MISTRESS

MISTRESS-2

Palabas na siya ng university nang makita ang Daddy niya sa kabilang kalsada, nakasakay sa kotse. Kumaway ito sa kanya.

Ngumiti siya at kumaway din, saka tumawid para puntahan ito. Agad siyang sumakay sa passenger seat at mabilis na pinaandar ng Daddy niya ang sasakyan.

Iniiwasan pa rin nilang may makapansin sa kanila.

“Kumusta ang pag-aaral mo?” tanong nito.

“Okay naman po, Dad. Nasasanay na ako sa mga bago kong kaklase, pati na rin sa unibersidad,” sagot niya habang nakatingin sa labas ng bintana. Pinagsasawa niya ang mga mata sa magandang tanawin ng San Miguel.

“Mabuti naman. Maaga natapos ang trabaho ko sa hardware kaya may oras tayo para kumain muna sa labas.”

“Kumusta po si Tita Asena?”

“She’s fine. And actually, may good news ako kaya kita sinundo para kumain sa labas.”

“Ano po 'yon?” excited na tanong niya.

“Doon ko na sasabihin sa iyo,” nakangiting sagot ng Daddy niya.

“Sige po.”

Halatang masaya at kontento na ang Daddy niya sa bagong buhay nito. Deserve naman nito kung nasaan ito ngayon. Hindi rin naman nagkukulang sa kanya ang Daddy niya, kaya wala siyang dapat ikatampo. Ginagawa nito ang lahat para sa kanya.

Nakarating sila sa karatig-bayan ng San Sebastian. Hindi kasi sila basta-basta pwedeng kumain kung saan-saan. Baka may makakilala sa Daddy niya.

Pumasok sila sa isang kilalang restaurant. Iilan lang ang tao sa loob at nakakasiguro siyang walang nakakakilala sa Daddy niya, kaya ligtas para sa kanilang kumain doon.

“Ano po 'yung good news, Dad?” excited na tanong niya habang kumakain.

“Excited ka ah,” biro nito at nagpunas ng bibig. Uminom muna ito bago nagsalita. Nag-abang naman siya.

“Buntis si Tita Asena mo. Magkakaanak na kami,” masiglang balita nito.

Hindi siya agad nakasagot. Nanatili lang siyang nakatingin sa Daddy niya.

Magkakaanak na ito sa asawa nito. Mabubuo na ang pamilya nito.

Hindi niya alam kung ano ang isasagot. O kung ano ang mararamdaman.

“Magkakaroon ka na ng kapatid, Bianca,” masiglang dagdag pa nito.

“Wow,” sagot niya at pilit na ngumiti. “Congratulations po, Dad. Sa inyo ni Tita Asena.”

Pinasigla niya ang boses. Pero sa totoo, hindi siya sigurado kung masaya nga ba siya.

Ngayong mabubuo na ang pamilya ng Daddy niya, ano na ang mangyayari sa kanya?

Napatingin siya rito na masiglang kumakain. Halata ang saya sa mukha nito. At sana, maging masaya rin siya para dito.

Nag-taxi siya pauwi ng Tragora Condominium. Hindi kasi siya pwedeng ihatid ng Daddy niya doon. Baka may makakita sa kanila.

Bago sila naghiwalay, bilin nito na mas kailangan na nilang mag-ingat. Hindi pa raw tamang panahon para ipakilala siya kay Tita Asena.

Alam niya 'yon. Ayaw niyang makaapekto siya sa pagbubuntis ng asawa ng Daddy niya.

“Excuse me.”

Napatigil siya sa lobby ng condo. Sinulyapan niya ang lalaking nakatingin sa kanya.

Kumunot ang noo niya.

Gwapo. Napaka-gwapo. At may malakas na appeal — 'yon ang unang pumasok sa isip niya.

Tila namukhaan niya ito. Siya 'yong nakabunggo niya sa entrance ng building noong isang araw. Oo, ito nga.

Hindi mo basta-basta makakalimutan ang mukhang 'to.

Matangkad. Kayumanggi ang balat. Manipis ang labi. Matangos ang ilong. At ang mga mata — titig na titig sa kanya.

Halata rin ang pagsuri nito sa kanya mula ulo hanggang paa.

Maganda naman ang suot niya. Uso sa San Miguel University ang tight skinny jeans at loose crop top na sumisilip sa flat niyang tiyan. At oo, maganda siya. Alam niya 'yon.

“Do I know you?” tanong niya. Kanina pa kasi siya nito tinititigan. Ewan niya, pero kumabog ang dibdib niya. Kinabahan siya.

Humakbang ang lalaki palapit sa kanya. Amoy na amoy niya ang pabango nito. Amoy mayaman.

Sa tindig pa lang at pananamit, halatang may kaya. At mukhang hindi rin nalalayo ang edad nila.

He is attractive. To be honest.

“No,” sagot nito, walang emosyon. Tinitigan siya ulit sa mga mata.

Pakiramdam niya hihimatayin siya sa titig nito. Hindi 'to first time na makakita siya ng gwapo. Pero ito ang unang beses na may tumitig sa kanya nang ganito katindi.

“I’m Liam Villanueva,” pakilala nito sa pormal na boses.

Lalong kumunot ang noo niya.

“Can I talk to you?”

“About what?”

“About Bernard.”

“Bernard?”

Sabay na kumabog ang dibdib niya nang marinig ang pangalan ng Daddy niya.

“Bernard Titular,” dugtong nito.

Nanlaki ang mga mata niya.

“You are Bianca Tuazon, right?”

Tuazon ang apelido niya. Apelido 'yon ng Mommy niya. Dahil hindi naman kasal ang Daddy niya rito, hindi na napalitan pa ang apelido niya.

Napalunok siya at napatitig sa lalaki.

Liam Villanueva.

Villanueva ang apelido ni Tita Asena. Naikwento ng Daddy niya na may kapatid itong lalaki.

Hindi kaya... siya 'to?

Muli niyang tiningnan ang lalaki. Hindi siya makahinga sa tensyon. Nakita niyang napatiim-bagang ito at dumilim ang mga mata.

Napaatras siya ng isang hakbang nang wala sa sarili.

Maaari bang ang lalaking kaharap niya ngayon ay kapatid ng asawa ng Daddy niya?

At bakit galit ang mga matang nakatingin sa kanya?

Kilala ba siya nito?

Naging maingat naman sila ng Daddy niya. Walang dapat makaalam dito sa San Miguel.

Eh bakit nasa harapan niya ngayon si Liam Villanueva na may galit sa mga mata?