صرخات محبوسة

شكوك

بارت 19

#صرخات_محبوسه

نورا ناصر

من اخذت رقم مرت ضياء دزيته واني متردده لأحمد خايفه

كتله شراح تسوي احمد ..

- خايفه لاانسق وياهه لو شنو

- كلشي يصير

- اي بعدج ماالج ثقه بيه مو ؟ بس لتخافين اني راح احذرها اكوللهه تره رجلج شايفله شوفه ويريد يتزوج عليج وبما انه هو مو رجال من تصرفاته اكيد مرته مسيطره عليه ويريد يلعب بذ*له من وراها فخليهه تضبه شويه ..

- ماشي خنشوف شراح يصير والله ميته خوف وشكد كرهته

- هسه يله كرهتي ؟؟؟

- هسه اكثر من قبل

- جان مضايقج متحرش بيج مأذيج بس كولي ؟؟

- لا لا ماكو هيج شي اطمأن اني يصيحولي غير مره احاجيك ماشي ..

- دائما تتهربين مني حسره عليه وياج الحجايه اريد اشوف تاليهه وياج بس خلي اجيبج يمي ويصير خير

- هههههه يلا احمد باي

- باي

بعدهه تواصلت ويا دقايق معدوده جنت اضوج احاجي هوايه بنفس الوقت احتاج اله كلما تعبتني الدنيا .. وجنت مصره ابقى بعينه صعبة المنال ..

دزيتله مسج وكتله شسويت بالموضوع كال كل شي تمام .. مااعرف ليش جنت واثقه منه ..

وراهه بعدة ايام وقت الظهريه عبير توهه وصلت للبيت من دوامها واني جاي اتحضر اروح للكليه . اندكت الباب لا مو اندكت وانما اندفرت دفر تعجبنا طبوا علينه نسوان اثنين وكلبن البيت بالعياط ..

وحده منهن لزمت عبير وهدت عليهه ولج تردين ضياء يتزوج عليه وتخطبين اله ومنو هي المصكوعه خريجة السجون.. يمه وجتي عليه ها تردين تاخذين رجلي خرابة بيوت لزمتني من ملابسي وظلت تملخ بيه .. ضخمه كلش صرت كدامها مثل العصفور عضيت ايدهه يله وخرت مني ورجعت تريد تنهشني بس عبير والثانيه لزموها واني انهزمت للغرفه ميته خوف .. وقفلت الباب .. واباوع الوجهي مخرمش ملابسي شصار بيهه الله لاينطيهه شبيها هي يمه وحش وحش بعدهه سمعت صوت عياط اكثر وصوت ضياء هم .. وبعدهه حل الهدوء طلعت اشوف شكو شفت عبير كاعده بالهول وحالتهه حالهه كتلهه خير منو هي .. كالت اووو ولج هي مرت ضياء ومااعرف شون واصل الهه خبر ضياء خاطبج ويريد يتزوج ..

كتلهه ياا وهسه

- اخذهه ضياء وراح والله يعلم شراح يصير هناك الله يستر من اهلهه كلش موخوش سالفه

- لعد هو منو كللهه يريد يتزوج

- ماادري شوف منو هو الله يسلمه مايكعد راحه اكيد حاجي كدام احد واصل الهه الحجي ..

كتلهه اي ورحت دخلت بالغرفه وافكر شون اذا كشفونه اني واحمد وعرفوا بمخططنا لزمت التليفون وراسلته كتبت اله

تعال احمد انت شسويت .. وبقيت لازمه التليفون انتظره يرد

(انت جُزء لطيف التجئ إليه كُلما أتعبني العالم.)

دقايق ورد عليه

- الله يستر هم مصيبه جديده وسببها اني كولي شعندج ؟؟

- هي مرت ضياء اجت هجمت عليه وض*بتني

- لا ياابت الللل ليش ؟؟

- غير من وراك انت ليش تكوللها اني الي راح يخطبني

- حتى يفك ياخه منج وميحاول وياج بعد وهم تصير حجه الج ترفضي وهم خلي يكون الموقف كدامها حقيقي حتى توكف زوجها عند حده وهو هم يلتهي وياهه ويعوفج اوضح بعد لو كافي ؟؟

- ولك ض*بتني جنها وحش جيت اموت بيديها

- اسم الله وانت شبيج ماتدافعين عن نفسج لو كدرتج بس عليه اني المسكين

- اي عضيتها

- ههههه هو هذا الي الله قدرج عليه

- كله منك احمد انت السبب

- هسه لو رجال ضاربج جان بيهه مجال اكدر اخذ ثارج منه بس هي مره يعني عركة نسوان فمااكدر اتدخل بعد بس اريد تخليني بالصوره شيصير وياج گوليلي

- ليش بالله

- اوووو اجيبج يمي ويصير خير

- شكد واثق من نفسك

- بشكل مراح تتوقعين شكد وكتلج من قبل اني زلمه وراح احافظ على حبي ولو ممقتنع بلي سويته وي زوجة هذا الللل وعندي اساليب ثانيه بس اخاف عليج

- واستمر يضحكني واني اسوي نفسي معصبه عليه وضايجه منه وابيع ثگل بس ميته ضحك على سوالفه وكاتمه الضحك حتى لحد يسمعني بقيت اليوم كله ابتسم من اتذكر كلامه وحتى نسيت هجوم هي المهجومه ..

بعدها ضياء بطل يجي يمنه كلش ولا وصل وتركني بحالي وعرفت من عبير د*كمل بيته هنا وزوجته موافقه تجي يمه .. بعد ماتدخلوا اهلها وخوات عبير وكلولهه انت السبب عايفته حقه يدور على غيرج وعبير هم فهمتها بانه اني رافضته اصلا ومااريده عاد هي اجت واعتذرتلي واعتذرت من ابراهيم لان هجمت علينه .. كتلها اعتذارج مقبول وبداخلي اكوللها بس الزمي الكلب مالج اذا لزمتي كلشي بخير ولو هو ميستاهل الكلب اشبهه بي ...

الحمدلله الي الله خلصني منه ..

مرت الايام وهم قطعت التواصل وي احمد ومره فتحت مسجاته لكيت كاتب الي ادري بيج متسألين بس اني هالايام راح اتوقف استراحة مقاتل مثل ميكولون امي مريضه وراح اخذها اسفرها تسوي عمليه بالخارج ومن ارجع عود اقاتل على مودج ماادري اقتل ؟!!! قهرني خلاني الليل كله ابجي عليه تمنيت اني يمه واوكف ويا بس مو بيدي شي عليه مرت الايام وهم تواصلنه انعدم ماادري بشنو ملتهي بس ادخل على بروفايله اشوف اصدقائه ناشرين عن بنته مريضه وتعبانه جنت محتاره بين اواسي واوكف بجانبه وبين ابتعد عنه خاف اتعبه واتعب ..

بس ماكدرت اتجاهل آلامه واسكت لازم اوكف ويا بطريقة ما .. راسلته كتبت اله شلونك شنو اخبار بنتك وامك .. سامحني احمد يمكن مااصير من نصيبك بس راح اوكف وياك كصديقه مثل ماطلبت مني اول مره وابقى الجانبك بكل الاوقات حتى وان كنت بعيده عنك ..

بعد ماادري شكد رد عليه بس هوايه طول ومو من عوايده عرفت حييل مشغول ..

- زهراء عندج حجايه بيهه خير تكولينهه كولي معندج اسكتي احسن انت بهيج مراح طيبين جرحي ولا تسكنين المي راح تزيدينه اضعاف وكتلج راجع وراح ارجع اقاتل حتى احظى بيج .. ليش عدنه حرب ضحكت عليه وجاوبته وسألته عن بنته گال

- والله تعبانه حييل صايره كلش حتى اكل متاكل عايشه ع الادويه وصايره عصبيه وكلشي متقبل تسوي لا تسبح ولاتغسل ولاتغير ملابسها ..

- ليش هيج صارت شبيها

- ليش اكو غير امها السبب

- يعني هي تريد امها

- انت لتشغلين بالج بهالامور اني اكدر احلها انت احجيلي عنج من زمان ماعرفت اخبارج

- اني زينه ونجحت

- صدك وراح تداومين السنه الجايه هم

- اي ان شاءالله

- اوكي خو مااكو عريس جديد

- لا ماكو اطمأن

- اهم شي هاي اني احبج زهوره وراح ابقى احبج انت جنتي الي علاج وراح تبقين بس احل مشاكلي ارجع اتقدملج ..

- احمد اني

- اشش انت بس اسكتي واني اتصرف ..

مجنت اعرف شراح يسوي وشون يتصرف بس راد عناوين اقاربي وعمامي واني انطيته الهم لان واثقه من الي جاي يسوي ..

جانت تمر عليه الايام ممله ماكو شي جديد كله بالبيت بس للسوك اطلع او اروح لأمي وانام بحضنها مثل الطفله واكوللها بس ادعي الله يحقق الي ابالي جنت اريد احمد وماارايده شي سواه ..

كل دعائي جان اله احس كل لحظه تمر بدون مااحاجي تخنكني واضغط على نفسي واللتهي عنه وافتح واشوف كومه رسائل منه يشرحلي عن حاله وحال امه وبنته جنت اكتب اله واواسي .

ورجع مره ثانيه تقدم الي وهم رفضه إبراهيم وظل يحجي عليه وفتش بتليفوني ويراقبني فتره

ومن جهه احمد عصب كلش وظل يهدد واني اصبر عليه واكوله اعقل اني مستحيل اتزوج غيرك .

بسرعه مر الوقت وداومت مرحله ثانيه وشارفت على الانتهاء وتقريبا بشهر 4 اندكت الباب وطلع إبراهيم

جانو جايين النه عمامي ولدهم وهم

كعدوا يتناقشون والباب مسدوده عليهم .. غريب امرهم هم ميجتمعون اله بالمناسبات او الاعياد و مو يمنه ابيت عمي الكبير .. جيتهم محيره ..

تقربت اكثر لغرفة الخطار اسمع صوتهم واحد منهم يحجي مااميزت صوته ومنو هو بس يگول بعد عليمن مبقيهه يمك ارمله صارلهه سنتين والناس بالحالتين راح تحجي تحجي وتسكت .. اسمع واحد ثاني يگوله تره هو خوش ولد ورايدهه وكم مره اجاني للعياده واني اوعده اتصرف بس ماصارتلي فرصه اجي الهنا بعد الحاح منه اجلت شغلي و اجيت احجي وياك بالموضوع..

واحد ثاني يكوله ..

انطيهيا تره رايدهه هو ومتلكه احسن منه خاصة بعد التهمه الي توجهت الها ودخلت السجن منو راح يتقدم الها بعد .. ؟؟

عرفت الحجي عليه تركت المكان الي اني بي ورحت للغرفه .. كعدت ع الجربايه وصافنه ومية سؤال يدور براسي ..

بقيت شاكه هم عن منو ديحجون عن احمد لو غيره

والله اذا مو هو مااريد اتزوج لو شميصير ..

اجت ابالي افكار خفت لا هذا المزعج ضياء رجع ورايدني هم ..

بعدها راحوا وابراهيم موجود بالبيت حتى اخاف اسأله اواسأل عبير لان كل شويه يمهه هو بالمطبخ

وحالته متغيره يباوعلي نظرات غريبه و طلع بالحديقه يدخن .. اعرفه من هيجي ضايج

رجع كال نطيني تليفونج عندي شغله بي رحت اجيبه اجه ورايه .. كال يولي ميحتاج وراح ..

اني كلش تحسست وضجت حييل يعني شنو مايأمن بيه بس هم حقه الي سمعه عني مو شويه زين وخلاني اعيش حياتي مثل العالم والناس واكمل دراسه ..

وبقت ابالي كلمة أرمله وشعدك مخليهه هيج الارمله هم على قلب اهلها بغض النظر عن خطبة أحمد الي بس هالكلام يضوجني احس بأن اني اقل شأن ومنزله عن بقية النساء بقت هي الكلمات تحفر بقلبي ..

بعدهه داومت ورجعت للبيت وكعدت وي عبير وسألتهه عن الي إجو عرفت من بين الجايين ابن عم ابويه دكتور وساكن بغداد وعرفت احد داز الهم ناس حتى يقنعون ابراهيم ..

.. العصر كلش ضجت وخابرت ابراهيم يوديني يم امي محتاجتلهه اريد احجي واطلع الي بكلبي نتر بيه وكال شعدج رايحه كعدي وسكتي اني اجيبهه يمج .. كتله ماشي وكعدت وحدي بالحديقه اريد ابجي مخنوكه ماكدرت ابجي الي بيه اكثر مما اتحمله بالبجي .. الزم التليفون اريد احاجي احمد بس ماريد بين الااريد والمااريد اثنينهن يوجعني ..

بالليل اجه وجايب امي ويا .. بعد العشا دخلنه اني وياهه للغرفه وكعدنا وحدنه ..

خليت راسي على رجليها وظليت ابجي .. ظلت تمسح على راسي وتگول يمه اسم الله الرحمن شبيج احد وياج .. رفعت راسي والدموع تنزل من عيني كتلهه لا تعبانه ماما

- منو متعبج مرت اخوج ماتريدج اخوج مأذيج بس كولي. .

- لا ماما بس اكو واحد خاطبني ويريدني وابراهيم مديقبل بي ولزمت ايدهه كتلهه ادعيلي اصير من نصيبه وبوست ايدهه ..

كالت وانت تردينه يايمه .. هزيت راسي وبجيت وكلت بغصه اي .احبه. واحس الصوت كوه طلع صدك اختنكت .. هي جانت المره الاولى الي افصح عن مشاعري كدام احد حتى لو كانت امي مكايلتلهه على حبي لأحمد وحتى أحمد مگتله اني احبك بس گتله اي يعني اعترفتله بحبي اله لكن بطريقه سطحيه جدا ..

كعدت ماما تدعيلي وگتلها على جية عمامي وبعدهه نمنه والصبح كعدت على صوت حجي .. امي تحجي ويا ابراهيم ومن صباح الله ..

تكوله ليش لازم قسمة البنيه وماتنطيهه وهو عله صوته كال اني لازم قسمتهه لو اخاف عليها من الحجي وظلوا هو وامي يداهرون واني بقيت واكفه وره الباب واعصر بأصابعي ومتوتره كلش واخاف حتى اطلع فضحتنه نبع الحنان فديتها يايمه موهيج هي خررب .. وبهالحظه اسمع صوت ابراهيم يصيح بأسمي زهراء وينج زهراء ..

رحت اجر خطواتي جر ماابدي امشي واوصل يمه

بس مجبوره وصلت واحجي وابلعم كتله نعم كال اسألج بالله زهراء اني لازم قسمتج ولج اني على مودج حتى الناس لاتحجي عليج وخاصة هذول حازم ووسام ..

اني ماادري منين اجتي الشجاعه وجاوبته كتله ليش هم الناس تاركيني بحالي ؟ اشو حجوا ومكالوا كافي وبعدين هو بس خوان حسام اليحجون اشو حتى زوجة اخو مرتك هم حجت حتى ولد عمامك هم حجو عليه يعني من مااتزوجه راح يسكتون ؟؟ اني راح يرافقني الحجي عليه هذا طول عمري .. سواء تزوجته او لاء

- انت تردي كولي الصراحه تردينه انت

- الـ اي بطرف ل**ني بس مااعرف شون اطلعها سكتت شويه وهو ظل يعيد عليه السؤال تردي تردي كتله اني راح ابقى طول عمري على كلبك لان محد يتزوج وحده مثلي زوجني اله واخلص مني ماادري شون كلتها ورحت اركض للغرفه واحس كلبي ينبض بس مو بجسمي .. احس نبضاته قريبه السمعي واخلي ايدي ع وجهي وافشلتاه اني شلون تجرأت وحجيت هيج بعد اتوبه اذا اباوع بوجه ابراهيم ..

رجعت اتسمع الهم ديتناقشون بهدوء مو مثل قبل شويه عبالك يتعاركون .. رجعت كعدت على السرير

وادعي خير الله ان شاءالله يارب .. الله يهديلي ابراهيم ويوافق .. بعد ربع ساعه دخلت امي للغرفه جنت احسب دقيقه ينتهي هذا الموقف واعرف شنو صار .. بس دخلت تلكيتها وبوستها اروحلج فدوه يمه كتلج بس ادعيلي. كالت تعاي نكعد ..

كعدنا. . كالت هم راح تروحين بعيد عني مره ثانيه حضنتها وبجيت كتلهه كولي ابراهيم وافق ..

هزت راسها وبجت كالت اي يمه قبل وظلت تدعيلي عسى تنسعدين ويا مو مثل ذاك .. كتلهه ماما أحمد يحبني واني هوايه متأمله خير منه .. واكيد راح اخلي على طول يجيبني يمج وهو ميقصر . رفعت ايديها تدعي الي وشكد ارتاحيت بدعائها ..

بعدهه كلشي مشى تمام ورجعوا خبر لأحمد واهله على الموافقه .. وخابرني طاير من الفرح وگلي ها شفتي شلون جنت واثق راح تصيرين الي ..

وكال هسه اريد اسمع منج كلمة احبك اعتقد هواي اني كلتها الج ولا مره سمعتها منج ..

بين الخجل والفرح كلتله احبك وجنت اعنيها وحاسه طلعتها بملئ جوارحي .. يكولي من كد ماحبيتها منج احس بيها موسيقى .. انت احلى هديه اهداها الي القدر ربي يقدرني اسعدج .. اريد تنطيني قائمه بطلباتج حتى انفذها الج .. كتله اخر طلب جان انت طلبتك من ربي وبدعاء امي وحصلتك كولشي مااريد

- ماراح اخيب ضنج بيه زهراء راح ابقى احبج لأخر نفس بيه

- بقى يلح عليه يريد طلباتي واني مجنت خاله ابالي اي شي غير هو اصير اله قبل ليتغير كلشي فمجنت مفكره بأي طلب ..

و اختارلي لون البدله الي راح اللبسها بالحفله

كال يحب الالوان الفاتحه والهادئه .. وكلشي اختاره الي لون الشعر والمكياج وكلشي واني جنت فرحانه وبالفعل اريد اصير كلي على ذوقه حتى اطلع بعينه حلوه .. واسوي الشغلات الي يحبها ..

بيوم الحفله جنت خايفه وفرحانه خايفه عليه من الطريق لأن بعيد .. رحت من الصبح للصالون صديقاتي راحن ويايه لان عبير بقت بالبيت لان ردتها تعزم هوايه ناس حتى الكل يعرف وخاصة الي حجوا عليه اريد ا**ر عينهم بفرحتي وبأحمد واجت يمها هناء تساعدها ..

ورجعت للبيت وجان مليان ناس مثل ماردت اني

الكل يكولون طالعه حلوه حيل امي تباوعلي وتبجي امسح دموعها ومااريد ابجي اني كافي بجيت هوايه هسه اجه وقت لازم افرح ..

جنت كاعده انتظره يجي بس مااكدر اكول على نار لا كاعده على فرح وسرور دخل قلبي لا بل اقتحمه اقتحام بعد سنين عذاب وأذيه .. واخيرا كالوا وصلوا وطبوا اهله اني بس اعرف زمن اجتي كعدت يمي وعرف*ني على اهله بوست امه واخته الثانيه اسمها اسماء وزوجة اخو وبعد جايين خالاته وعماته وبناتهم

العدد مجان كبير هوايه لان طريق طويل من محافظه المحافظه ..

بعدهه صاحوني كالوا راح نعقد شيخ لبسوني وطلعت استقبلني ابراهيم من باب الصاله وباسني على راسي كال مب**ك بسته على خده صار عليه حمره مسحتها وظليت اضحك احس السعاده طالعه من خشمي ..

كعدنا يعقد النه الشيخ .. واريد بس يعقد ويخلص اريد اشوف احمد يمي ...

المفروض يبقى الشيخ يردد هل تقبلين كم مره بس اني توترت وكلتها من اول مره .. ورجعوني المكاني..

وانتظر حماده يجي يلبسني الحلقه لمحته دخل واحس عندي جناحين اثنين وطايره فوك الغيم من السعاده .. بقيت مركزه بي بينما هو يمشي يريد يوصل الي حتى يكون بقربي احسه ميشعر بوجود احد بس اني من دخل اخواته استقبلوا بالهلاهل وبوسوا احسه يريد يتملص منهم يريد يوصل الي بوس امه من راسها وايدها وعرفوا على امي هم بوسها وباس ايدها وهي هم بوسته شكد فرحت من شفت هالشي .. وتذكرت حسام غصبا عليه لان جنت بهاللحظه بالذات مااريد اتذكره واتذكر سنينه السوده حتى مجان يسلم على امي ..

اجه وصار يمي اريد احجي واكوله من صرنا البعض كلشي تحول .. المر صار حلو والمالح صار عذب والحزن صار فرح وحبور ..بس ماحجيت يمكن عيوني هي بس الحجت .. تقرب يمي وبوسني على راسي وبقينه واكفين وهمس بأذني احبج خجلت واكتفيت بالضحكه المرسومه على وجهي من ساعات حتى تعب وجهي من الضحك .. كال اكرصيني خاف دااحلم كتله لا انت اكرصني لان اعتقد اني هم جاي احلم كال لا انتي كرصيني كتله لا انت كال راح نتعارك من اول يوم وضحكنه ..

لبسني الحلقه والذهب . وجان يتعمد يسوي نفسه يهمس بأذني ويطبع شفايفه على المنطقه الوره اذني نزولا برقبتي .. حسيت عايشه بحلم وردي مااريد اصحى منه ..

جنت اسمع االبعض يكولن يابختها هم ارمله وهم ماتخلف وطبت السجن وراح تزوج هذا صدك مبخوته

حجوا هيج بس لم جنت اجرع الالم والوحده والحرمان والعذاب لسنين مجانوا يحجون ويكولون خطيه .. جانت امي حسره عليه اشوفها طبيبه مااروح افحص لان جنت اخاف منه وهو محلفني اذا اروح يطلكني مجانوا يعرفون شكد عانيت شكد عشت وحيده لايام واشهر وسنين ولا كأنه متزوجه شكد جنت اشتغل واصرف على نفسي بس هذا الكلام فالحين بي وكله بكوم ودخلت السجن بكوم ثاني ..

المهم مااهتميت اني اريدهم يحسدوني اريدهم يشوفون احمد واريد الناس كلها تحسدني عليه ويمكن حتى اني احسد نفسي ..

خلصت كل المراسيم والكل راحوا حتى اهله وهو بقى يمي كال راح ابات يم صديقي هنا اريد ابقى يمج شويه اريد احس بيج .. بقينه بالصاله وحدنا وبس يباوعلي واني بين الخجل والفرح احس ضايعه بمكان بس اني ويا بي .. كال طالعه مثل الاميرات ضحكت وخليت راسي على ص*ره حسيت بالوطن الي ياما تمنيت اخلي راسي هنا وبالحلال وبالفعل حسيت هذا انتمائي اله وبس .. وتقابلت شفايفنه.. جنه مثل العطاشى .. ظل يمرر شفايفه وره اذني ورقبتي برقه ويعض بالخيط مال البدله ويدغدغني واضحك ..

بقى بس ساعه وحده يمي كال زحمه من اخوج لازم اروح . بسرعه مرت الساعه مااتمنيت تخلص ابد ..

اتمنيت تستمر اكثر مااريده يروح اريد اروح ويا هو مو اليه اليوم .. ؟؟

راح وبقينه الليل على تواصل كتله باجر لازم تجي تتغده يمنا .. ماقبل كال زحمه.. رحت لعبير كتلهه كولي لإبراهيم خلي يخابره لان هو بعده هنا وخلي يتغده يمنه .. شسوي اريد اشبع منه لان زواجنا بعد متخلص امتحاناتي ..

مكال شي ابراهيم وخابره وكله تعال تغدا يمنه ..

بعدها خابرني احمد .. كلي خابرني اخوج وعزمني اكيد هي سوالفج مو ضحكت وظليت اسولف ويا ..

يوم ثاني كعدت من الصبح احضر الجيته .. احس عيوني فاضحاتني بفرحهن .. للظهر يله اجه واني انتظره على نار .. اندكت الباب وكلي ابراهيم هذا خطيبج اجه روحي سلمي عليه بالصاله .. اني جنت بكامل اناقتي بدأ من العطر واللبس والمكياج وتسريحة الشعر .. رحت دخلت عليه وسلمت و ايدينه بإيدين بعض كتله تأخرت كال ولج زحمه خو مااكضيهه كله عدكم خاف تطردوني اني ماصدكت تصيرين الي .. وكال ثگلي وكرصني من خدي لزمت خدي متألمه واضحك واحجي بقلبي معقوله استخفيت صدك خلي اثگل ..

وتغدينه وبقى للعصر وراح ..

مرت الايام ومضت الليالي وخلصت الامتحانات وقرب موعد العرس وبديت احضر .. وجنه نتواصل دوم اني وأحمد .. وجان يجي بين فتره والثانيه اشوفه ونتغدى سوه ويروح .. و اجه موعد العرس .. شكد ضحكت بالخطوبه متت بجي بالعرس لان راح ارجع البغداد ورجعتلي ذكريات الايام الكضيتها هناك زائد محد راح يروح ويايه بس هناك عمتي وجنتها راح يحضرون العرس بالقاعه . وبعدي عن امي مره ثانيه حضنتها هوايه وابجي .. رحت للصالون ولبست الفستان الابيض للمره الثانيه وماادري شمضموم الي بس خوف على خجل على فرح كلها انجمعت بيه .. ورجعت للبيت انتظر احمد يجي مجان هواي اكو ناس مو مثل حفلة المهر .. ووصل احمد هو وامه وابو واخو جايين مو هوايه ناس وياهم .. اجه كعد يمي شويه وحان الوقت اروح ويا هناك تتم باقي مراسيم العرس .. حضنت امي وكومه بجينه اني وياهه ..

مااعفتها الحد ما سحبني أحمد اله .. وبوس امي ووعدها يدير باله عليه كللها بعيوني وگلبي اخليهه

سلمت على الكل عبالك اول مره اتزوج وبوست ابراهيم وهو هم بوسني على راسي وحضني وطلعت ويا احمد وهو لازم ايدي .. واني ابجي وهو يسكت بيه ويشاقيني .. صعدنه بالسياره وامسح دموعي جان يكولي بالشقه تردين ارجعج ظليت اضحك ..

وصلنه لبغداد وللقاعه الي بيهه العرس .. وهناك شفت عمتي وجنتها جايين حسيت شويه اني مو وحدي

بس ضجت لان العرس مختلط واني محجبه و هم الاغلبيه سافرات .. بقيت متقيده بس احمد ماضغط عليه خلاني على راحتي .. بعدهه جتي اخته الكبيره ثاني مره اشوفها *اسماء* كالت انزعي البرنص الي لابسته ومغطي راسي وجسمي البدله جانت مفتوحه من الاكتاف .. وردانات ع الايدين لحد المرفق .كتلها لا اني محجبه مااكدر انزع .. كالت لعد شون حتكصون الكيكه شون تركصون .. اشرلها احمد كال الها خليهه على راحتها .. من اندارت سمعتها ترس اذني كالت معقده !!! فتحت عيوني على كبرهم صدك تحجي هي ..؟؟!!!احمد غمزلي كال لتهتمين .. هزيت راسي كتله اي بعدهه قطعنه الكيكه وهو ركصوا كلهم سوه .. وخلص العرس .. وزفونا لبيتنه بيت احمد مو نفسه البيت الي اللتقينا بي لا هذا غيره لان يريد نبتعد عن المنطقه الي بيها اخوة حسام .. هذا البيت قريب على بيت اهله .. االبيت حلو ومرتب وكلشي بي نازك ..

جانت مشاعري محتدمه .. خجلانه كلش وحتى مااكدر اباوع بوجه احمد ونفس الشي ضايقني تصرف اسماء وبقيت بس افكر بيها .

بقيت كاعده بالصاله وحدي لان الكل راح بقينه وحدنا حتى من الخجل البرنص مانزعته اجه احمد نزعنيا وباسني على ايدي .. وشالني واني محاوطه اكتافه ورقبته بأيديه وصعدنه فوك واحنه نضحك ..

دخلنا لغرف*نا .. ونزلني .. شغل موسيقى وحوطني من خصري بإيديه وكال مو اله نركص كدامهم نركص وحدنا .وركصنا سلو بس الخجل متملكني استحي حتى من تصد. عيني بعينه ادنك بعدها اتصلوا بي عمود العشا وصل .. كال بدلي بينما احضر العشا

كتله ماشي .. لبست وكعدت انتظره دقايق وصعد اجه يمي كال احبج عروستي .. اني كل الكلمات ضايعه من ل**ني بس باوعت اله وضحكت ..

غير ملابسه واخذني من ايدي ونزلنه .. جان العشا بالمطبخ وهو محضره على الطاوله واني رأسا ريحته اخترقت انفاسي وميته جوع .. من الصبح مااكلت ..

وتعشينا وغسلنا ورجعنا الفوك ..

وابتدت العلاقه الحميمه . جان الحب حاكمها وعباره عن تجاذب روحي اكثر مما هي اتصال جسدي ..

رغم طول الطريق والتعب من الهوسه بس مكدرنا انام بقينه كل الليل رومانسيه وسوالف دافيه احس دفأها بروحي ..

يوم ثاني الصبح كعدنا ساعه 9 رغم للفجر احنا كاعدين .. سوينا ريوك سوه وتعالت ضحكاتنا وسوالفنا بفرح ..

اكلنا .. بعدها شوفني البيت .. الجوه هول وغرفة الخطار والمطبخ والصحيات .. والفوك غرفتين نوم .

وحده النا والثانيه جانت مفروشه وبيها سرير ابو نفر كال هي لألين لان راح اجيبها يمي وانت اكيد راح تصيرين الها ام .. ابتسمت اله وكتله انت والين بعيوني وبقلبي ..

بعدهه امه كل شويه تتصل بي يله تعال الكل اجه وينتظروك .. مسوين عزيمه كبيره لكل اهلهم بمناسبة الزواج .. هم ينتظرون واحمد مكضيها رومانسيات ..

بدلنا ورحنه لبيتهم .. جان بي هوايه ناس وبقى يعرفني عليهم .. وسلمت على ابو وامه كلش حبيتهم والكل قدموا النا هدايا .. وزمن كالت مصاريف سفرتكم وشهر العسل عليه .. اسماء بعدها تباوع الي بنظره كلش محبيتها مااعرف ليش حاولت قدر الامكان اتجنبها .. زوجة اخو هم حلوه وحبابه وعدها ولد اثنين توم حلوين وساكنين ويا امه وابو بنفس البيت ..

بقت ايلين جابها الي ابوها اريد احضنها وابوسها بس مقبلت وعافت حضن ابوها وراحت تركض .. استغربت ليش ؟؟!!

احمد كلي لتضوجين هي هيج تستغرب من الاشخاص الي مشايفتهم من قبل وراح تتعود عليج ..

كتله ميخالف اكيد راح تتعود عليه ..

بس بداخلي استغربت هي طفله وعمرها 6 يعني شون عرفت اني اخذت ابوها وفكرت بيه تفكير موخوش لازم اكو احد كايل الها شي عليه ..

خلص يوم الصباحيه ورجعنه للبيت .. ومرت الايام احلى من العسل اني واحمد .. ورحنا لبيت اهلي وبقينه يمهم ولسه امي بس تدعيلي .. سولفت الها شكد اني سعيده ومرتاحه ..

وبعدها رجعنا .. ومرت 3 اشهر من زواجي مرت اغلب ايامه بسفرة شهر العسل والعزومات وتلث مرات رحت لاهلي وماحسيت بيها من كد الونسه بعدهه رجع احمد لشغله واني ابقى الوحدي بالبيت حسيت بضوجه وماصار عندي حمل وكلشي طبيعي ومايدل على انه اني حامل .. هنا بديت اشك بنفسي ودخلت بحاله نفسيه والليل كله ماانام والنهار كله بجي .. وصارت عندي رهبه ومافاتحت احمد بالموضوع اخاف اروح للطبيبه خاف اطلع مااخلف .. الى ان انتبه عليه احمد طول اليوم عيوني حمر وضايجه راد يعرف شكو ماگتله ظل يفرغ نفسه الي يطلعني مطاعم ويوديني يم اهله بس جنت اضوج رغم اهله كلش يحبوني .. وايلين على حطتها ويايه متحبني ومن اروح تختل او تكول لام احمد الي اكول الها ماما هي رادت هالشي توديها لامها!!! اسمعها تبجي تكول الها وديني لماما وديني لماما. بقت هوايه تساؤلات هي مو امها محرمه عليها تشوفها هي من وين تعرفها ؟؟

غلست على الموضوع .. ورجعت للبيت وبالليل نايمين اني اختنكت كلش وكمت من الفراش ورحت للهول وكعدت ابجي .. حسيت باحمد يحضني من وره ويبوسني .. كال اني حاس بيج شي ومخليج على راحتج مااريد اضغط عليج مدام متريدين تحجين بس هسه لازم تكوليلي شبيج .. ؟؟

درت عليه وحضنته وحجيت اله على موضوع الطفل ..

ظل يضحك كتله حتى وان مايصير عندي طفل مراح تعوفني .. كال انت طفلتي وهذا يكفيني بس اريد منج اطفال لان احبج .. واريد شي قوي يربطنه سوه واذا ماصار راح ابقى الج مثل مااني .. وعرض عليه نراجع دكتوره .. واخذني ورحنا للفراش ..

يوم ثاني طلع للشغل وخابرتني زمن كالت احمد موصويهه تاخذني للدكتوره العصر .. كتلها ماشي راح احضر نفسي .. جنت خايفه ومتوتره كلش شنو بيه وماصار الهسه طفل ... ؟؟

الظهر اجه احمد وتغدينا طلع العصر واني بقيت انتظر زمن تجي ونروح ..

يتبع ..