الفصل الثانى
2076 Words
الفصل الثانى
رواية قصه عشق الجزء الثانى
بقلم / سحر ف*ج يوسف
♡♡♡♡♡♡♡♡♡♡♡♡♡♡♡♡♡♡♡♡
كل اللى كانوا موجودين اتصدموا تانى من قرار الحاج صفوان ده وبالذات عدى وفهد اللى الصدمه لجمتهم ومقدروش ينطقوا ولا يقولوا بم حتى .. وخدوا بعضهم وخرجوا على بره فى الجنينه .
واول لما خرجوا الحاجه انعام بصت لجوزها وقالت .. حرام عليك كده يا حاج ... شباب وغلطت وماتوصلش انهم يناموا فى الزريبه مع البهايم .. انت قلبك كبير سامحهم المرة دى يا حاج علشان خاطرى.
الحاج صفوان بغضب...........
صلاح هو اللى رد عليها وقال .. الحاج صفوان عنده حق يا حاجه .. العيال دى عاوزة تتعلم الادب من اول وجديد واحنا فعلا معرفناش نربيهم .. مش كفايه حسرة البنات اللى قاعدين فوق وزعلهم ونومهم لوحدهم من غير عرسانهم ليله دخلتهم .
وبص لفاتن مراته وقال .. اطلعى يا فاتن ينوبك صواب وشوفى البنات واطمنوا عليهم زمانهم زعلانين اوى هما الاتنين الله يكون فى عونهم وربنا يعوضهم خير باذن الله على اللى حصل من البلاوى دى .
وفعلا فاتن بحزن ردت وقالت: الله يكون فى عونهم زمانهم يا حابيبى زعلانين اوى اوى الله يسامحك يا عدى انت وفهد الله يسامحكم . وخدت بعضها وطلعت على فوق علشان تطمن على البنات وعلى حالتهم .
الحاجه انعام بصت لقصى وسليم وفارس وابتسمت وقالت .. صباحيه مباركه يا عرسان يا زينه الشباب .. معلش العيال العفشه دى واللى هببوه نسونى اقولكم صباحيه مباركه يا حابيبى والف مبروك ليكم وعليكم .
سليم راح بكل حب وحنيه وحضن جدته ورد وقال .. الله يبارك فيكى يا جدتى .. ربنا يخليكى لينا وما نتحرمش منك ابدا انتى والحاج صفوان كبير العيله .
قصى قرب هو كمان وباس ايديها وباس راسها وبعدها حضنها ورد وقال .. الله يبارك فيكى يا روح قلبى ربنا يخليكى لينا ويطول لنا فى عمرك يا قادر يا كريم ويد*كى طوله العمر انتى وجدى الحاج صفوان .
فارس بكل حنيه قرب وحضنها وباس ايديها ورد وقال .. الله يبارك فيكى يا جدتى وربنا يخليكى لينا يارب .
انتى وجدى الحاج صفوان كبير عيله السيوفى كلها .
الحاجه انعام بحب وعيون فرحانه بيهم وبكل حنيه ردت وقالت .. ربنا يخليكم يا حبايب جدتكم وافرح بيكم وبعوضكم عن قريب بأذن الله.
يالا يا حبيبى انت وهو كفايه عليكم كده .. ومعلش صوت جدكم وزعقيه مع البهيم عدى وا****ر فهد صحاكوا من عز نومكم ونزلكوا على ملى وشكم .. اطلعوا على اوضكم زمان البنات قلقانه عليكم ومش عارفين ينزلوا .. واستريحوا و فوقوا كده كلكم والفطار هايطلع لحد عندكم فى اوضكم يا عرسان .
قصى رد وقال .. لا يا جدتى هاننزل كلنا ونفطر مع بعضنا زى كل يوم .. حد يطول يلاقى لمه عيله زى دى والحب ده ويقول ليها لا ده يبقى حمار فعلا .
الحاجه انعام ابتسمت وقالت .. ما اتحرمش منكم يا قلب جدتك وربنا يفرحكم ويسعدكم قادر يا كريم .
بعدها الشباب كلهم خدوا بعضهم وطلعوا على فوق وكل واحد فيهم راح على اوضته عند عروسته وقفل الباب وراه .
فاتن كانت طلعت زى ما طلب منها صلاح ودخلت الاول على الاوضه بتاعه ملك علشان تطمن عليها .. بس اول لما دخلت اتصدمت لما لقيتها نايمه على السرير بفستان فرحها زى ما هى .. فاصعبت عليها اوى اوى وقعدت جنبها وبدأت تصحيها بشويش بكل وجع وحزن .. وقالت : ملك .. ملك يا حبيبتى .. فوقى يا قلب امك انا عارفه كل ده كان مكتوبلك فين بس يا حبيبتى .. فوقى يا حبيبه قلبى فوقى انا جنبك .
ملك بدأت تفوق وتفتح عنيها وقالت .. ايه بس يا ماما عاوزة انام شويه سيبينى انااام اصل ما نمتش طول الليل .
كنت مستنيه ......... !!
وفجاه افتكرت ان امبارح كان يوم دخلتها هى وفهد وافتكرت لما دخلوا الاوضه وقفلوا الباب وشويه وعدى خبط عليهم وفهد استاذن منها ونزل معاه وفضلت كتير مستنياه لحد ما راحت فى النوم بفستان فرحها ودمعتها على خدها .. وبصت لأمها بذهول وبكل حزن وقالت ... هو فهد فين وليه مجاش بات معايا يا ماما ؟؟؟؟ مش انا وهو اتجوزنا والمفروض ننام مع بعض فى اوضه واحده وامبارح كان فرحنا ودخلتنا .. وبدموع بصت لامها وقالت .. اوعى يكون فهد رجع فى كلامه يا أمى اوعى وحياتى عندك يكون مش عاوزنى وجدى غصب عليه يتجوزنى اوعى يا امى .
فاتن صعبت عليها بنتها و**رة قلبها فى ليله زى كده وردت وقالت .. اهدى يا حبيبتى اهدى يا بنتى واطمنى محصلش اى حاجه هو بس فضل سهران مع عدى لحد الصبح وجدك وجدتك لقوهم نايمين تحت على الكنب بتاع الصالون وزعق ليهم وطردهم من السرايه كلها عقابا ليهم.. وقرر يعاقبهم انهم يناموا من النهارده فى الزريبه مع البهايم علشان اللى هببوه امبارح وبالذات معاكى انتى وهدى علشان سابوكم لوحدكم فى ليله فرحكم وعلشان القرف اللى دخلوه سرايه الحاج صفوان السيوفى وشربوه .
ملك بصدمه بصت لوالدتها وقالت .. انتى بتقولى ايه .......
وقبل ما ملك تتكلم كانت دخلت الحاجه انعام علشان تطمن عليها هى كمان وقربت منها وقالت .. صباح الخير يا ملك يا بتى . وانا عارفه انك زعلانه وجيت اقولك حقك عليا انا يا نور عينى وقربت منها وخدتها فى حضنها وبصت لها وقالت .. احب اقولك ان جدك خد لكم طاركم من البلاوى دى وهايعلمهم الادب من اول وجديد علشان يحرموا يعملوا كده تانى ويغلطوا غلطه زى دى.
قومى يا حبيبتى وغيرى فستانك ده وامك معاكى اهى هاتساعدك وانا هاروح اشوف هدى اللى قاعده لوحدها من امبارح هى كمان واخدها فى حضنى والله يكون فى عونكم يا حبايب جدتكم .
فاتن بصتلها وردت وقالت .. خليكى يا حاجه وانا اروح لها بنفسى دى هدى بنتى برضه زيها زى ملك بالضبط وانتى عارفه انا بعزها اد ايه وعمرى ما فرقت بينها وبين ملك بتى.
الحاجه انعام ردت وقالت .. لا يا فاتن يا بتى انا اللى هاروح لها يا حبيبتى وخليكى مع ملك انتى هى محتجاكى دلوقتى تكونى جنبها وتخديها فى حضنك .
فاتن ابتسمت بكل احترام وادب وردت وقالت .. اللى تشوفيه يا حاجه انعام .. وانا هاخلص قعدتى مع ملك واروح لها على طوووول متقلقيش .
الحاج انعام ردت وقالت .. ربنا يباركلى فيكى يا حبيبتى.
وفعلا قامت الحاجه انعام وخرجت من الاوضه وسابت فاتن مع ملك بنتها وقفلت وراها الباب وراحت لاوضه هدى اللى كانت اوضتها جنب ملك على طول وفتحت الباب ودخلت وقفلت وراها .
واول لما دخلت صعبت عليها هدى اوى اول لما شافتها نايمه على الكرسى بفستان فرحها .. فقربت منها وفضلت تبص ليها وفى ملامحها البريئه ودموعها غصب عنها نزلت
وقالت .. واخده نفس ملامح نعمه بتى الله يرحمها يا حبيبتى وانتى نايمه والظاهر كمان هايكون حظك عفش زيها بالضبط .. ومدت ايديها على شعرها برقه وقالت .. امك وحشتنى اوى يا هدى .. كان نفسى تكون موجوده فى يوم زى ده وتفرح بيكى وبأخوكى سليم كان زمانها فرحانه اوى اوى يا حبيبتى وطايرة من كتر الفرحه .
هدى من صوت جدتها ولمسه ايديها لشعرها فتحت عنيها بشويش واستغربت وجود جدتها انعام اودمها وعدلت نفسها وقعدت وقالت .. جدتى .. انتى بتعيطى ليه يا حبيبتى حصل حاجه ولا ايه ؟؟
فى حد حصله حاجه يا جدتى؟
وفى لحظه افتكرت اللى حصل معاها امبارح وخروج عدى من الاوضه وبصت على نفسها ولقت نفسها لسه بالفستان بتاع الفرح .
وقالت : جدتى فى ايه متخوفنيش وفين عدى مرجعش من امبارح زى ما وعدنى ليه مش دى ليله فرحنا والمفروض يكون معايا زى اى عريس وعروسه يا جدتى؟!
الحاجه انعام بكل حزن ووجع مسحت دموعها وبكل حنيه شدت هدى لحضنها وقالت .. متخافيش يا قلب جدتك من جوه .. كلنا بخير وعدى كمان بخير .. كل الحكايه ان ا****ر ده .......
وبدات تحكى لهدى على كل اللى حصل من عدى ومن فهد بوم فرحهم وعلى عقاب الحاج صفوان ليهم هما الاتنين .
هدى بغيظ ردت وقالت .. بقى كده يا جدتى .. عدى وفهد عملوا كده .. ماشى .. ماشى يا عدى .. انا هاوريك هدى هاتعمل فيك ايه .
علشان تبقى تسيبنى فى ليله زى كده ابات فيها لوحدى وتنزل تشرب القرف اللى انتم شربتوه ده .. وحياتك عندى يا عدى لاهوريك مين هى هدى .
الحاجه انعام ردت وقالت .. جدعه يا هدى يا بتى .. انا خوفت لا تزعلى وما يعجبكيش حكم جدك وعقابه ليهم .. بس طلعتى جدعه وقويه زى جدتك انعام وانا اللى بقولك اهو .. عدى ده لازم يتربى من اول وجديد وانا اهو اللى بقولك الواد ده مش هايتربى غير على ايدك انتى فاهمه يا هدى .. اوعى تضعفى اودامه ويضحك عليكى بكلمتين وتسامحيه بسهوله .. طلعى عينه الاول علشان يعرف قيمتك ويعرف انه غلط لما سابك فى يوم زى ده البهيم ده .
هدى بكل قوة وكرامه ووعيد ردت وقالت .. متخافيش عليا يا جدتى .. انا الجرح اللى جرحه ليا فى الليله دى .. عمرى ما هاقدر انساه طول عمرى .. انا هاوريه مين هى هدى الجبلاوى بنت صالح ونعمه الله يرحمهم.
الحاجه انعام بحنيه ردت وقالت .. ايوا كده انا اهو اللى بقولك خدى حقك منه وعلميه الادب .. ودلوقتى يا حبيبتى قومى وغيرى فستانك وادخلى الحمام وخدى حمام دافى كده والبسى وانزلى لينا على تحت كلنا مستنينك انتى وملك علشان نفطر مع بعضنا كلنا زى كل يوم .
هدى اتن*دت وقالت .. حاضر يا جدتى .. هاخلص الحمام واروح لملك اوضتها واجبها وانزل ليكم على تحت على طول اطمنى .
الحاجه انعام .. اسيبك بقى يا بتى واروح استعد علشان اقابل الناس اللى هاتيجى تبارك للعرسان فى الصباحيه كمان شويه .. وزمان اهل ضحى هايجولها بالصباحيه علشان يطمنوا عليها ولازم اكون فى استقبالهم زى ما انتى عارفه عوايدنا كويس يا حبيبتى .
وعلشان خاطرى يا هدى .. اوعى تجيبى لحد منهم سيرة على اللى حصل من عدى وفهد امبارح فهمانى يا حبيبتى مش ناقصين فضايح من حد بين الخلق .
هدى خدت نفس طوييييل وقالت .. فهماكى يا جدتى متخافيش .
وقامت الحاجه انعام وخدت بعضها وفتحت الباب وخرجت من الاوضه وسابت هدى لوحدها ونزلت على تحت .
هدى قامت وقفت وراحت اودام المرايه وشافت نفسها بفستان الفرح وقالت .. ماشى يا عدى .. ماشى يا ابن خالى اما خليت ايامك الجايه كلها سودا مبقاش انااااا هدى الجبلاوى .
وفى الزريبه وفى وسط البهايم بعد ما الحاج صفوان طردهم من السرايه .... كان قاعد عدى وفهد ومش طايقين نفسهم هما الاتنين وعمالين يتخانقوا ويرموا الغلط على بعض فى اللى حصل معاهم امبارح .
فهد بكل عيظ بص لعدى وقال .. الله يخرب بيتك يا شيخ انت السبب فى كل اللى حصل معايا ده .. انت اللى جتلى وختنى من عروستى ونزلتنى على تحت عند رفاعى .. انا كان مالى بيك وباللى كنت عاوز تعمله .. عاوز تشرب وتعمل دماغ كنت روحت انت وعملت لوحدك ومالكش دعوة بيا يا عم .. تقول عليا ملك ايه دلوقتى بعد ما سيبتها فى ليله زى كده لوحدها الله يخرب بيتك معرفتك يا شيخ .
عدى بعصبيه رد وقال .. بقولك ايه انا مش ناقص مش كفايه جدك واللى عمله معانا .. هو انا كنت ضربتك على ايدك ياض انت وختك بالعافيه من عروستك ... ما انت اللى سمعت كلامى ونزلت على طول معايا وروحنا لرفاعى وجبنا الازايز وشربنا لحد ما روحنا فى النوم وكنت كل لما اقولك كفايه يا فهد كده وتعال نطلع للبنات زمانهم قلقانين علينا تقولى الكاس ده وبس ونطلع على طول .. صح ولا انا بكدب يا عريس الغفله .
فهد بزعيق وبكل عصبيه رد وقال .. انا برضه اللى قولت كده ... ما انت كمان من اول كاس شربته وقولتلك كفايه كاس واحد ويالا نطلع او انا اللى هاطلع وخليك انت وكمل شرب .. وانت اللى مسكت فيا لحد ما اتنيلنا وفضلنا نشرب لحد ما نمنا زى البهايم على راى جدك صفوان .
عدى بغيظ رد وقال .. خلاص اد*ك اعترفت اهو فماتقولش انا السبب ماشى يا اسطى وسيبنى بقى فى القرف اللى انا فيه ده .. زمان هدى بتقول عليا ايه دلوقتى انا كمان ؟
فهد بصله بقرف وقال .. هى هدى لوحدها . قول زمان ملك هى كمان بتقول عليا ايه انا كمان دلوقتى ؟
عدى بص حواليه وعيونه جت على البقر والجاموس اللى موجود فى الزريبه وقال .. هو احنا فعلا هانام هنا زى ما الحاج صفوان قرر مع البهايم دى وهانفضل بلبسنا ده ؟
فهد بص حواليه ورد وقال .. انا عارف يا اخويا ما انت اللى عارف جدك كويس ودماغه والكلمه الى بيقولها مابيرجعش فيها تانى ابدا واحمد ربنا انها رسيت على كده وبس .. الدور والباقى فى البنات يا ترى هايسمحونا على اللى احنا عملناه ده ولا لاااااا .
عدى رد وقال .. هى ام الحواديت اللى عملت فينا كده .. الله يخرب بيت الحواديت وسنيننهااااااا .
وفجاه ...................
يا ترى ايه اللى حصل تانى مع عدى وفهد ؟
تواقعتكم ايه ؟
ويا ترى هدى وملك هايعدوا اللى حصل ده بالساهل ؟
وحشتووووونى كتييييير .
عاوزة تعليقات ولايكات كتيييييير ورونى انا وحشتكم اد ايه .
عاوزة رايكم فى الفصل ويا ترى عجبكم زى الجزء الاول ولا لا ؟
ياريت متابعه صفحتى على موقع دريمى ليصلكم كل جديد فور نزوله من الروايه وتدوسوا على القلب لمتابعه الروايه.
#روايه_قصة_عشق2
#بقلمى_سحر_فرج
دمتم بخير حبايب قلبى❤❤❤❤❤❤
- Writer
