القائد كوبرا

الفصل الثامن

مشاعل واحمد المطعم وبكل جراءة كانوا ماسكين يدين بعض وقعدوا على الطاولة اللي كانوا حاجزينها باخر لحظه

احمد: ها حبيبتي تبين تشربين شي ولا ناكل على طول؟

مشاعل اللي كانت متلثمه بلثمه مطلعه نص وجهها الحلو: لا نشرب اول

احمد: حاضرين للحلوين ..

وطلبوا لهم شي

الطاولة اللي قدامهم

كانوا الشباب يسولفون وسكتوا لفتره فسرح خالد باللي قدامه بدون قصد

بدر: هييييييييي انت

خالد : هاااا

بدر يلتفت للمكان اللي كان يناظره خالد: وش هااا اكلت البنت بعيونك

خالد وهو يناظر بدر: ما كنت اطالعها

م

محمد: من بتكون يعني؟

خالد: اهي وحده وخلاص..

بدر: ها شباب نروح الاستراحه؟

محمد: يللا ..

خالد يفكر.. ياخي انا مدري ليش عندي احساس اني قد شفت البنت هذي قبل كذا بس مدري وين.. وجهها مألوف لي.. واللي زاد شكي انها تقريبا قامت بعد ما انتبهت لنظراتي لها .. هذا الشي من جد بيجنني .. معقوله تكون عارف*ني وانحاشت لانها خافت اكشفها ؟؟اوووووف وانا وش له اقلب ذا الموضوع براسي؟؟ خلني كذا احسن لي ..

عند البنات

كانت اصوات الاغاني ماليه المكان والبنات شغالين رقص ووناسهه وصراخ وصوت الاغاني الاجنبية ماليه المكان الكل كان متحمس الا مشاعل كالعاده كان الوضع عندها عادي و اقل من عادي

فجأة اشتغلت اغنيه هاااديه خلت البنات يقعدوون شوي عشان يرتاحون

اثير:ااااااااه تعبت

دلال:هههههه يعطيك العافيه رقصتي لين دختي

اثير: خلاص عاد لازم ارجع البيت عاد

الهنوف: لييييييييييش !!

اثير ابتسمت من رجة الهنوف: غدير حرقت جوالي من الصبح وهي تدق تبيني ارجع وانا سافهتها

دلال:ليش ما جت معك طيب؟

اثير: اليوم دي جي وحده من صاحباتها وكانت واعدتها تروح من زمان عشان كذا

الهنوف: المره الجايه خليها تجي مررره خاطري اتعرف عليها اكثر

اثير وهي تقرص خد الهنوف: من عيوووني يا قمر

دلال: بنااات مين تجي معي نجيب الحلا

رنيم: حرام عليك بعد في حلا وين احطه ذا بطني امتلت

دلال: لا حبيبتي مالي شغل.. بتاكلين يعني بتاكلين ..يللا قوموا من تساعدني فيكم

محد رد عليها

دلال طلعت عيونها: ووجع انشالله تحركوا

الهنوف: وش الله حادك ماكثر الله بذا البيت الا الخدم

دلال تتخصر وبنص عين: ضيوفي مو ضيوف الخدم

ايان: مننا ضيوف احنا راعين بيت.. بس تحبين الشقا لعمرك

اثير بابتسامه: يللا دلوو انا بقوم معك

دلال: هووو لا حشى مافي يقومون ذا البغلات يتحركون

ايان اللي كانت منسدحه على الارض : مالبغل غيرك قومي هزي طولك مع نفسك

دلال: طيب طيب انا اوريكم .. " وفكرت انو اثير خلاص بتكون زوجة اخوها ومصيرا تتعرف على البيت باركانه ليش ما تقوم معها"

دلال: يللا اثورتي

اثير: يللا حبيبتي

ديما: شغلوا شغلوا الاغاني الصاحيه خلونا نردح قبل ترجع دلال

مها:هههههه يللاا .. بحط لكم شكشكه..

بالمطبخ..

دلال: ياربي وييين طقم الصحون الجديد؟ سيتي؟

سيتي: يس مس

دلال: وين الطقم الجديد حق الصحون ابي صحون الحلاا

سيتي: فوق .. في دولاب كبير

دلال: ااااه بس.. مدري وش لقفكم تطلعونه هناك .. اثير حبيبتي انا بروح اجيب الصحون وانتي ولا عليك امر صبي العصير بالكاسات

اثير: طيب..

بغرفة مشعل.

مشعل كان حران وهو نايم وقام معصب: افففففففف وش ذا الحر اللي انا عايش فيه من طفا المكيف وانا نايم

طالع ريموت المكيف وهو مستغرب.. لقاه جمبه ، اكيد طفيته بالغلط وانا نايم لانه كان تحت

تافف بقرف.. اكره شي بالنسبه له انه ينام بالحر ..

وطلع بره يجيب له مويه.. لقى موية البراد شوي وماتكفي حتى كاس...هنا من جد عصب

مشعل: الله ياخذهم من خددددددم مدري ليش ما يتمون شغلهم .. ونزل تحت معصب

بالمطبخ كانت اثير تصب العصير بالكاسات الكريستال الراقيه وهي متحمسه ...

الا بدخلة مشعل: سييييتيييييييييي

و........

اكمل لكم بالبارت الجاي

هذا البارت اطول من اي بارت.. لانو اللي قبله كان قصير

مع حبي

الجزء الخامس

الشباب كانوا مستانسين بالاستراحه اللي يشيش واللي يلعب سوني واللي يغازل يعني جو كل الشباب بكل الاستراحات

خالد يتثاوب: ياخي فيني النوووم

بدر: وييييين تونا بدري...

خالد: ابي انام ما نمت البارح زين

بدر: وش ماكل عقلك انت هاا

خالد بنص عين: انت وش عندك مسلتمني من اليوم دق..

بدر: ما تشوف حركاتك ؟؟ هي اللي تخليني احكي

خالد: اففف منك .. وخذا الجوال ودق على مها

مها:هلا خلوود

خالد: هلا مهاوي.. ها ما خلصتي

مها: اوووه اخوي راضي اليوم علي وداني وبيرجعي

خالد:هههههه شفتي كيف

مها: امممم شوي وتعال لسه بناكل حلا

خالد بزهق:حلي بالبيت

مها: مابي ابي مع البنات .. وبعدين ترى انا مايحصل لي اشوفهم دايم خلني شويات

خالد: ياربي منك ,, ترى ابي انام هلكاااااان

مها: خالد عاد خلاص ابي اقعد شوي عادي عندك اطلع وانا وناستي ما كملت، وبعدين دامك مرره تبي ترجع وتنام روح البيت وانا ارجع مع السواق

خالد: ايوووووة .. عشان الجوهرة تطب ببطني

مها ضحكت بخفه: اجل انتظرني

خالد استسلم: امري لله نستنى شوي

مها: وه فديتك يا احلى اخ

خالد:هههه يلا وخري.. باي

مها: بايات

مشاعل بلقافه: امم وش كان يبي خالد

مها استغربت من مشاعل خصوصا انها ما تحكي معها الا نادر واقل من النادر بعد مع انهم عيال عم: ولا شي

مشاعل: كيف ولاا شي وانتي تقولين له شوي

مها ابتسمت بخفه: مو شي يستاهل الذكر ..

ايان ببلاهة: وانتي وش لك شغل اخ واخته يحكون انتي وش لك

ليان: وش ذا ايان .. وش دخلك انتي

مشاعل مررره انقهرت من ايان لانها فشلتها كان ودها تقوم وتض*بها لين تدوخ .. وانقهرت زياده لانها ما قدرت ترد على ايان هذا وهي مهجدة كل احد

ايان: بعد بعد ذا اللي ناقص.. والتفتت على مها

ايان: لا يكون بتروحين انتي

مها: لا اشوة اقنعته اقعد شوي

الهنوف: اي بعد احسب.. الحين وين دلال طولت

مها: اي والله واثير بعد

الهنوف: خليني اروح اشوفهم....

بالمطبخ..

مشعل وقف مصدووووم من اللي شافه

حلوة ..جميله..روووعه ما عرف وش يقول ...

مشعل مين هذي ؟؟ من وين طلعت

واثير مسكينه كان ودها تبكي من الفشله من هذا وليش قاعد يطالعني كذا ..اااااااااه ياربي ،فكرت تهرب بس وين تروح ماهي عارفه اي شي بذا البيت والاخ ساد الباب بوجهها ,, لفت لقت الف*ج، الباب الخلفي !!! ماتدري وين بيوديها مو مهم.. المهم اي مكان غير اللي هي فيه .. حاولت تفتحه بس كان مسكر ..وسكرت الدنيا بوجهها من جديد.. لفت حول نفسها والاخ واقف مصنم يطالعها وماهي عارف ليش ما يتحرك ويفتح لها الطريق

استسلمت اثير وغطت وجهها بيدنيها وعطته ظهرها

دخلت الهنوف: دليييييل وينك انتي و .... وانصدمت لانو مشعل هنا

الهنوف تخبطه: مشيعل انت وش تسوي هنا

اثيربنفسها ااااه يارب هذا مشعل بعد يارب وش اسوي

مشعل بارتباك: هاا.. مدري

الهنوف تطالعه بنص عين: اطلع اطلع ما تشوف البنت مسكينه بتموت من الفشيله

مشعل حس على دمه اخيرا وطلع

الهنوف راحت لاثير وخبطتها على كتفها وقال بمزح دمه ثقيل:مسوية غراميات مع اخوي

اثير خنقته العبره وصارت تدمع: لا والله مو انا هو ...

الهنوف: ههههههه امزح امزح معك وش فيك انتي ...

اثير صاحت من جد فشيلتها فشيلتين مو بس شافها مشعل الا ودرت الهنوف بعد ياربي وش يفكها من ل**نها

دخلت دلال: اثوور سوري تاخرت عليك بس. وانفجعت يوم شافت اثير تبكي

دلال: وش فيك اثير ليش تبكين

اثير:............

دلال بعصبيه: الهنوف وش سويتي لها اعترفي

الهنوف بخوف: وربي ولا شي انا دخلت لقيت مشعل هنا

دلال:مشعل هنا!!!!!!!!

الهنوف: اي وربي شفته بس طلع بعد ما دخلت

دلال: ياخزياااااااااااااااااااه شافك

اثير زادت بكاها الحين وش بيقولون عني

دلال فهمت: اااه بس من ذا المشيعل خذي حبيبتي اشربي مويه

اثير شربت المويه وهدت: انا بروح البيت

دلال: لا والله ما تتحركين

الهنوف: خلاص شافك وانتهى الوضع خلي عنك الدلع عاد

دلال عطت الهنوف نظره سكتتها

اثير: لا من جد خلاص لازم اروح

دلال: طيب ناكل الكيكه

اثير: على بال مايجي السواق

دلال: اوكي حبيبتي براحتك

عند مشعل

مشعل: ياويل حالي .. وش ذا الزين .. من هذي!! وربي خقق من تكون هذي.. ودموعها بعد ياحلوها ويا حلو شعرها .. اففف اعوذ بالله من الشيطان وش قاعد اقول انا ..

وتذكر انه بيخطب رسمي بعد كم يوم وضاق ص*ره صحيح ماصار شي رسمي بس خلاص .. وضاق ص*ره مايبي يتزوج ولا يبي اللي امه نقتها مع انه مايعرفها ولا شافها من يومهم صغار مررررره بعد ومرتين .. انا بحاول اقنع امي تصرف نظر عن ذا الزواج..

انسدح على سريره ورجع يفكر باللي شافها تحت ..

عند البنات ..

اكلوا الكيك وقضوها سوالف لليل .. وراحوا صاحبات دلال والهنوف وماصار في احد غريب

مشاعل قمة الملل عايشته .. وفوق هذا كانت خايفه مووت من الموقف اللي تعرضت له هي الحقير احمد..

انا اوريك يا احمد ان ماعرفتك قدرك.. اجل تتركني ؟؟ انت تتخلى عني ولله لا اخليك تندم..والله لا اوريك منهي بنت حمد ال....

رنيم:مشاااااااااااااااعل

مشاعل : وجع ليش الصراخ

رنيم: يا سلام.. صاير لي انادي عليك سنه

مشاعل بملل: اخلصي وش تبين

رنيم: يللا السواق بره بنروح..

مشاعل كان روحها ردت لها .. خذت شنطتها وطلعت حتى بدون ما تسلم على البنات او تودعهم

رنيم تفشلت من بجاحة اختها وسلمت على بنات عمها

رنيم: معليش بنات تعرفون اخلاق مشاعل باخر الليل كيف تكون

ايان: ههههه باخر الليل بس.. دايم اخلاقها اعوذ بالله

رنيم ضحكت بخفة وليان خزت اختها

ريما: عادي حبيبتي احنا بنات عم مو اغراب

رنيم وهي تبوس ريما: عسى ربي ما يحرمني منك يارب.. دلال

دلال: لبيه

رنيم: مررره شكرا على العزيمه والله من زمان ما تجمعنا وانتي جمعتينا ووسعتي صدورنا

دلال: هوووو وش دعوه حبيبتي .. مابينا شكر انشالله الجايات اكثر وبننبسط زياده ...

رنيم وهي تلبس عبايتها: انشالله حبيبتي,, يللا عن اذنكم بنات

الكل: اذنك معك..

التفتت ديما على اثير: وش فيك اثير

اثير اللي كانت ساكته طول الوقت ضايق ص*رها: ولا شي

ديما: ولوووو .. لا تخبين عني .. انا زي اختك

اثير بابتسامه حلوة: ما تقصرين ديوم حبيبتي.. بس والله فيني النووم وابي ارجع البيت

ديما: تونا.. لسه قاعدين

اثير: لا خلاص من زمان وانا هنا .. وبعد ابي انام مره مرهقه

ديما: سلامتك حبيبتي..

اثير : الله يسلمك يارب..

بعد نص ساعه البيت خلا من البنات كلهم

ودخلوا الهنوف ودلال الفيلا

دلال وهي ترمي نفسها على الكنبه: ااااااه والله اليوم كان طويل

الهنوف: اي والله .. مرره تعبانه

دلال: ما ادور الا السرير انا ... ااااه بس لازم اتحمم مقدر انام كذا

الهنوف: يللا مو مشكله شاور على السريع وينتهي الموضوع ..

دخلوا ام مشعل وابو مشعل: السلام عليكم

دلال والهنوف: وعليكم السلام والرحمه..

الهنوف بنص عين: ما بغيتوا تجون

ابو مشعل: ياااارب من ذا البنت اللي بتذ*حني.. زوج وزوجته طالعين انتي وش تبين

ام مشعل:هههههههههه

الهنوف تتصنع الزعل: كذا يا بابا :( هذا وانا بنتك حبيبتك اخر العنقود تحطم فيني كذا

دلال: اللي يطق الباب يسمع الجواب

ابو مشعل: كفوو والله بنتي الكبيره الحلوة

الهنوف تتخصر: لا واللللللله الحين دلال صارت الحلوة وانا صرت كخه

ابومشعل يغيضها: اي

ام مشعل: هوو ابو مشعل.. وش جاك حطيت راسك براس بنتي

ابو مشعل: نشبت لي انا وانتي..

الهنوف بزعل وحمق: انا رايحه انام احسن لي من ذا الحكي الي يضيق الص*ر بذا الليل.. وطلعت الدرج زعلانه من ابوها..

ابو مشعل: ههههههههههههه

ام مشعل: حرام عليك ياخي .. كذا زعلت بنتي

ابو مشعل: ما تزعل مني بنتي فديتها.. انا اتصرف معاها بكره انشالله اعرف كيف اراضيها..

دلال: هههههه اجل الله يعينك على مراضاتها يبه .. مرررة بتكلفك ترى

ابو مشعل: كلي لكم .. عساني افداكم

دلال: الله لا يحرمنا منك يارب..

ابو مشعل: ولا منكم .. يللا عن اذنكم ..نورة انا طالع انام

ام مشعل: طيب بتطمن على كل شي انشالله واجيك..

ابو مشعل هز راسه بالموافقه

قعدت ام مشعل بعد ما جت الخدامه وخذت عبايتها: ها دلول بشريني كيف كانت عزيمتك؟

دلال بفرحه: والله كانت ابطل عزيمه.. مررة انبسطنا والبنات انبسطوا

ام مشعل: الحمدلله.. يللا حكيني وش سويتوا؟

دلال قالت لامها كل اللي صار لهم .. بس ما قالت لها عن موقف مشعل واثير لانها حست انو ماله داعي تقول.. وبعد لانها ماتدري وش ردة فعل مشعل بعد ما شاف اثير .. هي عجبته او لا

ام مشعل: الحمدلله..

دلال: اييييييي وجت مشاعل

ام مشعل باستغراب: مشاعل !!! غريبه مو بالعاده تتجمع معكم

دلال: من جد غريبه.. انصدمنا كلنا يوم شفناها..

ام مشعل: يمكن حبت تتقرب منكم

دلال بلا مبالاة: اما مشاعل.. كثري منها ماما مافي امل.. كل الناس ينصلح حالها الا بنت عمي مشاعل .. اي وبعد جت بعد رنيم بفتره طويله ماجت معها

ام مشعل: ماتدرين عن ظروفها

دلال: صح

ام مشعل : الله يهدي الجميع .. وين مشعل اخوك؟

دلال: بغرفته اكيد او بالملحق حقه مدري وين بالضبط

ام مشعل: طيب تعشى؟

دلال: مدري والله

ام مشعل: هووو وراك ما تدرين عن اخوك يا كافي

دلال: ماما!! مشعل ماهو بزر حشى.. المفروض توصينه علي مو العكس

ام مشعل: فديته عاد هو ماهو مقصر معكم ابد

من اي ناحيه

دلال: اي والله ما قصر.. عساني ماخلا منه

ام مشعل: انا بقوم اشوفه واتطمن عليه قبل ما انام..

دلال: وانا بعد بقوم اتحمم ونااااااام حدي تعبانه

ام مشعل: يللا حبيبتي اجل تصبحين على خير

دلال: وانتي من اهله ...

بيت ابو بندر

دخلوا البنات اليوم متطمنين وقعدوا يسولفون على بال ما يوصلون لمدخل البيت الكبير .. لانو ابوهم رجع يعني امهم ابدن مارح تسوي لهم سالفه على تاخرهم .. مع انهم ما تاخروا اصلا.. بس امهم تحب تسوي لهم مشاكل على اي شي يسوى ولا ما يسوى ..

ديما:يااااااي ماني مصدقه انو بابا رجع

ريما: ولا انا والله.. مرة مبسوطة .. وكملت بحزن ، انشالله يطول بقعدته هنا مو مثل كل مره اسبوع وخلاص يرجع

ديما: يااارب .. والله اني اتمنى من كل قلبي..

شوي وجا بدر وراهم

بدر بروقاااااان: يا مساااااااااااء الخيييييير

ريما: اي مساء قول صباح

بدر: مساء او صباح .. اهم شي انه خير بشوفتكم

ديما: يالبى اخوووي يا ناس ..

بدر: لبببى كلللللك.. الا اقول وليش متاخرين ها؟؟

ريما: اما متاخرين

بدر: اي.. ولا ما خفتوا من امي تسوي لكم مشكله

ريما: ههههههههههههه ما الوووووومك ما دريت

بدر : وشوووو

ديما: بابا

بدر: وش فيه؟

ديما: بابا رجع من لندن ..

بدر والفرحة غمرته: ابوي رجععععع

ديما: ايييييييييييي

بدر بارتياح: اللللللللللللللله يبشرك بالخير.. وانتوا شفتوه ؟

ريما: اي.. وقعدنا شوي معها وقال لنا روحوا انبسطوا ووسعوا صدوركم ولاحقين على القعده بكره

بدر: طيب وامي؟

ريما: ماما ما قالت لنا ولا شي بوجود بابا

بدر فرحته ما اكتملت : عسى ما تخانقوا

ريما نزلت راسها: لا بس شدوا بالحكي شوي

بدر تن*د بصوت مسموع

ديما: انشالله خير بدر حبيبي

بدر: انشالله.. طيب اكيد هو الحين نايم.. خلونا نروح ننام الحين وبكره انشالله نصحى من الصبح عشان نقعد معاه

البنات: انشالله .. ودخلوا الغرفه وكل واحد توجه لغرفته عشان ينام

بيت ام عبدالرحمن

اثير كانت بغرفتها والنوم مجافيها .. تفكر بالموقف اللي صار لها اليوم مع مشعل.. مره كانت محرجه بسبب ذا الموقف البايخ..

يارب انه يخقق.. ما توقعته حلو لذا الدرجه ابد .. بس كنه جريء.. ماشال عينه من علي..

اففففففف والله فشله .. لا وبعد شاف*نا الهنوف ودلال درت.. اخاف يعلمون احد !! يعني مين بيعلمون انا ووجهي,, شكل تأثير الصدمه علي كان قوي واجد .. بحاول انام ابرك لي

ويوم بدت تنعس وغفت عينها دخلت عليها اختها غدير مسرررررررررعه وفتحت الباب

اثير فزت من نومها: بسم الله الرحمن الرحيم

غدير بنص عين: وش فيك تسمين ؟ شايفه وحش قدامك؟

اثير: لا والله شايفه مجنونه.. انا بعرف بس متى تخفين عن هبالك ذا ؟ بغيتي توقفين قلبي حررام عليك

غدير بلا مبالاة: اختصري السالفه يللا وقولي لي وش صار اليوم؟

اثير: وش صار يعني ؟ جمعة بنات عاديه

غدير": لا واللللللللللله .. ابي التفاصيل الممله .. مين جا ومن ما قدر يجي.. وش سويتوا وش كانوا البنات للابسين ووش كليتوا وش حكيتوا عنه

اثير بطنازة: ما ودك اقول لك بعد مين اللي جاب كل وحده من البنات للعزيمه

غدير: تتطنزين !!!

اثير: اجل !! تبني اجاوب على كل هذا مهبولة انتي ولا صاحيه

غدير: يللا عاد احكي,,

اثير: ماني حاكية الحين شي .. ابي انااااااام اطلعي بره وقفلي الباب والنور وانشالله بكره احكي لك كل شي تبينه

غدير: لا مابي ابي الحين مافيني نوم

اثير: غدير تكفين اطلعي والله يومي كان طويل ماني قادره اركز ابي انام

غدير : ليييييييش وش صار لك اليوم ؟ لا يكون شفتي حبيب القلب

طبعا غدير قالتها بمزح ما توقعتها ابد ممكن تصير

انتفضت اثير من لقب حبيب القلب .. كنك داريه وش صار اليوم

اثير وشو وتصيح : تكفييييييين اطلعي بنااااام بكره احكي لك كل شي بس اعتقيني الحين لوجه ربك يختي

غدير قامت بحمق بعد ما صفقت اختها بالمخده على وجهها بقوة: افففف منك انتي يالعجوز.. انا اشك انو عمرك 91 مو 19 على ذا ال**ل اللي انتي فيه

اثير ضحكت على هبال اختها: تكفين عاد غدورة الامورة خليني الحين وبكره انشالله بحكي لك كل اللي تبينه ..

غدير حركت يدها بلا مبالاة وهي تطلع : غضب عنك تحكين لي اصلا ماهو بيدك .. وقفلت الباب

اثير ضحكت : ههههههههه خبله تذكرني بالهنوف و ايان .. كنهم اختي.. الله يستر علينا لا تجمعوا !!!

بيت ابو مشعل

ام مشعل طقت الباب على ولدها اللي ما كان نايم

مشعل: ادخل

ام مشعل: السلام عليكم

مشعل عدل جلسته: وعليكم السلام.. هلا يمه

ام مشعل: هلا مشعل... نايم للحين

مشعل: لا يمه صاحي من زمان

ام مشعل: طيب تعشيت.؟

مشعل: لا والله مالي نفس..

ام مشعل: ليش يمه ؟

مشعل: ابي اكمل نوم.. وتعرفيني عاد احب انام خفيف

ام مشعل: طيب اسوي لك اي حاجه خفيفه تاكلها ماتقعد على معدتك

مشعل: لا يمه مشكوره .. برجع انام الحين

ام مشعل :على هواك يمه

مشعل قعد يفكر يقول لامه الحين انه مايبي اثير من جد ولا ايش؟؟ خايف من ردة فعلها وزعلها بس بنفس الوقت يحس انه مستحيل يتزوجها .. والسبب انه ما يحب احد يمشي رايه عليه مهما كان الشخص.. ممكن يتغاضى عن ذا الشي قدام امه و ابوه بس مو على حساب نفسه وسعادته ابد .. وفوق كذا هو حاب يختار زوجته بنفسه بدون محد يتدخل.. صحيح هذا الشي تقريبا ما يصير بمجتمعنا وكذا .. بس مشعل غير.. ما يحب يسوي شي ماهو مقتنع فيه

ام مشعل: يللا تصبح على خير وانا امك

مشعل استوقف امه: يمه

ام مشعل التفتت: هلا

مشعل: يمه بحكي معك بموضوع

ام مشعل جلست على طرف السرير: خير انشالله

مشعل: كل الخير.. وقال بتردد ..يمه ,, انا مابي اثير

ام مشعل بتملل: انا لللللله.. احنا ما خلصنا من ذا السيره !

مشعل: مارح نخلص الا واحنا متفقين

ام مشعل: بس انا مابي غير اثير لك

مشعل: وانا مابي اثير

ام مشعل: انت توك ماتعرف مصلحة نفسك...

مشعل: يمه ماني بزر .. اعرف اقرر انا.. وابي اختار زوجتي بنفسي

ام مشعل: عشتوووو .. وين احنا فيه تختار زوجتك بنفسك

مشعل: يمه لا تغيرين الموضوع.. انا اثير مابيها وهذي كلمتي وقلتها

ام مشعل: بتمشي كلمتك علي يا مشعل

مشعل: ماعاش يمه من يمشي كلمته عليك.. بس اثير مابيها مابيهاااااااااااااا

ام مشعل: بكره لا شفتها وعشت معها رح تتقبلها وتحبها

مشعل : مارح استنى لبكره ..احنا فيها من الحين مابيها ورجاءا اصرفي نظر عن ذا الزواج

ام مشعل وقفت وبتحدي وبعصبيه: ماني صارفه نظر يا مشعل .. ويا كلمتي او كلمتك اللي بتمشي ونشوف اذا تقدر تخالف اوامري ولا لا.. ورح تتزوج اثير غصبا عليك.. ولا ترى وحق اللي رفع السما ياولد بطني .. اني لا اتبرى منك ليوم الدين.. وهذاني حذرتك

وتوجهت للباب..

مشعل كان شاد على قبضة يده بقووووة من العصبيه والقهرر

وقبل لا تطلع امه التفتت عليه: انا كلمت امها وقالت بتشاورها وبتشاور اخوانها وبترد لنا بعد كم يوم جهز نفسك ولا تعاند.. ولا ترى اعاندك زياده واخلي الزواج والملكه بيوم واحد..

مشعل مارد بس نزل عيونه

ام مشعل طلعت وخلته..

مشعل ماتكلم من القهر ابدددددددد انسدح على السرير بكل قوته: ماشي .. انا اوريكم !!!

اليوم الثاني

استراليا

كان بداية يوم جديد بالجامعه الامريكيه .. تشوف اللي قاعد يقرا له كتاب واللي يمشي مع حبيبته متجهين لمحاضرتهم .. واللي قاعد يفطر على عجل ... يعني باختصار كل واحد منهم عايش جوه

بالكافتيريا ..

كانوا رانيا وصاحبتها سميه قاعدين يشربون لهم كوفي على رواق ..

سميه: وش عندج كنج فيج شي قارصتج

رانيا: وش فيني بعد

سميه : مدري عنج.. ثبتي يا معوده وش بلاج تتحرقصين جذي

رانيا: ما جا ماجد الزفت

سميه: وهو وينه الحين

رانيا : مدري عنه ... اففففففف هو واعدني انه يتريق معي اليوم ..

سميه : يقالج الحين كلش مهتمه على وجوده معج وحواليج

رانيا بنص عين: طبعا ماني مهتمه.. بس مابي ادفع حق ريوقي ابيه هو يريقني

سميه: واااااي منج انتي.. انا بريقج خلاص لا تحاتين .. انتي شي غريب ما قد شفت مثلج ، تموتين على القرش مع انو عايلتج ماعليها قصور من ناحيتج

رانيا: انتي صاحيه ولا مينونه .. تقارنين فلوسي الملاميم بثروة ماجد واهله

سميه: هههههههههههه وانتي الصاجه

رانيا بغرور: اكيد انا صاجه,, انا رانيا مو حيا الله .. كل شي اعمل حسابه عدل ... ورفعت جوالها

سميه: منو بتحاجين؟

رانيا: بحاجي الدعله ماجدوو اشوف وينه لهالحزه

شقة ماجد وبندر

كان كل واحد منهم بساااااابع نومه .. صحيح ما كان عندهم محاضره الصبح بدري.. بس ماجد كان يبي يروح من الصباح عشان يقعد مع رانيا لانو عنده ضغط مررره جامد طول اليوم.. ويبي يروح يحجز عشان سفرته للرياض هو وبندر ، وماله الا هالساعتين يقعد مع حبيبته

رن جوال ماجد اللي حس فيه على طول

رد وبصوت كله نوم: الووووو

رانيا: ماجد

ماجد : يا روووووووحه

رانيا: انت وينك عني لهالحزة

ماجد: ليش حبيبي كم الساعه؟

رانيا: الساعه 8 ونص ..

ماجد: اوووف .. تاخرت عليك سوري حبيبتي

رانيا: وين اصرفها هذي.. جي عاد ؟!! ترى مو اول مرة تسويها وتلطعني

ماجد وهو يفرك عيونه: حبيبتي اسف راحت علي نومه .. انشالله شوي واكون عندك ولو اضطريت اكنسل جدولي اليوم كله لعيونك انا حاضر بس انتي هدي

رانيا: اوووه يا كثر اعذارك..

ماجد: حبيبتي لا تزعلين .. يللا شوي وانا جايك

رانيا: نشوووف .. وقفلت حتى بدون ما تقول له باي

ماجد تعود على كذا اذا كانت زعلانه منه ، لازم تطلع زعلها من خشمه مو بس عيونه

قام وغسل وجهه وصلى اللي فاته .. ودخل على بندر

ماجد: بندر

بندر:......

ماجد: بنددددددددررررررررررررررررر

بندر بانزعاج من صوت ماجد العالي: هااااااااااا

ماجد: ههههههه هوى .. قوم منت رايح الجامعه؟

بندر: ليش كم الساعه؟

ماجد: 8:40

بندر:الللللللللللله المستعان .. ياخي وش يقومني الحين وانا اول محاضراتي 11

ماجد: بكييييفك ..

بندر: انقلللع لا بارك الله بعدوك وصك الباب وراك خلني انووم

ماجد: هههههههه طيب..

وراح غرفته وقعد يلبس.. ووقف قدام المرايا وقعد يمشط شعره الطويل اللي لاخر رقبته وهو يغني بصوته الخيااااال

انا النهارده صحيت على صوتهااا

الله على ده صووت .. ده كان واحشني مووت

مهي دي اللي كان زمان معاها بنسى كل الناس

قالتلي نرجع بس بشروطها قلت لها متفقين يا ستي وموافقين

ومش هبص لحد تاني غيرك من النهارده ..

وراح اخذ مفاتيح سيارته وساقها للجامعه وهو يدندن بنفس الاغنيه لين وصل لحبيبته بالكافتيريا ..

سميه من شافت ماجد مقبل عليهم بابتسامته الحلوة خذت كتبها ووقفت

رانيا: على وين بالله

سميه : اخليج ويا حبيب القلب.. قالتها وهي تأشر بعيونها على ماجد اللي كل ماله يقرب من طاولتهم

رانيا بتريقه واستحقار: على هووونج بس.. الا حبيب الغبره وانتي الصاجه ..

سميه عطتها نظره وضحكت عليها

ماجد: السلااااااااام

سميه: وعليكم السلام ..

رانيا: ......... ماردت

سميه بنفسها .. واااااااي منه يجنن ياخذ العقل خسارة فيج هالجمال يا رانيا

ماجد وعيونه على حبه وحياته كلها

سميه بمياعه: وشلونك ماجد؟

ماجد وهو ماشال عينه من على رانيا: انا بخير دام حبي بخير

رانيا بلا مبالاة قاعده تكمل القهوة حقتها

سميه: يللا عن اذنكم .. اخليكم الحين ..ومشت

رانيا تاخذ شنطتها وكتبها وتوقف

ماجد: ويييييين

رانيا: لااااااا عقب ما خلصت اشغالك فضيت لي

ماجد : حبيبي غصب عني.. راحت علي نومه والله

رانيا: وين اصرف اعذارك؟ تراها كثرت يا ماجد

ماجد: ياروح ماجد غلطت ومنك السماح..

رانيا تقعد بعد ما سحبها ماجد برقه عشان تقعد وهو يغني لها

اصبر شووووي تكفى

اجلس هنا جمبـــــــــي

مشتااااق لك قلبي

والشووق ما يخفى

في نظرة عيوووني

وكمل بتنهيده اخر مقطع من الاغنيه

وهو يقرص خد رانيا بخفه : ما شفت وشلووووووني

رانيا بدلع: مابي اعرف وشلونك

ماجد: افاااا ليه يابعدهم؟ كل ذا زعل ياروحي

رانيا: يحق لي ازعل ..

ماجد: اسف حبيبتي.. وقعد يراضيها لفتره لين مارضت كالعاده بهديه

الجزء السادس

يوم الجمعه عدى مرره عادي على ابطالنا وماصارت فيه احداث ابد..

يوم السبت

بيت ابو ماجد

كانت ام ماجد صاحيه من الصبح عشان تفطر زوجها وعيالها قبل ما يروحون دواماتهم .. قعدت تدور ببيتها اول شوي تتاكد من تنظيف الخدم.. وبعدين توجهت لغرفة متعب

ام ماجد: متعب

متعب:.........

ام ماجد: يمممه متعععععب

متعب: هممممممم

ام ماجد: قم يمه عشان يمد*ك تفطر قبل لا تداوم

متعب وبصوت كله نوم: شوي يمه شوي

ام ماجد: اي شوي الله يهداك.. قوم

متعب وهي ميت نووم: يمه تكفين بس 5 دقايق

ام ماجد تطلع من غرفة متعب وهي تتحلطم: هذا اللي انا اخذه منك ومن سهرك.. تفرفر لي بالشوارع طول الليل والصبح تعيي تقوم.. مدري كيف تنجح انت وانت اخر سنه وش بتسوي وقت الجامعه الله يهد*ك غصب عليك

غرفة ايان

ام ماجد: يللا اياااان قومي

ايان: مابي اداوم ماما

ام ماجد: اقوول لك قومي وش ما تبين تداومين انتي

ايان: يمه تكفين مالي خلق اداوم اليووم ما عندي شي مهم

ام ماجد: هوو تحسبين حالك بجامعه انتي؟؟ بالمدرسه كل شي مهم اصلا.. يلا قومي لا اوريك شغل الله..

ايان: يمه روحي صحي ليان وبعدين ارجعي لي

ام ماجد: ليان ما عندها دوام الا متاخر.. ماهي صاحيه الحين

ايان وهي شوي وتصيح: ياااااااربييييي يمه مابي ادرس مابي اشتغل مابي يصير عندي مستقبل بصير فراشه زيييييين

ام ماجد بعصبيه: هوووووو .. الله لا يزين للعدو حال انشالله!! انهبلتي انتي ..

ايان وهي تخبط الارض وهي متوجهة للحمام وشوي وتبكي: ياربي القاها منين ولا منين

ام ماجد تض*ب كف بكف: لا حول ولا قوة الا بالله العلي العظيم.. ياربي عيالي **الى على مين مدري ، خليني اروح اشوف الفطور قبل لا

انهبل منهم ...

على الفطور

دخل ابوماجد: صباح الخير

ام ماجد وايان: صباح النوور

ابوماجد وهو يتلفت: اجل وين ليان ومتعب.

ام ماجد: ليان ما عندها دوام الا متاخر ، ومتعب ولدك عيا يقوم

ابو ماجد: هه وش ذا الحكي ما صحى للحين!!?

ام ماجد: لا والله ما صحى عذبني ماهو راضي يقوم

ابوماجد:بروح اشوفه

ايان بشماته:ههههههه احسن يستاهل متيعب ياويله من ابوي

ام ماجد خزتها: وش فيك على اخوك وش سوى لك بعد؟؟؟

ايان وهي تشرب عصيرها: ماسوى شوي بس قاهرني

ام ماجد تهز راسها يأس من بنتها

ربع ساعه لين متعب عندهم تحت

متعب وهي مقفله معه: صباح الخير

ام ماجد وايان: صباح النوووور

ايان:هههههههههههه

متعب بنص عين: وش ذا الضحكه

ايان: احسن تستاهل ما سوى فيك ابوي

متعب: بتنطمين ولا بذا الكوب على وجهك؟

ايان: يمه شوفي ولدك

ام ماجد قاعده تصب لها قهوة وهي ساكته ولا ترد على عيالها لانها متعوده على زعيقهم بالصبح: تستاهلين.. اللي يطق الباب يسمع الجواب

ايان طلعت عيونها: مااماا بغيتك عوون صرتي فرعون!

ام ماجد بحزم: فرعون بعينك يللي ما تستحين ، والتفتت على متعب ,, وين ابوك؟

متعب وهو يشرب نسكافيه: طلع

ام ماجد ارتاعت: وين راح ؟

متعب: قومني.. قعد على راسي ربع ساعه لين صحيت وقال لي بطلع عندي اجتماع مهم الساعه 7

ام ماجد : حسبي اللللله على بليسك من ولد.. ما خليت ابوك يفطر ولا حتى يشرب قهوته

متعب:................

ام ماجد عصبت: عشان لما المره الجايه عاد اصحيك.. تقوم سامع من اول ما اناد*ك سامع ولا لا

متعب: ياربيي وش سويت الحين انا؟

ام ماجد: كل هذا وتقول ما سويت شي؟ نزلت ابوك بدون فطور عشان كان يصحيك وضيعت عليه الوقت

متعب: يمه تكفين والله مصدع يكفي

ايان:ههههههههههه

متعب عصب: انتي لين الحين تضحكين!!! قومي اشوف

ايان :وين؟

متعب: عالمدرسه يللا اشووووووف

ايان بلا مبالاة تكمل عصيرها: لسه ما خلصت فطوري

متعب: عمرينك ما خلصتي .. قومي يللا لا اكب باقيه على ملابسك يللا اشوف

ايان تستنجد بامها بنظراتها بس امها ماعطتها وجه

ايان: يمه قولي شي

ام ماجد:...........

ايان: ماما يعني يرضيك اطلع بدون ما اكمل فطوري

ام ماجد: قوووومي يابنت لسه تبين تفطرين ،الساعه 7 الا ربع وانتي لسه بتفطرين؟ اللي يبي يفطر على رواق يقوم بدري..

متعب: يللا اشوف قدامي..

ايان :............

متعب بصراخ: يلللللللللا

ايان قامت من مكانها بعصبيه بعد ما سحبت شنطتها بقوة وراحت

متعب: مع السلامه يمه

ام ماجد ماردت على احد: جاها صدااااااع من عيالها وحنتهم على الصبح نزلت راسها وهي حاطه يدينها عليها

ام ماجد: ماتيييلدااا .. جيبي بندوووول صكووووا راسي..

بالسياره

ايان: مسوي رجال هاا

متعب: رجال غصب عنك يالبزر .. احترمي نفسك احسن لك

ايان: انت البزر.. وماصدقت وكبرت .. لكن انا اوريك

متعب: ايان انطمي لا وربي ما اجيك واخليك تنلطعين بالمدرسه لحالك .. نسيتي نفسك انتي؟ تراني اكبر منك عيب عليك

ايان بتحدي: كانك رجال على قولتك سويها

متعب: والله بتندمين ..

=-=-=-=-=-=--=-==-=-=--=--=-=-=-=-

بيت ابو بندر

ابوبندر قام من الصبح .. ونزل تحت قعد بالصاله يشرب قهوته ويقرا جريدته.. كان متعود على الهدووء

سمع فجأة صوت بزر يبكي جاي من احد صالات الفيلا .. قطب ابو بندر حواجبه

هذا صوت سلطان...

وقام بيشوفه

لاني: come here soltan

سلطان يبكي : no

لاني: yalla soltan

سلطان بصراخ اكبر وببكى: noooooooooooo

ابو بندر بحنية: سلطان

سلطان وعيونه مليانه دموع التفت على مص*ر الصوت .. الصوت هذا ما تعود يسمعه كثير بحياته بس يعرف انه كلما يسمعه يلقى الامان والوناسه .. ضحك من بين دموعه ونادى وهو شاك بشخصية الانسان اللي قدامه

سلطان: بابا ؟؟؟؟؟؟

ابو بندر: اي حبيبي تعال.. وفتح له حضنه

سلطان راح يرككككض لين وصل حضن ابوه وقعد يكمل بكى

ابو بندر يمسح عليه بحنان: ايش في بابا؟

سلطان: بابا لا تروح ..

ابو بندر حزن على ولده .. عياله الباقين شابعين من حنانه الا سلطان اللي ما كان يشوفه الا كل فين وفين.. حس انه مقصر بحقه مررره خصوصا انه فاقد حنان الام بحياته بشكل واضح ...

ابوبندر للمربيه: وش فيه سلطان؟

لاني: ما يبي اكل ولا يبي نوم

ابو بندر اشرها لها تنصرف واخذ ولده لحضنه وقعد بالصاله

ابوبندر: ليش حبيبي ما تبي اكل؟

سلطان : مابي

ابوبندر: شبعان؟

سلطان: لا جوعان

ابوبندر ضحك بخفه على ولده: جوعان ليش ما تاكل حبيبي؟

سلطان: انا ابي اثوف التيفي واكل بث لاني تقول لا

ابوبندر بنفسه: حسبي الله عليك يا فوزية.. لو انك مهتمه للولد كان مارميتيه للخدم اللي يعبرون ويدبرون فيه على كيفهم

سلطان: بابا

ابوبندر: عيون بابا