AGATHA
"Ano, kaya mo pa ba o susuko ka na, Agatha?" agad na tanong ni Theresa nang makita niya akong pumikit dahil biglang nanlabo ang paningin ko.
Maghapon akong nandito sa gym, kasama si Theresa na nag-ta-training. Siya lamang ang mag-isang pinagkakatiwalaan ni Draven na nakakalapit sa akin para turuan ako sa araw-araw, ayon na rin sa utos ng asawa ko.
Sa umaga, puspusan na exercise ang ginagawa ko para ihanda ang sarili ko. Maliligo lang ako at kakain at pagkatapos, balik na naman sa pagsasanay dito sa gym.
Kahit paano, marunong na akong gumamit ng kamay at paa bilang depensa sa tuwing may biglaang fight akong kinakaharap at gustong subukan ni Theresa kung hanggang saan na ang kaya ko. Ang hirap, lalo na at maliksi at magaling ang kasama ko, kaya malaki ang pressure na matuto ako.
