Naalimpungatan si Calix mula sa pagkakahimbing. Paglingon niya sa kama ni Yñigo ay wala ito. Napatayo siya sa pag-aalala dahil baka nagpuntang CR ang lalaki ng mag-isa. Pupunta na sana siya sa CR nang may mapansin sa ilalim ng pinto ng kuwartong kinaroroonan nila. Tila may nasuksok sa ilalim niyon. Dahan-dahan siyang nagpunta sa pinto at binuksan iyon. Kinabahan siya sa nakita subalit napalitan din iyon ng galit. Mabilis niyang dinampot ang sobre. Katulad na katulad iyon ng sobreng natanggap nila noon. Mabilis niyang inilabas ang laman ng sobre at hindi nga siya nagkamali. Larawan muli nila ni Yñigo ang naroon. Subalit sa pagkakataong iyon, hindi na siya nakaramdam pa ng kaba katulad noon. Handa na kasi siyang malaman ng kaniyang ama o kahit ng lahat ng tao ang tungkol sa kanila ni Yñigo.
