حب مؤقت

دايما الانسان بيدور على ايه الناقص فى حياته و بيحاول يكمله ، احساس النقص دايما بيد*ك شعور بالخوف ، فبتدور على الامان من الخوف ده ، الأمان فى الحالة دى بالنسبة لكل الناس مختلف على حسب النقص اللى بيشعروا بيه و عاوزين يكملوه ، فيه اللى بيشوف ان الامان فلوس ، يبقا اكيد ده مكمن النقص ، و فينا اللى بيشوف ان الامان فى البيت و السكن ان يكون عندك سقف و جدران يحموك ، و فيه اللى بيشوف ان النقص شخص فى حياتك يحسسك بالأمان ، يعنى فى وجوده تحس بالهدوء و الثقة و الاستقرار ، تحس ان مهما شوفت من ازمات هتلاقيه محافظ على هدوءك قبل هدوؤه و استقرارك قبل استقراره ، دايما هياخدك معاه للأرض الثابتة من غير اى قلق من اللى جاى .. لازم انت تكون إنسان سوى علشان تحس بالأمان وقت ما تلاقى اللى انت محتاجه لان فيه ناس كتير مهما كان عندهم كل شئ بيفتقدوا برضه إحساس الامان ، احنا عاوزين نتكلم معاكم من بين المعانى دى كلها عن الأمان لما يتجسد كشخص تشوف فيه كل مقومات الوطن بالنسبة ليك ، مش بس يفرح لفرحك ، لا ده بيكون هو سبب فرحتك من البداية ، مش بس يوفرلك المعانى اللى انت محتاجها علشان تقدر تواجه دنياك لا ده كمان بيواجه معاك ..

فى القصص اللى هانحكيها مش شرط يكون الامان ده حبيب ، ممكن يكون صديق ، أب ، اخ و على الجانب الآخر ممكن الامان يكون صديقة او حبيبة او اخت .. و لازم ناخد بالنا إن إيمان الشخص بنفسه بيحقق نسبة كبيرة من الامان ، انك تكون واثق فى قدراتك ، عارف انت ممكن تكون إيه و تقدر توصل لفين ، ده بيخليك تقدر تواجه كل حالات الزيف اللى ممكن تقابلك و تحاول تعصف بيك ..