طاقة تحمل

البارت الخامس

طاقة تحمُل

الكاتبة؛العباديه

البارت//4//

بيج فيسبوك : قصص الكاتبة العباديه

زهراء . . .

دنسولف ومندمجين ودخل علينه محمد ! اني لابسه البدلة مفضوحه وجسمي طالع فتحت عيوني وشهگت بقيت اركض منا واركض منا احتاريت وين اضم روحي انسطرت ..

اخر شي ركضت ع الباب الي هو واگف يمه اريد اطلع چان البدلة متدخل بالباب ! لان هو واگف واني جسمي دخل والبدلة منفوشة وجبيرة ف مادخلت

وجهه صار احمر من الضحك يضحك بصوت عالي احرجني ووجهي صار احمر من الخجل

خلاني متبسمرة بمكاني وطلع يضحك سكران من الضحك !! بضحكته الرجوليه الخشنه

اني الدمعه وگفت بعيـني ضجت كلش ع الفشلـه واني اخجل ومنا بقى يضحك عليه واني ولا مرة احد ضاحك عليه او مقلد

نزعت البدلة شمرتها بوجـه ضحى وسارة الي عيونهن كادت تنفجر من الضحك !

طلعت للمطبخ ضايجه من الموقف لگيت عمتي كالت تعالوا حضروا العشا انتي والبنات صحتهن وبقينا نحضر بالعشا ...

جهزنا العشا نقلنـاه والتمينه ناكل .. محمد گعد مقابيلي !!

بقيت أكل مدنگه عـلى الاكل الي مقدم على جهتي مااريد ارفع راسي لان احس نظراته متمركزه عليه .. حسيت بتوتر رفعت راسي واشوفه بعده صافن عليه !! اول مارفعت راسي دنگ ع الاكل وسوه نفسه يتلذذ بالاكل !!

رجعت دنگت أكل ومانسمع الا صوت ضحكه رجوليه عاليه بصوت.محمد

الكل انتبه ورفع راسه باوعت ولگيته يضحك بصوته الرجولي !!

الكل سأله على شنو الضحك !؟؟

جاوبهم وعينه عليه

_ هيج موقف تذكرته قبل شوية صار

ويايه ويركز بيه ويرفع حواجب مع ابتسامه شاقه ثغره !

اني فشلت ودنگت انغـثيت وسارة وضحى ضحكن وياه لان يعرفـن بالموقف

لميت شفتي وعصرت عيوني من الموقف المحرج وقررت ماابقى لحظه لان اذا بقيت عيوني تغدرني

خليتهم يضحكون وترخصت لان ضوجني حيل كل شويه وضحك عباالك گدامه مسرحيه كوميديه شخص غثيث يوغف ع الگلب

رحت على موبايلي وبقيت اتنقل بالبرامج لما خلصوا اكل.كمنا غسلنا المواعين بالتعاون ا****عي ولملمنا المطبخ خصوصا اني لكوني خبيرة بشغلات المطبخ

دخل كرار طلب مني جاي لااصدقائهم مسوين مجموعة شباب ويسولفون بأجواء ليلة باردة والزرع بيه رطوبة من سقي المي وريحة الورود الفواحه ويه ضوء القمر تنشئ السهرات الليلية الودوده .

جهزت الچاي واجـه كرار ياخذه انطيـته اله وگال فد لحضه احجيلج نكـته هسه اصدقائي گالوهه بالمجموعه .

حچه النكته اني ضحكت

بصوت عالي لان اذا اضحك ضحكـتي تكون طويلة وعاليه مسـيطرت على نفسي

كرار : لج فضحـتينه خرب حظج

جاوبته واني عيوني مملؤه دمع بسبب الضحك

: ههههههه مسيطرت على ضحـكتي

دقايق وماشوف الا بركان متوجه نحوي على وشك الانفجار

تقرب يمي عيونه جاحده من الغضب والاسنان يصطكن واحد بالثاني من كثر الحرگه

تقرب يمي واني تراجعت خطوه للخلف لان اذا ابقى يمه يمكن احترگ بسبب غضبه

حجه وهو يضغط على أسنانه من العصبيه

محمد : لج شنو هاي الضحكه ؟

بلعت ريقي وگوه طلعت الكلمه سويت نفسي غ*يه ومااعرف شيء

: شنوو ؟ شصـار

جاوب بنتر وعصبيه

_ بنص اللمه وصوت ضحكتج يرن رن مثل الجرس والكل يتغزل بالصوت هاي شنو يسموها ؟؟ لا والله ومتعرفين شصار

كرار: اني رايح الدون معصب .. باااي

_لك كرار لتعوفني وحدي

_ هيوو وين ميعوفج وشعليـج بكرار انتي

_ اگولك هسه شنـو المطلوب ؟

خنزر عيونه بكل قوته حسيـتهن قنبله موقـوته تنفجر بأي لحضه

بحركه سريـعه منه سحب إيدي قوي طبع اصابيع ايديه على إيـدي !! ودخلني جّوه وگال

_ ا****ن هذا بعد لتطولينه لان ينكص ماشي

بقيت ساكته محجيـت شي بس بينّت بعيوني دمعه تلمع احتاجيت اذرفها بس سارة اجتي بوقت غير مناسب

سارة : شنو شصـاير

_ ماكو شـي

اشرتلي برفعة حاجبـها وهز رأسها دليل على (شكو)

: بعدين اسولـفلج

سارة : خل نشـوف شوكت يجي البعدين

دخلت ضحى وكمـنا نسولف لان مشتاقين لبعض حيل بس خربت السهرة من بيبي طلبت من عدنا نطلع علمود تنام والساعه ممتجاوزة الـ10 !!

ضحى ؛ بيبي والله بعد وقـت

الجده ؛ اطلعـوا بالاستقبال وكملوا سهرتكم اريد انام اني طوير حلال

ضحى ؛ هههه بـس محمد وكرار ينامون بالاستقبال

الجده ؛ اي نامن يمهـم همه اخوانجن

ضحى نفخت هوى بحلگها بملل

_هفف شكول عليج يابيبي هسه اذا نطردنه وين نولي هزت ايدهه.وصاحتني .. تعالي يله خل نفرش ونتـمدد بفـراشاتنا ونـسولف

سارة ؛ خوش فكـرة

فرشنا فراشات من الاسفـنج العالي على الارض

محمد وكرار فوك راسـنه واحنه البنات وحده بصف الثانيه ونسولف صارت الساعه بالـ10 ونص دخل كرار كال

: خليت محمد يبتلي بيهم اني اريـد اونسكـم بسوالفي الحلوة مثلي

سارة : شنو هالتواضع

كرار : كلششش

_ كرار تعال سـولف النا من سوالفكم الكوميديه خل نضحـك شوية

كرار بطبعه كوميـدي كلش وگاضيهه بس تحشيش ف نحب سوالفه بس اذا عصب اويلي مثل اخو بركان وينفجر

بس هوو يسوي هيج ويضحكنه حتى بس يلمح إبتسامه طفيفة على شفاه سارة الي ممركزه بتصرفات كـرار ومعتـبرته اخ !!

بقى يسولف واحنه مستمرين بالضحك شوية ودخل محمد تمدد بفراشَه ولزم موبايله ويكنك مااهتمينا اصلاً

سوالف كرار مضحكه فـ حچه سالفـه خلتنـي اضحك بقوة عمري مضاحكه هيـج ضحك.. بحيث وجهي صار احمر والنفـس انقطع وعيوني تصب من الضحك .. بقيت اشهك اريد اسحب نفس واگح شرگت بالضحك بقوا يض*بون على ظهري يله استعاديت أنفاسي وبقيت اخذ شهيق وزفير

اول ماشافني محمد إنخبص وخنزر عيونه ،، شمر الموبايل وركض يض*ب على ظهري

ومن استعاديت النفس بقى يعيط وتعـصب

_ هو هذا ضحك ؟؟ انتي صغيرة مثلاً عايزة طول حتى هيج تتصرفين

إسلوبه نرفزني كلشش

رديت عليه بنترة

_ ليش الضحك حرام

_ بس مو هيج باعي وجهج شصار بيه اذا تعرفين بنفسج متگدرين تضحكين ليش تضحكين وتخوفينا عليج ؟؟

زهراء .......

عناداً بيه گلت لكرار كمل السالفه تفاجئ وفتح عيونه مستغرب

خزرني وخزر كرار ينبهه علمود ميكمـل . توسلت بكرار يكمل توه راد يحچي ومحمد سبقة وطفه الگلوب

عطت بعصبيه

_هاي ليشـش ؟

_حتى تنامون كافي سـوالف

_شغله

_مااشـغل

شفته عاند وركب راسه حاولت اغير نبرة صـوتي الى توسل حتى يحن عليه ويشغله

_ هيه بس هاي الليله دشغله عاد

_ناموا كافي سـوالف

_عليك الله شغـله بس هاي السالفه خل يكملهه

نظرتله نظرات توسل ودلعت بصوتي رمشت بعيوني مثل حركات الطفله متوسله بيه وگتله( لخاطري شغله) سكت بس شكله إقتنع

صفن عليه وشغـله

_بس هاي السـالفه

_اي والله

تربعت اسمع السالفه وهو رجع لمكانه ولموبايله

كمل كرار السالفه خلانه مطشرين عبالك بمجزرة سارة ترفس ومدده ع الگاع ووجـهه احمر من الضحك وضحى ماخـذه وضعيه السجود والقيام تحني رأسها ع الارض وترفعه مااعرف شيسمون وضعيتـهه

اما آني ف ايدي على فمي واضحك بقوتي تحفظاً لصوت ضحكتي الي يجيبلي الرزايل من حضرت السيد المحترم (محمد)

ب لحظه انتابني الفضول اشوف شكله التفتت على جهته

شفته وجهه بالموبايل وابتـسامه خفيفة على شفافه اخيراً شفنه ضـحكته !!

انتهى مفعول الضحـكه وجهت نظراتي علـيه

_ يلا طفو الكلوب اني عد وعدي

_ كرار من يمـك النقطه طفيها وشغل التيبلام

_ اي مو خادمك الصغير

رفع حاجبه وفتح عيونـه خازره

محمد ؛ هاااا ؟؟؟؟ تثبت على كلامك

_ اسكت اسكت خلي الليله تمر بخير وامري لله

گام كرار طفى الگلوب وشغل الگلوب الاحمر واني مااعرف انام اذا مو ظلمه

وقت مو نومتي ابدد رغم التنظـيف والمسؤلية بس انام بالـ4 الفجر لان احلى شي ببيتنـا احترام للنايم مو طبيعي ف ننام براحـتنا

اني وسارة ممتعودين هيج وقـت ننام

تبادلنه النظرات اني وساره لان من وقت يريدون ننام ساره اشرتلي عود راح انام واني تمددت بفراشي

هو بقى رأسه بموبايلـه واحنا علـى اساس نمنا

بقيت احوس مااعرف انام سمعت صوته يرج بأذني

_ كافي تحوسين قـلقتيني

_ مجايني نوم مو وقت نومتي وضوه التيبلام هم ميخليني انام متّعوده الا بالظلمه

_ نامي واسكتي مستحيل اطفي التيبلام ماأنام اذا ممـشتغل

_ ياا لعد واني شلون انام

_ غطي راسـچ ونامي

_والله ولااگدر اختنگ جوه الغطه

_ مشكلـتج

جاوبته بنبرة توسل

_عفيه سـويلي حل والله مااگدر

_ والله ماكو حل مانمتي يم بيبيتج

اني رفعت حاجبي وفكرت گتله

_ اي والله هم صـدگ خل هـسه اروح انام يمهه

هو تفاجئ وخر وجهه من الموبايل ورفعلي حاجبه مامتوقع اسويهه صدگ واروح اخذت وسادة وغطا يكفيني للنوم

_ لج صدگتي انتي تـعالي وين رايحه

نظرتله بإنتصار

_خلي تيبلامـك يفيدك

_اذا مارجـعتي ونمتي هنا عاتبيني

_نشـوف

دخلت على اطـراف اقدامي حتى ميص*ر صوت يزعج النايمين اريد مكان احط رجلي بيه ماكو. !!!!!

ادور بيبي وين ؟! الكاع متروسـه زعاطيط عماتي وريحة الحليب مال الجـهال بالغرفة والبوخه خنگه تكـتل

طلعت يائسه الگه مكان انام بيه شفـت الاستقبال احسن بمليون مره من هذا المكان

لان بيه اجهزة تبريد عموديه وعلى اخر درجه من البروده لان محمد ينام بالاستقبال ف موفر جميع وسائل الراحه بيهه

اني تحديت محمد ماارجـع شلون هسـه وين انام ؟؟

فكرة تجيبني وفكـرة تاخذني

لما فكرت انام ع القنفات بالصالة بس حتى البنكـه متشتـغل لان شبه متروكه بس للاكل ومن ياكلون تشتغل بنكات كهربائيه محموله وحاليا مموجودة رحت فتـحت باب التـرك الي يكون بالزاوية وجوده يفيد بخـروج ريحة الاكل بعد الاكـل ....

تمددت ع القنفات وحاولت انام بس لاجدوى اتخيل اشياء مرعبه تدخل من باب التـرك وهو مفتوح بقيت ارجف والصالة ضلمه وهدوء اجواء صدك مخيفه حاولت وحاولت انام لما بلـشت اغفى

يتبع ...

الـعـباديـه??

alabadyia_09