhhhhh! Sapa nuan tu? Nama nuan tama ngagai pangking aku?! Akiii!!! Aaaaa...

Enda apus jaku aku ti manjung ngangauka aki laban mulut aku dipampul orang nya.

"Syhhh.., anang inggar. Aku tu. Michael," pia ku lelaki nya madah lalu begadai ngelengkaka jari iya ari mampul mulut aku.

"Michael? Bula, nuan bula. Michael bebulu mua baka mayas. Anang ka ngemulaka aku nuan. Aki!! Tuuuu..

Sekali agi aku enda teapuska jaku laban Michael nyium mulut aku ngenyit lalu maut punggung aku.

"Diatu nuan pechaya Damia? Sebaka asai enggau ke ensana nya kan?" ku Michael.

Enda aku nyaut iya lalu angkat belanda tama ngagai bilik mandi. Sempat aku ngunchi pintu sebedau berujan ba baruh panchur ai paip guchur. Malu wai, tak naka pemalu disium orang lelaki maya nuan baru dani tinduk lalu bedau beberus ngeli. Nangika bau nyawa diri tak bau ambuh paya.

"Amat mayas nya? Kini ke tunga bulu iya nadai agi nih?" pia ku aku bejaku ati diri nunga cheremin mija penganta pengudah ke tembu mandi enggau begari.

Bepun ari nya mih aku badu ngela iya mayas agi. Makin hari ati aku makin tebuka nerima penatai Michael dalam pengidup aku, laban pementas iya nadai alai mantah.

**PULAI BARU NGAGAI MAYA TU..

Sehari tu, kami duai Michael nguji ke baju kawin. Ba rumah ditu aja, laban aki ngasuh orang ari kedai nya empu datai ke rumah. Nyadi utai bukai baka Gerija, nalan berami, enggau betesau bala mayuh semua udah tembu diatur magang. Lempung pengawa aki laban semina meri perintah aja, semua orang magang ke gawa.

Pengudah nguji ke baju kawin tadi, kami duai Michael duduk belelak ba ruai temuai. Aki nadai di rumah sehari tu nyau ngagai Sweden laban bisi aum besai enggau Kepala Menteri din. Lusa baru aki pulai.

"King..," ku aku dulu ngepunka jaku pengudah bisi sepuluh minit kami duai enda engkeretik semina bayam telefon binching diri empu.

King mih ku aku ngangauka Michael diatu. Iya empu ti ngasuh aku ngela iya ngena nama nya. Nyadi aku dikangauka iya Queen.

"Nama utai my Queen?" Michael nyaut tang mata iya agi mengkang merening telefon.

"Ulih nuan ngemai aku pansut?" ku aku nguji nasit nanya ngapa.

"Enda. Aki enda ngasuh," ku Michael nyaut lalu ngetu meda telefon binching iya.

"Minta pemendar ngagai aki alai, nuan telefon ngagai iya. Please..," ku aku ngumbuk Michael sambil ngijap-ngijapka mata.

"Nuan ka bejalai kini Damia?"

"Enda milih kini-kini, asal mih ulih pansut ari genturung rumah tu."

"Nuan ka enggau aku pulai ngagai rumah aku?"

"Ka.., ka."

Laju aku nyaut ka enggau iya. Udah nya, Michael pan betalipun ngagai aki. Chukup pengaga ati aku pengudah diberi aki pemendar taja pan semina enggau Michael pulai ke rumah iya. Aki mega sempat meri jaku tangkan seribu pesan nengah arus telefon binching ngagai aku.

* * * * * * * * *

"Welcome my Queen.."

Sangkai aja kerita ba pelaman rumah Michael, iya dulu pansut lalu nukangka pintu kerita sepiak aku. Udah nya, tali belulang pengelikun aku dibuka lalu tubuh aku dikatung iya.

"Eh! Enda ibuh ngatung aku pan. Bedau singkung bedau bajung aku tu, agi dapat bejalai. Malu dipeda orang," pia ku aku bejaku ngasuh Michael ngengkahka tubuh aku.

"Syhhh..., anang mayuh jaku. Nuan Queen aku, barang ku aku mih deka merayaka nuan. Chupp!"

Naka pemalu aku disium Michael senentang kening, ba mua bala ama iya ti udah berintai ngambat penatai kami duai ba mua pintu. Nyau tuchum lelinsum sida nya meda ulah Michael. Semadi datai ba ruai temuai baru iya nudukka aku atas sofa tampung tiga. Udah nya, aku pan dikelalaka iya enggau bala ama nya tadi. Tukang sumai bisi dua iku, benama Henry enggau Sisca. Ama pemeresi rumah tiga iku, benama Ramina, Elizabeth enggau Lemano. Nyadi tukang kebun bisi dua iku mega, benama Santiago enggau Leo.

"Ni aki dih?" ku aku nanya Michael meda aki iya nadai.

"Nuan enda nemu pia? Aki tua sama ngagai Sweden," ku Michael nyaut lalu jari iya lanchat amat nyeput kuyu aku.

"Ish! Jari nya jenuh kih!"

"Kati enti aku enggai dih?"

Enda aku nyaut, tang lalu ngalika diri bepanggalka pah Michael. Pengudah meda pementas iya ngelama tu, sereta ditangkan aki, begadai aku muka kuta pintu ati nerima iya.

"Mia my Queen, nuan ka makai nama?" Michael nanya sambil murus buk aku.

"Hmm.., aku tetenguk deka makai kek red velvet."

"Enda tau nuan makai kek nya Damia sulu, manis sereta belemak. Enda manahka pengerai."

"Please King.., kedungka aki enda meda. Aku danji enda makai mayuh. Sesirap aja pan udah chukup dikena mantupka tetenguk tu."

"Danji?"

"Danji."

"Enti pia, Damia nyilup tuduh dalam pangking dulu. Lagi aku ngerak nama kek udah mansau."

Pengudah munyi nya, Michael nganjung aku tama ngagai pangking temuai ti udah disediaka ama ngagai aku tadi. Maya iya angkat deka ninggalka aku, jari iya aku japai.

"King. Aku bisi siti peminta ulih?"

"Nama peminta nuan Queen? Padahka aja. Naka ulih aku ngiga."

"Ukai minta barang, nuan tu."

"Nama dih?"

"Belagu nimang aku. Ngelama tu aki selalu nimang aku sebedau tinduk. Aku enda ulih tinduk enti enda ditimang dulu."

"Errrkkk.."

"Please King.."

"Okay, Queen deka lagu nama?"

"Enda milih lagu."

Michael nerakan ngijas sura nyawa iya dulu sebedau gali ngimbai aku. Udah nya tubuh aku dipaut lalu pala aku dipanggaika atas lengan kiba iya.

"Special song for you my Queen," ku Michael lalu belabuh belagu munyi tu..

?Love me tender,

Love me sweet,

Never let me go

?You have made my life complete

And I love you so

?Love me tender,

Love me true,

All my dreams fulfilled

For my darling I love you

And I always will

?Love me tender

Love me long

Take me to your heart

For it's there that I belong,

And we'll never part

?Love me tender,

Love me true

All my dreams fulfilled

For my darling I love you

And I always will

?Love me tender,

Love me true

Tell me you are mine

I'll be yours through all the years

Till the end of time

?Love me tender,

Love me true

All my dreams fulfilled

For my darling I love you

And I always will

LOVE ME TENDER

BY : ABEGAIL DORADO

¬¬¬¬¬¬¬¬¬¬¬¬¬¬¬¬¬¬¬¬¬¬¬¬¬¬¬¬¬

* * * * *

~MICHAEL POV ~

Mua Damia ti udah jenak tinduk diserenih aku. Bajik. Chukup bajik nadai alai mantah. Kuyu pepelu, kulit lis, mulut chechirak taja enda ngena enselup, sereta bulu mata ngelentik baka bulu mata anak patung. Nadai alai mantah. Chukup landik niang apai enggau indai iya nempa suba.

Sepengudah aku nemu jantung niang Alizabeth ba dalam tubuh Damia, pengasih enggau penyayau aku makin betambah dalam ngagai iya. Aku bedanji deka ngibun Damia enggau pengabis ati laban semina jantung niang Alizabeth nya mih aja buah kenang ti ditinggalka niang ba dunya tu.

Baka ni aku tau nemu? Aku enda sengaja tepedaka surat pemendar niang Alizabeth ti udah disain iya deka nyali perengka dalam tubuh nyema iya lelang midang. Surat nya ditemu aku dalam opis Aki Damia takah dua hari pengudah kami duai Damia disabung jadi. Bepun ari nya mih aku bebendar ngambi ati Damia ti disemaka aku jinak-jinak burung achang. Nama utai ti dikedeka iya, nama utai ti diketakutka iya, nama utai ti dikeengaika iya sereta nama utai ti enda tau diempa iya ditanya aku ngagai aki iya magang.

"Bisi jantung nuan dalam tu Alizabeth. Patut mih Damia luput pedis jantung keterubah kami duai betemu. Nemu nya jantung nuan agi ngelala aku," pia ku aku betelai dalam ati sambil ngama dada Damia begadai nangika iya dani.

"Aku danji enda nempayaka Damia laban iya ngembuan jantung nuan my Queen Alizabeth. Tentu bisi kebuah Petara ngatur semua tu," ku aku nampung telai ati tadi.

Udah puas nyerenih Damia ti benung jenak tinduk, begadai aku angkat lalu pansut ngelawa dapur. Aku ngasuh tukang sumai Henry nyediaka perengka dikena ngaga kek red velvet. Aku empu ngaga kek nya. Anang saru penemu kita pemacha. Taja pan aku lelaki, aku landik nyumai, begagaka kek, enggau pemakai bukai.

Panjai tuchum aku sepengudah kek red velvet tembu dirias. Menatika Damia enda tau makai kek nya mayuh, aku mutung sesirap aja lalu diengkah ba pinggai. Udah nya tunyau aku ai tusu nyilu kuku segelas. Pinggai kek enggau gelas ai tusu diengkah aku ba talam, lalu kepenudi sekali diengkah aku sepating bungai rose bechura mirah.

Sambil ngensung aku bejalai ngemai talam ngelawa pangking temuai ti alai Damia tinduk tadi. Ngilik pala aja aku lebuh tama, meda Damia agi tinduk. Talam diengkah aku begadai atas mija tisi katil, sebedau aku enchuri nyium kening, kuyu enggau mulut Damia. Udah nya baru aku ngerak iya.

"King.. Nyamai amai kek tu. Jauh nyamai ari ti digaga tukang sumai kami din. Sapa ngaga tu? Aku deka meri iya perais," ku Damia bejaku enggau mulut engkuam penuh kek.

Panjai tuchum aku ninga iya muji kek nya nyamai. Nih! Kumbai iya enda landik aku tu ngaga kek.

"Aku ngaga kek tu au," pia ku aku nyaut sambil ngendas mulut Damia ti kamah ngena ujung tunjuk jari lalu nilat iya.

"Eeww.., cheridak amat nuan tu King. Kamah lah nya. Tu empa nama nuan tetenguk meda aku. Nyah! Perangapka dulu mulut nuan," ku Damia.

"Aaa..." Aku pan merangapka mulut.

Tak lalu disegulka Damia enggau siduk-siduk, kek nya ke dalam mulut aku. Nyauka luput aku laban sendat makai kek ke disapi Damia. Amat kasar bungai indu tu. Meda aku baka nya, dipansal iya ga aku ngelanggak ai tusu nyilu kuku dikena neruju kek nya, pia ku iya.

Aku enda sempat madahka Damia pasal diri ti enda tau ngirup ai tusu chapi. Enti aku ngirup tusu chapi, aku gelata apus tubuh. Nama mih penyadi. Ku jaku deka rumintik enggau Damia, nyau tejangal magang pelin aku gasakka gelata tumbuh selampur tubuh nyentukka langgu ugai aku.

"Minta ampun, aku enda nemu nuan enda tau ngirup ai tusu chapi."

Damia enggau sesabak minta ampun sambil ngunsut ubat gelata ba sebelah tubuh aku.

"Enda ngawa, nuan ukai sengaja."

"Semua tu salah aku."

Damia majak nyabak nyalahka diri empu. Tusah ati aku meda iya baka nya. Deka aku ngaum merap iya, enggai ga nyadi laban tubuh aku udah diunsut ubat gelata. Aih dih! Kati ku enggau tu?

~BETAMPUNG ~

~~~~~~~~~~~~~~~~~~~~~~~~