رواية همس الذكريات الجزء الاول

الفصل الاول

الحلقه الاولى

روايه / همس الذكريات

بقلم سحر فرج

يقترب منها ويرفع وجهها اليه ويلمس خديها فتزداد حمرتها من الخجل فاتثير مشاعره .

فتنظر الى عينيه و تعض على شفتيها فايزداد جنونه بها فايقترب اكثر ويقبلها حتى تكاد أن تنقطع انفاسهم . فهمس امام شفتيها بطلاصم عشق لم يقولها من قبل لأحد و يلمس شفتيها وعند هذا الحد لم يقدر على الابتعاد . فالتهمها مرة أخرى فى قبله عصفت بكيانه بالكامل ويداه تتجول على جسدها بجرأه هذه المره فبادلته قبلته بعمق تمسكت بـ رقبته بقبضه يدها وضع هو يده خلف راسها يقربها إليه اكثر ويلتهم شفاها بنهم وعشق كاد ان تنقطع انفاسها فتركها رغماً عنه وهو يلهث .

افاق جاسر وفتح عينيه على رنين هاتفه ...... فعلم أنه كان مجرد حلم . وهو نفس الحلم الذى يحلم به دائما مع هذه الفتاه ولا يعلم من هذه التى تشاركه أحلامه .

فمسك هاتفه وعلم أن المتصل حازم أخاه .

فى ارقى أحياء القاهرة وفى إحدى الڤيلات الجميله فى التجمع الخامس يعيش اسلام الحسينى 37 سنه رجل الأعمال المشهور وزوجته الدكتورة ريهام سالم 29 سنه التى تعمل فى أكبر مستشفى فى القاهرة ومعروفه فى عملها جدا لتفوقها فيه دايما .

لديهم ولد وبنت توأم

عمر وفريده .

اربع سنوات

تعيش معهم جدتهم أم والدهم واسمها سهير .

تزوج اسلام من ريهام من حوالى خمس سنوات وكان مجرد زواج تقليدى وبالمعنى الأصح زواج صالونات وبعد فترة نبت الحب بينهم .

وفى صباح إحدى الايام ومع شروق شمس يوم جديد يفتح اسلام عينيه الساعه السابعه صباحا ويقلب جسده على السرير وحين ذلك علم أن زوجته فى عملها بالمستشفى .

اسلام مسك موبيله وقام بالاتصال على زوجته ليطمأن عليها .

اسلام ... صباح الخير يا روحى .

ريهام ... صباح النور يا حبيبى .

اسلام ... ايه كان عندك نبطشيه ولا ايه فى المستشفى .

ريهام ... اه يا حبيبى النهارده الاتنين انت نسيت ولا ايه .

اسلام ... اه صحيح معلش حبيبتى اصلى جيت تعبان اوى من الشغل امبارح ونمت زى القتيل وما حستش بيكى خالص لما نزلتى .

ريهام ... انا فعلا شوفتك نايم تعبان علشان كده مردتش اصحيك قبل ما انزل .

اسلام ... تسلميلى يا قمر .

هاتيجى امتى وانا اعدى عليكى واجيلك ونروح سوا .

.ريهام ... انا كلها ساعه وارجع لانى هلكانه وكان عندى عمليه ويادوبك لسه مخلصه انا هارجع لوحدى خليك انت يا حبيبى علشان ما تتأخرش على شركتك .

اسلام ... ماشى يا حبيبتى يالا سلام .

قام اسلام من السرير ودخل على الحمام وخد شور وخرج ولبس هدومه ونزل على تحت .

اسلام ... صباح الخير يا ست الكل عامله ايه يا حبيبتى .

الام ... صباح النور يا اسلام انا الحمد لله بخير يا ابنى ..وانت عامل ايه يا حبيبى .

اسلام ... الحمد لله يا حبيبتى انتى اخبارك ايه واخبار صحتك ايه .

الام ... الحمد لله يا ابنى نشكر ربنا على كل شىء وادينى ماشيه على العلاج بتاعى .

شويه ونزل عمر وفريده مع المربيه بتاعتهم واول لما عمر شاف باباه ساب ايد المربيه وجرى عليه .

عمر ... بابى

اسلام ... اهلا عمورة عامل ايه يا قرد.

عمر بيضحك لأسلام وقاله فاين يا بابى .. ونزل من رجله وراح لجدته لكن فريده راحت لباباها بسرعه .

الجده خدته فى حضنها وباسته واديته للمربيه علشان تفطره هو واخته وتطلب من الشغاله انها تجهز الفطار لاسلام بيه .

المربيه ... تحت امرك يا سهير هانم .

اسلام ... لا يا ماما مش هاقدر افطر عندى شغل كتير واجتماع مهم بدرى ولازم اكون هناك قبل الكل .

الام ... ربنا معاك يا حبيبى ويقويك ويوفقك دايما .

اسلام ... ما اتحرمش منك ابدا يا حبيبتى ولا من الدعوات الحلوة دى .

الام ... بقولك يا اسلام

اختك هند جايه النهارده هى وعيالها يقضوا اليوم معانا ما تتأخرش علشان نفسها تشوفك بقالها كام يوم .

وابقى هات صلاح جوزها معاك وانت جاى علشان نتغدى كلنا .

اسلام ... حاضر يا امى .

هند بتكون أخته الوحيده وعندها 30 سنه وكان صلاح جوزها وفى نفس الوقت ابن عمها وكانوا بيحبوا بعض من وهما صغيرين .

وكان عندهم بنتين هنا والاء

هنا اربع سنين والاء سنتين .

*****************

خرج اسلام بعد ما خد مفاتيح عربيته وبعض الملفات المهمه علشان الاجتماع وركب العربيه وراح على الشركه .

نزل من العربيه اودام مبنى كبير و ضخم ودخل والكل كان بيرحب بيه وهو يا دوبك يلقى التحيه عليهم بنظره عينيه .

وهو طالع شاف شخص واقف اودام الاسانسير وعرف أنه صلاح ابن عمه فقرب منه وسلم عليه .

صلاح برضه ليه جزء كبير من الاسهم فى الشركه .

وكان هو واسلام زمايل مع بعض فى كليه التجارة وبيحبوا بعض جدا واسلام بيعتبر صلاح اخوه وجوز أخته الوحيده وابن عمه فى نفس الوقت ودراعه اليمين فى الشركه .

واهل صلاح عايشين فى الصعيد وبيروحوا كلهم يزروهم كل فترة .

سلموا على بعض وركبوا الاسانسير وطلعوا بيه على فوق .

فى حجرة فى فندق كان جاسر بدأ يفوق من نومه ومن حلمه اللى ملازمه بقاله فترة وبيحلمه على طول ودخل خدش شور وبدأ يجهز شنطه علشان ينزل على القاهرة .

؟؟؟؟؟؟؟؟

ريهام كانت فى المستشفى وكان التعب والارهاق باين على وشها .

احلام ...مالك يا دكتورة ريهام شكلك تعبان اوى .

ريهام ... ابدا يا احلام شويه إرهاق من قله النوم ولما اروح واستريح وانام هاكون كويسه .

احلام ... ان شاء الله يا دكتورة مش عاوزة منى حاجه قبل ما اروح انا .

ريهام .. خليكى يا احلام وانا اروحك فى سكتى .

احلام ... تشكرى يا ست الدكتورة انا هاركب المواصلات زى كل يوم ربنا يخليكى .

ريهام .... ماشى يا احلام اللى تشوفيه وروحى انتى علشان ما تتأخريش على عيالك .

بقولك يا احلام الدكتورة سحر جت النهارده المستشفى ولا لا ؟

احلام .. الظاهر كده لا يا دكتورة ريهام ما شفتهاش خالص .

ريهام .. خلاص يا احلام روحى انتى .

احلام ... حاضر يا افندم سلامو عليكوا.

( احلام بتكون ممرضه فى المستشفى وبتحب الدكتورة ريهام جدا .. وريهام بتحاول دايما تساعدها علشان ظروفها الصعبه )

ريهام دخلت وغيرت هدومها وخدت شنتطها ونزلت من المستشفى وركبت عربيتها ورجعت على البيت .

ريهام اول لما وصلت البيت دخلت وسلمت على حماتها .

ريهام ... صباح الخير يا ماما اخبارك ايه يا حبيبتى .

الام .... صباح النور يا بنتى انا كويسه الحمد لله .

انتى اللى عامله ايه يا حبيبتى .

ريهام ... والله يا ماما هلكانه وتعبانه وهاطلع اخد دوش دافى وانام .

اومال فين الاولاد .

الام ... فوق يا حبيبتى مع المربيه كانت بتغير لهم هدومهم بعد ما فطرتهم .

ريهام ... ماشى يا حبيبتى استأذنك انا واطلع انام علشان استريح شويه .

الام ... اطلعى يا حبيبتى ربنا معاكى ويقدرك على اد تعبك مع الناس فى المستشفى.

ريهام طلعت على فوق وقبل ما تدخل اوضتها دخلت اوضه عيالها علشان تطمن عليهم .

ريهام اول لما دخلت جريوا عليها وفضلوا يحضنوا فيها ويبوسوها .

ريهام ... حابيبى اللى وحشنى عاملين ايه .

فريده ... الحمد لله يا مامى .

عمر ....حلو يا مامى .

ريهام اطمنت عليهم من المربيه وسابتهم معاها وراحت على اوضتها .

اول لما دخلت رمت شنتطها على السرير وبدأت تغير هدومها .

شويه تليفونها رن وكانت اختها منه هى اللى بتتصل عليها .

ريهام ... يا صباح الخير للعالم اللى صاحيه بدرى .

ازيك يا منه وازى بابا وماما .

منه ... صباح النور يا هومه .

الحمد لله هما كويسين وبيسلموا عليكى .

عامله ايه انتى يا قمر وحشانى .

ريهام ... ايه ده هومه وكمان قمر يبقى الموضوع فى اينه

انطقى وقولى عاوزة ايه علشان اختك تعبانه ولسه راجعه من المستشفى وعاوزة انام .

منه ... اه يا اختى يا اللى دايما فهمانى انتى وفقصانى .

ريهام ... انجزى يا منه فى ايه ؟؟

منه ... كنت عاوزة اطلب حاجه من بابا وعارفه أنه مش هايرضى .

بس لو انتى اللى كلمتيه مش هايرفضلك طلب .

ريهام ...وطلب ايه اللى انتى عوزاه من بابا يا فصيحه !!

منه ... كان عندى رحله تبع الكليه اربع ايام فى شرم الشيخ شباب وبنات وكان نفسى اروحها اوى مع زميلى .

ريهام .... اه قولتيلى شباب وبنات !!!

طيب ما انتى عارفه ان بابا رافض فكرة الاختلاط دى وهايرفض لو حتى انا اللى كلمته .

منه .. وحياتى عندك يا ريهام كلميه وقوليله وشوفى هايقولك ايه علشان خاطرى .

ريهام ... حاضر يا ستى هانام دلوقتى ولما اصحى هاكلمه حاضر يالا اقفلى بقى علشان تعبانه اوى .

منه ... حبيبتى ما اتحرمش منك ابدا يا قلبى ... بوسيلى عمر وروح قلبى فريده اوى .. يالا سلام .

ريهام سابت الموبيل على التسرحه ودخلت على الحمام وخدت دوش دافىء ولبست هدومها وخرجت وسرحت شعرها ونامت على سريرها على طول زى الفسيخه وراحت فى سابع نومه .

عدى تلت ساعات وهند كانت جت بعيالها وسلمت على مامتها وفضلوا يتكلموا شويه لحد ما ريهام صحيت من نومها وغيرت لبسها ونزلت على تحت .

ريهام ... اهلا هنوده وحشانى اوى يا حبيبتى اخبارك ايه .

هند ... ريرى ازيك يا قلبى انا الحمد لله كويسه انتى اخبارك ايه واخبار شغلك ايه .

ريهام .. هلكانه ومطحونه يا هند والله بس اعمل ايه شغلنا صعب وانت عارفه بقى .

هند ربنا معاكى يا حبيبتى .

اريح حاجه انى مش بشتغل ده انا كفايه عليا العيال دول .

ريهام ... ربنا يخليهم انا هاقوم اشوف اخبار الغدا ايه .

هند ... طب استنى اجى معاكى ونشوف لو حاجه ناقصه نعملها .

وفعلا دخلوا المطبخ وكان الشغالين متبلين اللحمه والفراخ والكفته لذوم الشوى .. وجهزوا كل السلطات وعملوا الحلويات والعصاير كمان .

ريهام .. طب كويس اوى برافو عليكم .

هند .. تمام كده تعالى نروح نقعد مع ماما شويه بقى اصلكم وحشنى جدا .

___________________________

عدى كذا ساعه والعصر كان هأيذن ودى فترة الغداء فى الشركه .

دخل صلاح على اسلام اللى كان مشغول فى الشغل اوى بعد ما خلصوا الاجتماع المهم واللى على أساسه هايكونوا مشغولين جدا الفترة الجايه وهايسافر اسلام لاستيراد بعض الأجهزة الرياضيه .

صلاح ... انت لسه ماسك الملف ده يا عم انت !!! انتم مش هاتغدونى النهارده ولا ايه .

اسلام ... ليه لسه بدرى هى الساعه كام دلوقتى يا بنى ادم انت .

صلاح ... الساعه داخله على اربعه يا استاذ وانا بطنى بتصوصو وبتقولكم حرام عليكم يا عالم جوعتونى .

اسلام ... ياااه اربعه تصدق انا قولت الساعه تجيلها اتنين متخيلتش انها اربعه دى خالص .

صلاح ... انت لسه هاتقولى تخيلت ومش تخيلت انجز يالا عاوز اكل .

اسلام قام من على كرسى مكتبه وشال بعض الملفات فى الدرج وخد جاكيت البدله اللى كان حطه فى ضهر الكرسى وقاله يالا يا فاضحنى دايما وانا هاغد*ك .

.صلاح ... احمدك يارب .

فضلوا يضحكوا على كلام صلاح وخدوا بعضهم ونزلوا فى الاسانسير وكل واحد ركب عربيته وراحوا على الفيلا .

اول لما وصلوا كان الكل فى الجنينه ومجهزين تربيزة كبيرة للغدا والأطفال بيلعبوا وبيجروا فى كل مكان .

اسلام ... مساء الخير عليكم جميعا .

الكل مساء النور يا حبيبى .

الاطفال كل واحد منهم جرى على باباه .

هنا والاء جريوا على صلاح .

وعمر وفريده جريوا على اسلام .

وبدأت ريهام وهند يجهزوا فى الاطباق لانهم عارفين انهم اكيد جعانين وصلاح هايبهدل الدنيا لو الاكل اتأخر عن كده .

وقعد الكل والأطفال كمان وبدؤوا يكلوا وكان الاكل عبارة عن جميع انواع المشويات والسلطات .

صلاح... الله الله على الريحه الحلوة دى والأكل شكله يفتح النفس .

اسلام ... يا ابنى سمى وكل وانت ساكت .

هند ... هو كده دايما يا اسلام مش بيستحمل الجوع خالص .

الكل كان بيضحك على كلام صلاح وكملوا اكلهم .

خلصوا غدا وكلوا الحلو كمان وقعدوا يتكلموا كلهم مع بعض فى جو عائلى جميل .

ريهام موبيلها رن وكانت منه اللى بتتصل بيها واول لما ريهام شافت اسم منه افتكرت على طول موضوع الرحله واستأذنت علشان تكلمها وبعدين تكلم باباها .

ريهام ... ايوا يا ذنانه مش صابرة لما ارد عليكى يا بنتى .

منه ... انا قولت اكيد انتى نسيتى فقولت افكرك .

ريهام ... طيب اقفلى يا ظريفه وانا هاكلم بابا واشوف اخرتها معاكى ايه انتى والرحله بتاعتك دى .

تواقعتكم ايه .

??????????

.بقلم ✍ سحر ف*ج