#الضياع

الحياة الجديدة

#الضياع.. ٤

قصه سماره@

..

احلى ايام قضيتها بـلبنان ببيت خالة حنان

والكل يعاملني بمحبة وعطف

زينه تاخذني لغرفتها دائما تخليلي كحل ومكياج من أغراضها الخاصة وبعدين نروح سوة نغسلة ونبقى نضحك ونتسلى بس اني عيوني كبار وملونه يبين بيهن الكحل ماينمسح بسرعة واطلع غير شكل

اشوف الشغلة حلوة عجبتني سالفة المكياج لذلك تعلقت بزينه تمنيت تكون اختي بالحقيقة وابقى وياهة بنفس الغرفه ..

لحد مايوم عرفت حليمه اشترت بيت قريب عليهم

ظليت ابجي ماريد اعوفهم كم يوم قضيته يمهم تعودت عليهم

حسب ماسمعت منهم انهم معتقدين اني بنتها لحليمه من زوجها عبد الستار

والكل حاسبني منهم مايعرفون اني ضايعه وغريبه عنهم يعني ماما حليمة ما حجت الحقيقة كلها

اعتقد بس اختها حنان تعرف ..

بعد ماقررت ماما حليمه ننتقل ببيت وحدنه مااكدرت اعوفها لماما وابقى هنا

وعدوني راح يزوروني ونتلاكة بالمدرسة سوة لأنها مدرسة مختلطة وخاصة سمير بنفس المرحلة وياي

بعدين اضطريت اجمع ملابسي وانطوني غراض وال**ب اخذتهم وودعتهم ورحت بس جنت مقهورة وبداخلي فراغ وحزن لفراقهم

وصلنه عمو سعدون ودخلنه للبيت اصغر من بيت خاله حنان

بس حسيت بماما حليمه مستقرة اكثر وفرحانه مهما يكون بيت اختها بس صعبه من زوجها واحنا طولنه عليهم

بعدين بمرور الأيام

فتهمت كلشي من ماما لانها دوم تحجي وياي وتسولفلي

وعلمتني شغلات هواية جنت مااعرفها من قبل

وبعد كم يوم مرت سجلنة بالمدرسة نفسها ووعدتني ماما ننروح سوة لان گدرت تشتغل معلمة بنفس المدرسة ويانة الله شگد فرحت لأن راح ارجع اشوف بسام وسمير بس زينة بغير مدرسه لان اعدادية وطلاب كبار

قضينة الاجازة نطلع نفتر ببيروت تجنن الهوى والشوارع والجو كلشي بيها حلو ومميز وهماتين نروح سينما وأماكن حلوة ونتسوگ ونزور خاله حنان بليل

حياتهم حلوة ألفة ومحبة وبساطة وبما أنهم

كلهم يقضون النهار كله بالدوام فبليل يجتمعون سوة على العشة وبنهاية الاسبوع هم نجتمع مرات نطلع لمناطق جبلية باردة وحلوة لو يم البحر بسيارة عمو سعدون ياخذنه كلنه ..

صدوگ احس بنفسي تعودت عليهم واشتاقلهم ولااصبر على فراقهم

احساسي ووجودي ويه العائلة كلش مميز تغيرت تصرفاتي وتغير تعاملي ويه الناس بعد ماجنت اكره الاختلاط واخاف من الآخرين

بدت الدراسة واكيد لازم اجتهد وادرس ويه سمير جان كلش شاطر بنفس المرحلة وياي ونفس الصف وماما حليمه هماتين يمي بالمدرسة ماعافتني وتدرسني مرات لو ندرس سوة بس اني وسمير

الحلو همات المدرسة جبيرررررة كلش مو مثل مدارس العراق خنگة وخرايب

وطلاب من كل المراحل مختلطة ومؤدبين ونظيفين وعدهم نظام وترتيب

حتى بسام جانت آخر مرحلة ويانة وبعدها يروح للثانوية بمدرسه زينه

جان الملاك الحارس النه لأن سمير ضعيف الشخصية وخواف لدرجة وباعتبار مختلطة واجهنه صعوبات بس بسام يساعدنه ويدافعلنه

مرة جنّه بالحديقه بساحه المدرسه اجه بسام شافنه نبجي اني وسمير

طلاب من مرحله ثالثه اكلوا اكلنه واحذوا العصير مالنه

بالفرصة

ركض بسام وراهم **رهم ت**ر واشتكو للادارة خطية بسببنه حصل اهانه من المدير

رغم هذا الموقف ظل مستمر يحمينه ويراقبنه

واشوفه كلش شجاع وقوي الملاك الحارس

وجان طويل وحلو بشكل وصوته خشن ..

احلى ايام دراسه قضيتها

بالتعب والبرد والمطر

كلش حلوة جانت

والكريسماس الله نقضي سوة والعلاقه العائليه اللي بيننا كلش مميزة الكل يعتبرني بنت خالتهم ويعاملوني معامله خاصة

واكيد ايام السعاده والراحة قليله وتخلص بسرعه

بعدها عرفت بحليمه انها تعرفت على معلم بمدرستنه اسمة

استاذ (عماد) عراقي بالمدرسه مالنه وجبير بالعمر شعرة ابيض مو كلش طويل

وهو على اساس يحبهّة

بس ماما حليمه احلى منه لأنها شگرة وبيضه وبعدها شابه وجانت انيقه وملابسها كلش حلوة دائما اكلها ماما اشتريلي ملابس مثلج

حتى اصير جبيرة

تضحك وتكلي ماما الكبر مو بالملابس من تصيرين بالجامعه وتتخرجين وتصيرين عروس تكبرين ..

اصفن ...

الله ..

كلامها شكد حلو ..

كلهن اريدهن يصيرن من اكبر ..

أكبر واصير بالجامعة واتزوج..

انتبهت بالدوام اشوفه لمعلم عماد يهتم بيها لماما بشكل خاص

ويسولفون دائما سوة

وبعدين بالفرصه اشوفها تقضي وقتها كلة وياه دائما وبمرور الايام بدت تعزمه عدنه على بيتنا لو ببيت خاله حنان ويرحبون بي كلهم

خاله حنان فرحانه بي واشوفها مهتمه بالموضوع

تفاجأت !!

حضر ليله الكريسماس بحفلتنه العائليه ببيت خاله حنان والكل مجتمع وهدايا محضرين هدايا واكل حلو وشجرة الأرز مثل عادات اللبنانيين والمسيح

بعدها ماعجبتني السالفه وبديت اغار منه لهذا عماد

واشوف ماما حليمه تهتم بي اكثر مني

ولازمته من ايده وعايفتني

من رجعنه للبيت صارحتني ماما وكالت راح اتزوجه

وهنا انصدمت !

زعلت كلش وماحجيت وياهة

للصبح تريكنه وصار حديث بيننا..

سماره بنتي اني عشت حياة صعبه وماتوفقت بزواجي الاول وظليت ارمله مدة طويلة ومادخلت احد بحياتي لان ماعندي مجال وتجربه وحدة سدت نفسي

انتي هسة عمرج ثمان سنوات وواعيه واني احبج ومااستغني عنج وعماد يعرف انتي بنتي بالحقيقه مو غريبه

جنت مدنكه واهز براسي واسمعها بس كلش ضايجه

شالت راسي بيدها

سامحيني سماره لازم التفت لنفسي واعيش حياة جديدة ويه عماد ..

فرصه مااكدر افوتها وتدرين شكد ضيعت فرص بحياتي ..

بعدين شفتها بجت

وكالتلي سمر اني دائما افشل بالاختيار وماجربت اعيش تجربه الحب ..

مسحت دموعها وحضنتني ..

اوعدج ماعوفج بس كم يوم

من اسافر اسبوع لباريس اتزوج عماد هناك ونرجع نعيش سوة

شلون !

واني ابقى وحدي !!

ضحكت

لاماما

حتسكنين ويه خالتو حنان

شبكتني

تمنيتها متروح

بس ..

حسيت الموضوع جدي وحسيت بنفسي لازم اتنازل علمودها خطيه حليمه شنو ذنبها تعيش وحيده ولو مافهمت شنو قصدها بالبداية بتجربة الحب بس شفتها متأثره كلش

واكيد مراح تعوفني

وافقت وتحضرت اشترتلي ملابس جديدة وبدله بيضه وحذاء بيضه حلوة عجبتني تخيلت نفسي (سنو وايت)

سوينه حفله صغيرة بالبيت وبعد ماتمموا زواجهم سافروا لباريس

اني ظليت ببيت خالتي حنان

اكيد احب أبقى ويه سمير وبسام وزينه

وعمو سعدون كلش سبورت ومثقف

دائما يقرة جرايد ومجلات لو بالشغل

مرّ الأسبوع

حسيت بفراغ جبير وجنت مشتاقة لماما حليمه كلش رجعت لبيتنه بس ماما لاتصلت ولا اجت خذتني

زينه قررت تاخذنه لمدينه ملاهي عدهم ويه بسام وسمير نتسلى واعتقد يحاولون ينسّوني ويشغلّوني عن ماما

رحنه بالباص وتونسنه كلش احلى لحضات وال**ب جديدة اشوفها بس بالكارتون

صعدنه بالقطار وسفينه وسلك متحرك وكلشي كان حلو وممتع وأحلى نزهه

رجعنه بليل هلكت من التعب نمت ماحسيت الا الصبح بدلت وتريكنه سوة خاله حنان كالت ماما سماره دانروح لبيتكم نسلم على ماما

ركضت شبكتها وفرحت

صدك خاله !

شكد مشتاقه لماما ..

يتبع..

قصة سماره@