DAMIA CASSANDRA

DAMIA CASSANDRA TUSUN - 4

TUSUN - 4

* * * * * * * *

~MICHAEL POV ~

Begadai aku enchelakka mata. Tampak amat mata panas manchar dipeda ari luar jenila. Berasai nyamai isi aku udah gerai ari gelata. Panjai tuchum aku ngenangka Damia ti puh amat ngibun aku demalam, nyau pukul 3.00 dini hari tadi baru iya lelap. Nya pan semadi ditimang aku baru iya tinduk. Amat tusah munyi ku iya, mesti kena timang baka nembiak mit dulu sebedau tinduk. Perening aku mua Damia ti agi tinduk bepanggalka lengan aku laban ke buntau, enggau penuh kasih sayau. Diatu aku sigi amat sayauka iya enggau pengabis ati ukai ketegal jantung niang Alizabeth ke bisi dalam tubuh iya nya.

"I love you," pia ku aku bejaku sambil nyium kening Damia. Buk ti ngebap mua iya dikair-kair aku lalu diselitka ngagai pending.

"I love you too King," ku Damia nyaut enggau mata agi pejam. Asaika enda pechaya aku ninga saut Damia nya. Amai nya kini? Udah dani iya pia?

"Since when?" ku aku nanya laban deka nentuka nya jaku amat Damia tauka sebut ngigau iya.

"Keterubah tua betemu ba hari pengada aku."

"Amat?"

"Amat."

"Meda nuan tak jual mahal mih ngelama tu. Baka burung achang, dipeda jinak tang maya aku semak deka nangkap nuan terebai."

"Kati dih?! Enda patut ga aku deka ngasurka diri baka ipang ngiga gayung." Damia nimbal aku enggau mata melut.

"Hahaha.. Okay, okay. Anang belaya tetumu pagi tu. I love you. I love. I love you my Queen Damia Cassandra."

Nadai mayuh jaku bukai aku pan lalu ngenyemakka mua deka nagup mulut Damia. Tang mih dulu agi iya mampul mulut enggau kedua piak jari.

"Lapa dih?" aku nanya enggau kening bekedut seribu laban ti asa ati.

"Enggai besium bedau empungas enggau beberus ngeli. Malu," ku Damia nyaut.

Ninga Damia madah munyi nya, ada berumban aku angkat lalu belanda ngelawa bilik mandi. Ambi aku berus ngeli kami duai lalu diengkah ubat ngeli. Udah nya isi aku ai ba dalam janging lalu diengkah aku dalam bisin. Berus ngeli aku dipanggum, lalu berus ngeli Damia dipegai ngena jari sepiak kanan sambil ngemai bisin nya mega. Datai ba katil, suaka aku berus ngeli Damia ngagai iya ti sigi udah duduk meratika pengawa aku ari tadi. Kami duai pan sama beberus ngeli dia. Tembu merus ngeli, mua Damia aku kendas ngena tisu basah. Udah nya, baru semua kereban beberus tadi dianjung aku pulai baru ngagai bilik mandi.

"Diatu ulih nih Damia sulu?" ku aku nanya Damia sambil ngijapka mata. Manchal.

"Ulih nama?"

Ngumba endar Damia tu ngaga diri enda nemu utai ku aku. Kapa aku kiruh nyaut iya nya. Tak lalu dipaut aku tekala nya tubuh Damia nitihka rentak tubuh aku ti sigi mungkal digalika atas katil. Hmm..., bedau landik Damia tu nguritka injin sepit kuasa dua laban enda kala. Agi ulih aku ngajar.

Nyau kepengelama kami duai ti rindang larat mulung buah kembayau, dia dih jari aku majak manchal-semanchal. Nyepi baduk udah penuh diisi buah kembayau, ati tak majak amu deka mulung buah ke bukai. Pejalai kami duai pan nyau jauh-sejauh. Mimit da agi deka mungkal nugal tanah tegalan ti benung pemanah iya, dia dih nyau teketu laban ninga kensung nyumbuh tunggal ba dan pun buah kemantik.

Kami duai Damia tetuchum malu-malu tekuyung merening pangan diri udah nya. Kangau telefon ari Aki Damia ti ngasuh pengawa kami duai tadi mantul di tengah jalai.

Aki Damia ngasuh nganjung iya pulai lemai tu lagi laban diatu aki iya benung ba rantau jalai pulai ari menua Sweden.

"Aku deka mandi dulu," ku Damia ngaduka baju iya ti tesilak tadi lalu bejalai nensam ngelawa bilik mandi.

DUPP!

"Damia!!!"

Nyau manjung aku meda iya tepantup naka pemalat ba mua pintu bilik mandi.

"Ppeeeddiisss..,"

Damia madahka diri pedis enggau sesabak. Enda bula pedis nya laban nyau mengkul kening iya. Abis mih aku tu dianu Mr. President lagi enda nyaga pengelikun uchu asi iya ngujungka nyau bakal.

Tubuh Damia aku katung ngelawa katil baru. Udah nya aku pan belanda pansut ari pangking lalu ngelawa dapur. Ambi aku batu kudi lalu ditepu dalam serangan ke deka dikena aku ngetal kening Damia. Sempat aku ngasuh tukang sumai manduk spaghetti aglio olio enggau grill ikan salmon, sereta ai oren enggau salad buah sebedau belanda baru niki ke sadau nuju pangking aku.

"Sstt.. Akai Pedis. Anang balat," Damia nyau ensinat aja dital aku ngena batu kudi ba kening iya ti mengkul nya.

"Tat ke sulu, enti enda dital lagi balat agi iya mengkul. Enda alah nyau baka ikan flower horn kening nuan bedungkung," pia ku aku bejaku sambil nundi Damia ngambika iya enda berasai pedis.

Udah tembu ngetal kening Damia, kami duai pan nurun ke baruh ngelawa mija makai. Udah dinahka bala ama magang pemakai ti dipinta aku tadi. Manis amai asai pengidup aku sepagi tu sekumbang bisi Damia ditu. Makai kami duai besapi pangan diri sambil betundi begagai.

Meoww.., meowww..

Teketu kami duai Damia betundi sepengudah ninga munyi mayau. Peda aku Alice datai nuju aku enggau iku kuit-kuit ari dapur. Datai aja semak, iya pan ngansarka tubuh ba betis aku.

"Cumil amai..," ku Damia angkat ari bangku makai lalu gaga ke Alice.

"Alice nama iya," pia ku aku madahka Damia.

Lantang ati aku meda Damia gauk sereta enda takutka Alice. Alice pan sebaka rinduka Damia. Nyau aku ke nusun batu bata meda Alice enda meleka ari dipangku sereta diberap Damia. Nyau kepuas iya, Alice dikurung aku dalam sangkar pengudah tembu meri iya makai enggau mandi.

"Nama nuan nepu Alice dalam sangkar?" Damia nanya enggau mulut munchung sedepa laban ti enda puas ati.

"Udah chukup awak iya lepas sereta begulai enggau nuan. Diatu awak tua ga begulai sulu," ku aku nyaut Damia lalu nyeput kuyu iya.

"Bai aku pulai kin iya lagi au?" Damia minta pemendar ari aku sambil ngijapka mata ngaga nya cumil. Nya mih ti ngasuh ati aku gidan asaika deka nerekam iya tekala nya.

"Ulih, tang nuan mesti meri aku perais dulu."

"Nama perais nya?"

"Kiss me."

"Enggai. Mulut nuan bau ikan salmon."

Amat tak enda liat aku dikeduan Damia. Tekala nya tubuh iya aku katung lalu dibai aku pansut nuju pegung alai nyemerai. Nadai bepadah aku ngemai iya terejun ke dalam pegung nya enggau gari-gari sekali. Pansut ari pegung, nyau chemuyur aja gamal kami duai baka burung empulu ke baru udah nyelam ai ba tanah paya.

Nya mih Damia nyau chechaik aja munyi sura nyawa iya nganu sambil mandam dada aku. Tang aku nadai nyima lalu, laban aku sigi rindu nundi iya. Nadai berasai puang agi pengidup aku sekumbang bisi Damia. Ulah iya jauh lebih meraya enti dibandingka enggau niang Alizabeth suba.

Urung pukul 6.00 lemai, enggau berat ati aku nganjung Damia pulai. Alice pan dibai iya sekali. Hmm.., puang baru pangking aku. Pulai nganjung Damia tadi, aku lalu tama ke pangking. Enda asuh aku tukar ama karung tilam enggau panggal laban aku ngulihka bekau bau ti ditinggalka Damia. Tama ke dalam bilik mandi, ngasuh ati aku majak seilu-ilu meda kain tula, berus ngeli sereta perengka mandi Damia ga dia.

"Enda betah aku sulu," nya mih jaku keterubah aku nengah arus kangau video enggau Damia. Kepuas ti baka orang mamau meda bekau Damia tadi, aku pan lalu ngaga kangau video ngagai iya. Enggai aku semina bejaku aja, mesti deka nyemetak berandau sambil meda mua iya.

"Sabar mih my King, tinggal tiga hari da agi alai tua jadi melaki bini idup sekunsi. Nangika nuan leju meda aku ila," ku Damia bejaku sambil murus bulu Alice. Ngining amai aku meda Alice tinduk ba peninduk Damia.

"Owh! Lama amai tiga hari nya disepi aku Damia sulu. Enti nitihka ati aku, maya tu mega tua jadi. Enda. Aku enda nemu leju. Nuan mih kumang ati aku dalam dunya tu. Semua pengasih enggau penyayau aku ditunggahka ngagai nuan magang. Pechaya mih ke aku."

"Amat King?"

"Amat my Queen."

"Nuan sanggup ngibun aku ti udu meraya tu?"

"Sanggup."

"Nuan udah sedia deka nimang aku sebedau tinduk ninting malam?"

"Udah, mesa nya."

"Hmm.. Enti baka nya, belabuh ari malam tu timang aku."

Pengudah munyi nya, Damia lalu gali ngerimbai Alice ti jenak amat tinduk nyau bejerut aja kuruh iya ulih didinga ba kangau video. Baka selama, aku dulu ngijas sura nyawa sebedau belabuh belagu.

?Girl, you're my angel

You're my darling angel

Closer than my peeps you are to me, baby

?Shorty, you're my angel

You're my darling angel

Girl, you're my friend

When I'm in need, lady

Enda abis lagu Angel ti disadaka penyanyi Shaggy, peda aku Damia udah tinduk.

"Good night my Queen, my Angel. Enda sabar nganti hari alai tua dipadu jadi melaki bini."

Hmmm, enda ulih nyium segenda, nyium ba telefon aja pama mih. Udah nya aku pan nutup kangau video tadi. Peda aku jam ba telefon binching udah manggai pukul 10.00 malam. Aruh iya Damia nyau tinduk. Nyepi mata bedau ngantuk, aku ngidupka laptop lalu meda video sereta gambar begulai kami duai niang Alizabeth suba.

"Berth my first Queen, ngarapka nuan nyukung kaul kami duai Damia ari Dunya Sepiak nyin. Kelebih agi diatu jantung nuan dalam tubuh iya. Taja pan pengasih enggau penyayau aku diatu begelih ngagai Damia, tang nuan tetap ngembuan penuduk 'special' ba siti sukut dalam ati aku."

"Michael uchu, umbas mih nya ngenang orang ti udah lelang midang layu sulai pulai ke Batang Mandai. Ngarapka nuan enda ngelebu ati Damia."

Tekenyit aku disapa aki ti tetegi ba mua pintu penama pangking. Enda aku nemu kemaya aki belabuh bediri dia ngemataka ulah aku tadi.

"Anang irau aki, aku danji enda nempayaka Damia laban dalam ati aku udah ngerembai bungai pengasih enggau penyayau ngagai iya."

"Aki ngarapka amat mih jaku nuan nya. Terima mih Damia enggau ati tuchi beresi, ukai ketegal jantung niang Alizabeth."

Aki nemu pasal jantung nya laban udah ditusika aku suba. Udah tembu berandau enda lama enggau aki, baru aku nutup laptop lalu mupuk mejamka mata ngiga kenyap.

* * * * * * *

~DAMIA POV ~

Enda berasai pejam enchelak, datai mih ba sehari tu iya nya hari kami duai Michael dipadu jadi. Kami duai ngaga sumpah danji seidup semati ba Cathedral Duomo, Di Milan. Alice(mayau) pan dibai sekali nyadi pengulu jalai dientudika bala nembiak mit lelaki enggau indu sepuluh iku ngemai bakul bungai. Udah nya baru gintir aku. Aku ti diembing aki bejalai tama, enda berasai meliar ai mata maya meda Michael ti udah nganti ba mua din.

Chukup mayuh orang datai di tesau aki ari setiap sitak pelilih menua Ribai nyadika saksi pengawa melaki bini kami duai Michael. Tembu pengawa ba Cathedral Duomo, Di Milano nya, kami pan nampung makai selamat ba tebing tasik ti udah dirias naka pemanah. Udah abis pengawa makai selamat, kami duai Michael lalu mupuk ngintu bulan madu pengerindu ngagai menua Hawaii nepan bilun ti udah dichatar aki. Semua ungkus bulan madu pengerindu kami duai Michael disepunsa aki memagang.

"Welcome to The Kahala Hotel & Resort," ku indu penyambut temuai ngelaluka penatai kami duai Michael. Laban semua udah diatur aki magang, nadai kiruh agi ka ngatur 'check in'. Kunchi bilik diberi, lalu kami duai pan diiring sida iya sampai ngagai mua pintu bilik.

Laban ti udah malam datai ba The Kahala Hotel & Resort nya, kami duai sama nadai ati deka meda rampa menua dulu. Ditambah ga udah lelak sehari tu, kami duai Michael sama tinduk jenuh sepengudah ke mandi begintir tadi. Malam tu aku enda minta ditimang iya sebedau tinduk, ketegal mata bangat kelalu ngantuk.

Tang mih tak asaika bedau lama aku belayar dalam kenyap, sepi aku bisi utai ngerayap bepun ari kaki lalu majak niki katas-sekatas.

~BETAMPUNG ~

~~~~~~~~~~~~~~~~~~~~~~~~