صرخات محبوسة

النهاية

النهايه ..

بعد المخده من على راسه كال عوفيني زهراء اني ابتعدت عنج حتى لااتصرف وياج موخوش تصرف

كتله يعني تحبني وماتريد تأذيني اني اشتاقيتلك احمد ..

- الي سويتي بيه موشويه مااله داعي تذكريني بالماضي الاسود على كولتج خليتيني اندم

وسكت ماكمل .. كتله تندم على شنو تندم عليه هاا دار الي ظهره ورجع المخده على راسه ونام ...

اني نار ومشتعله بيه .. معقوله كرهني ؟!!! معقوله الهالدرجه حقد عليه .. ؟؟؟!!

بعدهه صرت اني اتجنبه وابتعد عنه .. وصرنا بالبيت مثل الاغراب .. بس ابد ماارتاحيت افكر خاف يطلكني .. واكضي اليوم كله بجي ..

مرت الايام واني تعبانه كلش فد يوم اجه وكال زوج اسماء جاي من العمره ولازم اروح الهم .. كتله ماشي بدلت ملابسي ورتبت نفسي وطلعنه بالسياره طول الطريق ساكتين .. وصلنه لبيتهم .. و**موا اله نبقى على العشا .. والكل جان هناك العائله كلها ملتمه ..

بوقت تحضير العشا كلنا احنا البنات رحنا للمطبخ نساعد اسماء. وبينما اني دا ارتب الصحون اجت اسماء يمي كلتلي اي زهراء شون جان الوضع بالسجن سمعنه جنتي مسجونه .. والكل ظل يباوع عليه .. بأي حق تسألني هيج سؤال وهي منو اصلا حتى تكولي هيج ومنو كال الها اني جنت بسجن...

مجاوبته كلتلهم اترخص اني اروح اغسل .. ورحت للمغسله ودموعي ظلت تنزل متت من قهري فتحت الماي وصبيته على وجهي واختلط وي دموعي رفعت راسي اشوف وجهي بالمرايه .. كل المكياج راح. وعيوني صارن حمر رجعت اغسل وجهي سمعت صوت يمي باوعت ايلين واحمد جاي يريد يغسل الها حتى ميباوعلي ويحجي وي بنته ويدلعها ابتعدت عن المغسله بطريقه خاطفه .. ورحت بالممر صار مقابيلي الدرج كعدت عليه وطلعت كلين** .. امسح وجهي ودموعي ..

كملت سفرة العشا ورحنا كعدنا ناكل اني نفسي انسدت كعدت بصف احمد وهو يخلي الاكل كدامي واني ابعده اتظاهرت بانه اني جاي اكل بس مااكلت شي .. وهو انتبه عليه ..

قبل لنروح للبيت واحنه واكفين بالباب احمد شال ايلين كاللهه تروحين وياي هي تباوعلي خايفه وايدهه بحلكها وتكوله لاء لاء . الكل انتبه عليه حتى احمد ظل يباوعلي مكدرت احجي ولا حرف الموقف الي اني بي لااحسد عليه ..

ودعناهم وطلعنه .. صعدنا بالسياره وطول الطريق اني عيوني ع الجامه وابجي ..

وصلنا للبيت هو نام واني بقيت كاعده ساعه ابجي ساعه ساكته .. صار مقابيلي تليفونه اخذته اني اعرف الرمز مالته .. صرت اقلب بي شفت مسجات من رقم مامحفوظ بأسم والصوره صورة ايلين فتحته شفت مسجات دتتوسل بي كاتبه اله ..

احمد ارجعلي والله ندمانه ميته ميته الخاطر بتنا ارجعلي محتاجتنا سوى عوف هي خريجة السجون والي متخلف والناس كلها دتحجي عليها ..

بس احمد ممجاوبهه بولا حرف توقعت يخابرها رحت على المكالمات هم ماكو مميخابرها ..

ساعتهه هي لو يمي اله اكطعها اخذت الرقم خليته بجهازي .. ورجعت تليفونه المكانه ..

ورحت نزلت جوه اتصلت بيها اريد افرغ شكو بداخلي من الم وضيم بيها .. جاوبت بمياعه الووو

كتلهه اكولج عوفج من زوجي ولتحرضي عليه تره كل محاولاتج فاشله احمد لايمكن يرجعلج سمعتي ؟؟

ظلت تضحك كالت مثل ما رجعت بنتي الحضني سهله احمد ارجعه

- لا بأحلامج ولا بأوهامج سمعتي انت خاينه والخاينه متستاهل فرصه ثانيه

- نعم نعم منو كلج اني خاينه تره احمد كذاب اني لا خنته ولا ابد هو شكاك ومريض بعدج مشفتي شي منه ..

- كذابه كذابه امشي يله ولي وسديته بوجهه . باوعت اشوف احمد طب عليه .. ضميت التليفون ورايه

ظل يباوعلي وعيونه مشبعانات نوم .. كال وي منو دتحجين ؟؟ كتله مو ويا احد وكمت من القنفه اريد اروح لزمني قوي من ايدي كال جيبي التليفون

- وخر ماانطيكيا

- جيبي كتلج بصياح .

ضميته ورايه .. اخذ ايدي ولواها وض*بني على كتفي سحب التليفون مني بكل قوه وشمرني بالارض كعدت ابجي ولزمت كتفي متوجعه حيل من ض*بته ..

باوعتله وايدي ع المكان اليوجعني كتله تض*بني احمد ؟؟ وتشك بيه موو .. هو بقى واكف ويقلب بالتليفون .. بعدهه وجه التليفون الي كال هذا شنو رقم مها شيسوي يمج وليش متصله عليه ..

- ليش تحجي تحجي عليه يمك ؟؟

- وانت منو سمحلج تتصلين عليها ترخصتي مني ؟!!

- ليش تض*بني هاا

كمت وكفت كباله اض*ب على ص*ره واصيح اكوله خو اني مو مها الي تستر عليها على مود بنتك اني حتى طفل ميصير عندي حتى تستر عليه اذا اتهمتني

لزم ايديه قوي شنو هالحجي هذا ؟؟

- مها تكول انت جذاب وتهمتك الها باطل

- تصدكين مها وتكذبيني ؟؟

- لعد شنو هذا تصرفك ويايه ..

- سألي نفسج انت جنتي بوضع مثير للشك شوفي تصرفاتج وين دتوصلنه

ترك ايدي كال كعدي وي روحج وشوفي نفسج انت صح لو خطأ وتركي عنج سوالف مال زعاطيط

وراح صعد فوك ..

بقبت وحدي ابجي .. وايدي توجعني وصدك ظليت افكر اني غلط لو صح والي سويته هذا صح لو غلط .. ماادري شوكت نمت بالهول .. والصبح كعدت هو ماكو . بقيت ساعه صافنه ومخليه ايدي على ايدي خدي

بالمطبخ ومحتاره شسوي راحه ابقى هيج خاضعه اله والتصرفاته .. ونوب يض*بني .. لازم اتصرف اعتذر اله واذا بقى على حالته وتجاهله الي اتصرف ..

بعدهه فكرت لا كافي خضوع وذله اعتذرت اله هوايه

والبارحه ض*بني وأذاني مستحيل اتنازل اكثر ..

رحت للغرفه فوك وفتحت الكنتور .. وطلعت جنط مال ملابس اثنين وعبيتهم بملابسي ..

وخليتهم يم الباب .. وكبال عينه .. الظهر اجه واني بالمطبخ اجه يمي كال شنو هي الجنط وبيهم ملابسج

گتله حضرتهم اريد اروح لأهلي

- ومنو راح يوديج ؟؟

- راح اخابر اخويه يجي عليه

تقرب عليه وخله شعري وره إذني كال راح تروحين زعلانه ؟؟

- كتله اجه موعد الدوام واريد ارجع اداوم

- مو كلنه نأجل هالسنه والسنه الجايه يصير خيير

- غيرت رأيي واريد اداوم

- زين حضري نفسج اني راح اوديج لأهلج روحي ارتاحي يم امج ومن ترتاحين اني اجي عليج ماشي

- سكتت ومجاوبته وصعدت للغرفه وبدلت ملابسي وكل شي جاهز بالنسبه الي .. هو هم بدل ملابسه اجه يمي كال وادويتج مراح تاخذيهه وياج ..

كتله ميحتاج واخذتهم كلهم وشمرتهم بالزباله ..

كال روحي نزلي جوه يم السياره هسه اجي

اخذت وحده من جنط الملابس ونزلت بيهه جوه خليتهه يم السياره ورجعت على الثانيه شفتهه بيده وهو نازل الدرج .. عفته ورحت للسياره صعدت كدام وهو خله الجنطه وهم دخل كال مستعجله مو مجاوبته ودرت وجهي على الجامه .. ودموعي نزلت كوه كدرت احبسهه .. ليش هيج يسوي بيه ..

الطريق منحجي كله ساكتين .. تمنيت يكولي لترحين حتى ارجع ويا بس ماكال .. وبقيت احبس كلشي بداخلي ..

وصلنه البيت هناء وهناك امي .. استقبلونا وبعدها احمد ترخص وكال اني راح اروح كم يوم اجي عليج مردت ابين كدامهم احنه زعلانين كتله ان شاءالله وراح .بعدها كضيتها سوالف وي امي كلش مشتاقه الها للمغرب يلا كمت . طببت جنطتي الغرفة امي والجهال اريد اطلعلي ملابس اللبسهم شفت الدوه مخلي وي ملابسي طلعته .. ابتسمت حسيت باهتمامه .. فتحت التليفون واصلني مسج منه

لتنسين متاخذين علاجج.

ياالله فدوه اكيد يحبني حتى لو متزاعلين ميكرهني حتى لو جرحته .. ترددت بين ارد عليه وبين لا بس لازم انطي درس حتى ميض*بني بعد اني مو ذيج زهراء الضعيفه هسه كلشي تغير.

وحتى اقلقه عليه غلقت تليفوني ومافتحته .

مر الليل كله ماتواصلت ويا بس بكلبي نار شوق اله يحسسني بالالم لان اني بمكان هو ماكو بي ومااشوفه ومااشم عطره كلش اضوج ..

مر يومين عليه واني يم امي والضوجه واصله حدها واكل بس قليل عمود العلاج .. اجه ابراهيم وشفته كال عبير تريد تشوفج امشي ويايه مجان الي خلك كتله مو اليوم غير مره تعبانه شويه ..

كال براحتج ..

جنت كاعده بالحديقه لان كلش اختنك اجت هناء كالت هذا ابراهيم على التليفون يريدج .. اخذته منها وجاوبته

- الو

- هاا زهراء رجلج يسأل عنج .. ويكول تليفونج مغلق شسالفه ؟؟

- ماكو سالفه بس نسيته بلا شحن

- زهراء اكو شي شبيكم انت واحمد

- ماكو شي ابراهيم ليظل بالك

- خوش اذا اكو شي احجي مفهوم

-ان شاءالله

- وهسه شحني و خابربله

- اي ماشي الله وياك ..

سديته وديت التليفون لهناء ورحت على تليفوني فتحته واني اضحك واريد استفز احمد اكثر ..

طلعت رقمه وخابرته .. بس دك جاوبني سمعت صوته شكد مشتاقتله ..

- الو شلونه الحلو

- زينه

- ليش تليفونج مطفي ..!؟

- مالي خلكه

- ها هيج صارت ؟

- اي

- شوكت اجي عليج؟ تره طولتي هوايه مداتحمل ..

- كتفي بعده يوجعني من الض*ب مالتك من اطيب عود تعال

- زين تعالي يمي وابوسه الج مية بوسه ميطيب ؟

- لاء

- امممم احبج

- الي يحب حبيبته ميقسى عليها

- انت جبرتيني اتصرف هيج

بقيت اجاوبه ببرود حد ما مل وسدينا .. رغم شكد جان حنين صوته اليه بس اني ادوس على كلبي اريده يتعدل ويايه ..

يوم ثاني اجه ابراهيم وكال امشي ويايه لبيت عبير انت وامي .. هي عازمتنه .. رحنا ويا وبالطريق سألني اكو شي بينج وبين رجلج وظل يلح كتله لا ماكو شي بس هو يريد تأجيل هالسنه من الكليه واني مااريد

- هذا مو سبب حتى تزعلين منه وتطفين تليفونج كعدي وتناقشي ويا .. كتله خوش يصير خير .

رحنه البيت عبير وتغدينا البنات جانن فرحانات بيه وكالوا ابقي وبقينه عدهم ليله وحده . والصبح رجعنه جانت هناء مريضه مااعرف شبيهه .. رحت يمها بالغرفه ماالهه خلك كلش كتلهه ليش ماتخابرين ابراهيم يوديج يشوفج طبيب ..

- ليش هو ابراهيم اله خلكي اصلا ضايج مني

- وليش ضايج منج انت شمسويه ؟؟

ظات تبجي .. كالت

- مو اني شاكه بنفسي حامل وهو الهالشي ضايج

- ياصدك الف مب**ك ان شاءالله خير

- يمعوده ياخير اخوج مايريد هذا الطفل حتى لاتزعل عبوره الروح والريه مدام هيج يحبها من يزعل وياهه يجي عليه واني مااخذت احتياطاتي وصار حمل ..

- بقيت صافنه بوجهه اني ابجي ليل نهار حتى يصير

عندي طفل وهي تبجي لان حامل هسه شيصير لو اني حامل مجان احمد ض*بني وبقى زعلان مني ..

العصر اجه عليهه اخوها وداها تسوي تحليل حمل ومن اجت ضايجه كالت حامل وطبت بالغرفه .. ماطلعت منها بعد قهرتني ..

خابرت ابراهيم كتله هناء حامل

كال منو كلج

- اليوم اخذهه اخوها تحلل

- اي وشنو يعني

- وشنو شنو يعني تعال طيب خاطرها بكلمه اسأل عن صحتها كول الها شتردين شنو مشتهيه هي هم مرتك..

- هسه ماتكليلي شلهه بي مو عدهه تلاثه المن هذا مصرف زايد ..

- يمعود يجي ويجيب رزقه ويا هي نعمه انت شتحجي .

- اي عود اجي الله كريم

سديته منه وانداريت اشوف هناء ورايه يمكن سمعت كل الحجي كالت ليش حجيتي ويا مدام مايجي من ذات نفسه ليجي ولااريد اشوفه ..

رحت يمها كتلهه لا تكولين هيج هسه شويه شويه يكبر البيبي ويظل يريده ويتعلق بي ..

هزت راسها كالت ان شاءالله مشكوره ماقصرتي الله يرزقج الذريه انت هم ونفرح بيج .. ضحكت كتلهه ان شاءالله احس الد عوه طالعه من كلبها .. رجعت للغرفه والعصر اجه ابراهيم وجايب حبشكلات لهناء ودخل وياهه بالغرفه ..

بالليل .. فتحت التليفون شفت مسجات اول شي من اسماء فتحته كاتبتلي رزاله جريده هاا اذا انت موكدها ليش ورطتي الولد وياج ليش عايفته وشصاير بي مهموم وحتى لحيته مطولها فوك ماقبل بيج حتى خلفه متخلفين وطالعه من سجن وأرمله مع الاسف متستاهلينه كومه بنات ماتن عليه وكلهن مابيهن عيب مااتورط اله بيج عساج مترجعين ان شاءالله ..

اني اقرا وابجي وجسمي كله ظل يرجف هي شبيهه ليش هيج تكرهني بالله ليش اباوع لامي غافيه هم زين حتى لتشوفني ابجي ..

اشوف مسج من مها بعد هي شتريد خل افتحه ظلت عليهه خليهه تكملهه عليه .. بهالليل الاسود المصخم .

فتحت المسج كاتبتلي ضحكه طوييييله

ههههههههههههههاي مو كتلج يشمرج بأسررع وقت ويبدلج مو بوحده بألف ومرده الي اني ام بنته واعرف شون ارجعه الي ..

هي منين طلعتلي .. بقيت مشتعله بنار الحيره والغضب منهن اثنينهن شون اثنين هنه ماقهرني غير كلام اسماء ليش هيج تكرهني ممسويتلهه شي انه

ماارد عليهن احسن شي اخابر احمد يجي عليه وا**ر خشومهن لا لا مااتنازل اله بعد ماض*بني اشعلهه بيناتهم اني مو رخيصه حتى اخته تعيرني بهالطريقه المهينه خلي ادز مسجاتهن سكرينات لأحمد

دزيتهن وويا مسج كتبتله شوف منين اتلكاهه اني منك من طليقتك من اختك .. حسبي الله ونعم الوكيل

دز بس مسج (اني اتصرف) ..

نمت والدمعه بعيني هي اسماء هيج تعيرني .. اني ممسويتلهه شي ولا جبرت احمد يختارني .. بالله مها متهمني اني اكبر من ان اهتم الكلام وحده خاينه مثلها بس اسماء اه اسماء . الصبح اجت ريمه توعيني عمه كومي عمو بالصاله يريدج .. رحت للصاله فتحت الباب صار بوجهي بس احمد حضني قوي .. وكال يبوو والله مشتاقلج حضنته اني همين احس بحرارة حضنه شكد مشتاقتله هسه عطشانه وارتويت ..

كعدت يمه وتصالحت ويا وسالني اذا دااخذ علاجي كتله اي ومجبنه سيرة اسماء ولا مها كتله مجوعان اسويلك ريوك كال اي جوعان

رحت سويت اله ريوك واكلنه اني ويا شكد مشتاقين الكعداتنه .. كال يله هسه اروح روحي جهزي اغراضج

ماعاندت لان اريد ارجع ويا اولا مااريد اخسره ومشتاقتله واريد اشوف مها واسماء اني مو مثل ميكولن ..

كلت لامي امشي ويايه كم يوم ونرجعج اني واحمد كالت لا حبيبتي من يصير عندج طفل اجي ابقى شهر عندج تدرين بحالة هناء هسه هم تحتاج ابقى يمها كتلهه ميخالف .. انطتني جرعة امل بس سمعت منها هالكلام ورحت خابرت ابراهيم كتله راح ارجع

كال الله وياج ديري بالج على زوجج وبيتج .

وطلعنا بعد ماودعناهم ..

ووصلنا البغداد مرت الايام ومضت اليالي على خير استمريت بالعلاج ..

اسماء انقطعنا عنهه احمد متعارك وياهه .. والبنت الي تشتغل وي احمد .. تزوجت وتركت الشغل ويا واجه واحد ثاني يشتغل كان ولد مو بنت وارتاح قلبي

بعدها صار عندي اعراض حمل وحللت وصرت حامل الفرحه مجانت تنوصف ابد اكثر من فرحتي بيوم حفلة المهر جانت .. مرت الاشهر واسويت سونر وبيه بنت واحمد هو اختار الهه اسم نرمين كال على وزن الين ..

بهالفتره مها تخبلت مسجات تدز الي ولاحمد متجوز تكوله رجعني والين حالتهه مو تمام متستجيب للدوه ابد .. واحمد محتار شيسوي وي الين الي متعلقه بأمها هوايه .. خابرتني لمى كالت تره مها دتخبث هوايه متنطي الدوه لألين وتحجي بـأذنهه عليج تكوللها مرت بابا شريره وبس ترحين وياهه تض*بج وتحجيلهه قصة سندريلا وتطلعها الها تشوفها. كولي لاحمد عليهه كتلههه مااكدر اني هم راح اصير ام وخايفه لااحمد يحرمها منها ومحتاره شسوي .. '

كالت اني راح اكول لأسعد هو يكول لأحمد على سوالفهه .. وبالفعل اسعد وصل الحجي لاحمد وكلام لمى طلع صحيح مها متنطي الدوه لأيلين حتى تتمرض وهي تتقرب لاحمد من خلال مرضها ..

احمد منع مها من شوفة الين .. وبقت يم امه كلما اروح الهم يحاول احمد يقربني الها متريدني كلش تتنهزم مني تروح تختل ..

مرت اشهر الحمل بسرعه جان احلى احساس لم تتحرك الطفله بداخلي كلش افرح بيهه ويروح خوفي عليها ..

صرت بالشهر الاخير من الحمل .. الثقل والتعب زاد واحمد بالنهار كل شويه يتصل واذا نايمه وماارد اشوفه يمي يبوسني يكولي خفت عليج .. لاصار بيج شي واني مو يمج يريد يوديني يم اهله بس اني ماارد اللتقي باسماء اضوج منها بعد الكلام الي سمعتنيا ..

زادت الامي ووياهه زاد الشوق لاحتضان بنتي لاول مره .. زمن ولدت قبلي بهوايه اولاد اثنين .. وهناء ولدت ولد سمته على اسم المرحوم اخويه اياد ..

فد يوم اجه احمد ضايج كلش ومعصب كتله شبيك كال مها ماخذه الين من البيت وممرجعتها لهسه

- شون اخذتها انت مو منعتهه من شوفتهه ..

- لجج متدرين بيهم يسوون كولشي من ورايه اني اله افضحها يلا اتوب ..

- اهدأ حبيبي ان شاءالله ترجعها يعني وين تاخذهه

- ادري بيها تريد تضغط عليه حتى ارجعها بس بأحلامها ارجعها

وطلع ورجع بالليل عيونه براسه ومعصب كلش كال الهسه مارجعت .. رحت البيت اهلها هم ميدرون بيها وين ماادري متفقين وياهه واخذوا بنتي ..

كعدت يم رجليه اواسي وهو كلش ماله خلك .. واني ولادتي تأخرت خلص شهر التاسع واني ماولدت وهو محتار يدور بنته ليل نهار واني محد الي ..

الى ان حسيت الطفله حركتهه قليله جنت احسب الها حركاتهه هسه متتحرك من الصبح لليل ماكو اليوم

خابرت احمد ابجي كتله احمد الطفله ابطني متتحرك شوفلي حل ..

- ليش محجيتي من الصبح هسه يله تحجين يعني اني هم هي الطفله تردين اخسرها بعد ماخسرت الين

- لا حبيبي ماتخسر الين ترجعلك ان شاءالله

- حضري نفسج هسه جاي اوديج للمستشفى ..

- ماشي ..

اني جنت محضره جنطة المستشفى وكل شي ربع ساعه واجه .. بالليل ساعه 9 وصل هو وامه واسماء وياهم .. تفاجئت من شفتها .. رحت وي احمد فوك نجيب الجنطه كتله شعجب اسماء اجتي

- رحت لامي حتى اجيبها ونوديج هي جانت هناك واعتذرتلي وكالت تجي ويانه خاف تحتاجين شي وامي متكدر لوحدهه

- احمد اني خايفه منها

- لج لتخافين قابل شراح اسوي هي حبيبتي

وبوسني وحضني

اني جنت ميته خوف لا بنتي بيهه شي ورحنا للمستشفى وكالوا ضرور ولاده صناعيه لان فايت موعد ولادتي بقيت الليل كله بالمستشفى وللصبح يلا ولدت واني بعز الالم ادعي لاحمد يلگي الين وترجعله لان اشوفه منتهي من الحزن عليها اما بنتي جتي تعبانه وشاربه مي خلوهه بالخدج حتى ماشبعت منها رأسا اخذوها مني متت من البجي وماما ام احمد يمي واسماء واحمد يم نرمين الصغيره .. الحد ماصارت زينه وطلعنا بيهه للبيت .

جنت فرحانه بيها كلش حتى احمد رغم حزنه وضيكة خلكه كل شوي يجي يمهه ويباوعلهه ويجيك وضعها خاف تتخربط .. اسماء بقت يمنه ونضفت البيت وطبخت وغسلت الملابس شكلهه متندمه على الي سوته وافعالهه ادت الى الي سوته مها ومتريد تخسر احمد لان هو جان ضايج منها ..

كلولي نامي وارتاحي ولتهتمين الكل شي .. خابرت امي فرحت كلش وكالت راح تجي يمي هم اذا كدر ابراهيم يجيبهه .. سديته منها ونمت كعدت على صوت نرمين تبجي بحظن ماما اخذتهه منها حتى ارضعها .. كلتلي احمد عرف مكان مها

فرحت كتلها صدك

- اي ابيت وحده من صديقاتهه بأطراف بغداد بيتهم

- الحمدلله شلون عرف مكانها

- اخوها تعاون ويا لان يعرف اخته طايشه وهسه راحوا يجيبوها ..

حمدت الله وشكرته خطيه احمد تعذب هوايه مها هواي اذته شسوت بي .. ميستاهل الديصير اله ..

المغرب وصل احمد وياه الين بس حالتها يرثى لها بس تبجي .. حاولوا يسكتوها متقبل الى ان نامت ..

مرت الايام وكبرت نرمين ..

الين بقت مبتعده عني متريدني .. مرات يجيبهه احمد ومتقبل تبقى تروح البيبيتهه ..

عرفت من احمد مهدد مها اذا تقربت من الين يفضحها لان هو محتفظ بكلشي يخص خيانتهه ..

بعدها ماما ام احمد رادت تسافر للعلاج هي وابو احمد والين لازم تبقى عدنه واجت يمنه حاولت اتقرب الها بشتى الوسائل بس نرمين ماخذه كل وقتي

وبهالايام صارت حالة الين احسن شويه اخليهه تلعب يم نرمين واني يمهم اسويلهه الاكلات الي تحبها..

ونلعب سوه تقريبا نظرة الخوف الجنت اشوفها بعيونها مني تلاشت .. مره جانت تلعب بتليفونها واجت شوف*ني فستان ل**به هي متحجي هوايه بس اشرتلي عليها عرفت عجبها دورت بالسوك ملكيت مثله .. اشتريت نفس الاقمشه من التول والستن والكيبور ونفس الالوان وخصصت وقت اله حتى اخيطه اريد احسسها اني مهتمه بيها هي جانت تجي يمي وانطيهه قصاصات من الاقمشه تلعب بيها وعرفت اني الي خيطته الها وبكل مرحله اوصل بيها بالخياطه اجربه على جسمها تفرح وتبوسني برقه وانتهيت من خياطة الفستان كلش فرحت بي وحضنتني حييل وظلت تحجي ويايه كالت خيطي لدادا هم قصدهه على اختهه كتلهه ماشي .. مرت الايام وعلاقتي بيها زادت حتى صارت تصيح الي ماما .. احمد كلش فرحان بعلاقتنه وتطورها ..

صار عمر نرمين 8أشهر وحسيت بتعب وظليت استفرغ شكيت بنفسي حامل .. ياا شراح اسوي اذا طلعت حامل منين اجيب وقت ونونه بعدهه زغيره

رحت حللت وصدك حامل .. احمد كال بعد مراح اشوف منج شي كتله لا لتخاف انظم وقتي بين الاهتمام بيك وبنرمين وايلين ..

ومن رحت اخذت سونر انصدمت جان احمد ويايه ينتظرني وخلينه البنات يم امه ..

طلعت أشر اله بيدي وبرقم اثنين كال شنو اثنين گتله بيه اثنين توم .. ض*ب كصته بأيده وضحك كال جنتي الليل كله تبجين تردين طفل هسه هاج استلمي

جان كلشي مقدر ومكتوب ماانتبهت ولا اخذت احتياطات كل الي ابالي بعد ميصير طفل بس صار الي صار وهذا رزق من الله ولااعتراض على اي شي يجي من رب العالمين بكل الاحوال ..

مرت الايام وجانت امي تجي تبقى يمي وحتى تبقى شهر يلا تروح وتداريني لان توم ونونه تحتاج اهتمام وحتى ام احمد هم مقصرت ويايه ولا لمى وزمن وحتى اسماء الجانت تكرهني الله سخرهم الي وعاونوني والاكثر منهم احمد جنت اشوف بي الزوج المخلص والحبيب الاقرب الى قلبي من كل شي بالدنيا الله رزقني بي بعد طول معاناة وصبر واذيه ووحده ووياه 3بنات وولد

الين هالطفله الي اشبه معاناتهه بمعاناتي انظلمت من امها الي مافكرت بيها بيوم وخلتها تتعب وتتمرض ويزيد عليها المرض اني اخذت بيديها وصرت الها ام والتزمت بعلاجها جنت ابديها على كل اطفالي لان اريد احسسها اني امها واني احبها بقت امها تبجي دم على احمد وعلى ايلين وتجي للبيت حتى تشوفها بس ميقبل احمد يريد الين تنساهه ..

اما اطفالي الي الله رزقني بيهم بعد طوول انتظار

نرمين ونيفين وتيم كله احمد يختار الاسماء محتكرهم اله يكول تيم معناه اقصى درجات الحب وهذا الي وصلنا اله ومايفرقنا بس الموت ..

شكد عشت تعيسه شكد سمعت كلام من جنت وي حسام شكد عيرني متلحكين نسوان اخوتي بالخلفه اتمنى هو عايش بس لحتى يشوف السعاده الي اني بيها بين اطفالي وزوجي ..

عشت سنين وحيده اريد طفل يملي عليه وحدتي بس تأخرت وتأخرت وكله بي حكمه من الله والحمدلله ..

انتهت ..

الخيااااانه وباء العصر المتفشي .لم اجد سببا مقنعا لها.

قلة الايمان قلة التربيه وسوسة وغرائز الشيطان انعدام الحياء والضمير كلها اسباب لم اجدها مقنعه ابد

فلايوجد هناك سببا للخيانه الا المرض فالخائن مريض ولاغير ذلك .. بعض النساء يبتليها الله بزوج مهمل خائن اناني بخيل رغم غناه والبعض منهن تلجأ للانتقام منه وذلك بأن تقيم علاقه مع غيره انتقاما منه ولكنها لاتعلم بانها انتقمت من نفسها أذت نفسها اكثر .. ربما تنكشف وتخسر شرفها سمعتها اطفالها وحتى حياتها وهو بأقرب محكمه يطلقها ويتزوج الاحلى والاجمل منها من دون ان يقال عنه خائن لاننا مجتمع ذكوري يجيز للرجل كل شيء رغم ان الاسلام حدد جريمة الزنا للمراه والرجل المتزوجين عقوبه واحده وهي الرجم لكن في مجتمعنا هل يعاقب الرجل كعقاب المراه الجواب لا ..

اما من جاهدت نفسها وصبرت وتحملت سنوات من المعاناة والالم فلها اجرها عند الله وسيعوض الله صبرها خيرا ..

واما من خاف مقام ربه ونهى النفس عن الهوى فإن الجنة هي المأوى ..

تحياتي واشكر صبركم وتفاعلكم مع القصه والشكر موصول لكل الذين ساعدوني واخص بالشكر الصديقه زينب الزيبدي ??