حبك نهاية

3

يوم جديد يمر على الكل بفرح و سرور .. اول من فرح بهاليوم هو فارس .. كان غرقان في احوانه بين النايم واللي مب قادر ينام .. كانت الساعه 8 ونص الصبح .. رن جواله وكانت الرنه ( عالي مستواه ) .. طالع التلفون باستغراب وحس بفرح وهو يشوف الاسم فالتلفون .. خذ نفس عميق ورد ..

فارس: هلا ..

مناف: حبيبي فارس ..

فارس ابتسم: فديت صوتج يا مناف ..

مناف بفرح: خلاص انتهى الموضوع يا فارس ..

فارس عض على شفايفه وقام من السرير يطالع نفسه فالمرايه .. ابتسم وغمض لانعكاسه فالمرايه ..

فارس: فديت قلبج يا قلب فارس انتي ..

مناف صاحت: والله يا فارس اني اموت فيك ..

فارس: اذا انتي بس تموتين فيني .. انا اعشقج بكل ما فيج .. احبج وا احبج و احبج .. والله لو قلت لج احبج لين آخر نفس فيني .. بعد اللي في قلبي لج اكثر و اكثر .. فديت دموعج حياتي .. مسحيها

مناف غمضت عيونها: هاي دموع الفرح .. فديت روحك يا فارس .. الله لا يخليني منك ..

فارس: والله ردت فيني الروح .. جني ظميان وانتي رويتيني بهالخبر يا قلبي ..

مناف: حياتي يا فارس .. عيل انا شاقول اللي ماعرفت طعم النوم من صار الموضوع .. كل همي انت يا فارس ..

فارس: آآآه .. فديتج يا اغلى مناف فالدنيا ..

مناف: فارس ..

فارس: اموت لي قلتي فارس .. يا قلبه انتي .. آمريني ..

مناف بهمس: وحشتني ..

فارس مبتسم: وانتي وحشتيني اكثر يا بعد عمري ..

مناف: والله اني مستانسه وناسه ..

فارس: يعلها دوم هالوناسه ..

مناف: فديت روحك ..

فارس: يا عمري انتي .. زين قولي لي شو صار ؟

مناف: مممممم .. شوف الحين ماقدر اتكلم على راحتي .. بكلمك بعدين وبقولك كل شي ..

فارس: خلاص يا قلبه .. حاضرين لج ..

مناف: يلا حبيبي .. بخليك الحين ..

فارس: الله يحفظج من كل شر ..

مناف مبتسمه: وياك حبيبي .. مع السلامه ..

فارس: سلام ..

سكر منها وتم ينط مكانه من الوناسه .. تغيرت ملامحه من الحزن لين الفرح و الوناسه .. فرحت فارس ومناف ما تنوصف .. نزل عند امه وطلب منها تسوي له اكل ..

ام فارس مبتسمه: يا علني اشوفك معرس يا فارس ..

فارس مبتسم: تسلمين الغاليه ..

ام فارس: فديت قلبك يبه .. زين خلني اروح اسوي لك لقمه ..

فارس: اخذي راحتج الغاليه ..

راحت ام فارس المطبخ وفارس تم فالصاله يفكر في مناف .. اتصل بتوأمه الروحي محمد عشان يبلغه هالخبر الحلو ..

محمد: هلا والله ..

فارس بفرح: حمودي ..

محمد مبتسم: يا قلبي فروسي ..

فارس: هههههه .. اليوم انا اسعد انسان فالكون ..

محمد: يعلك دوم في فرح و وناسه يا فارس ..

فارس: الله يسلمك الغالي ..

محمد: ها بشر ..

فارس: خلاص انتهى الموضوع على خير ..

محمد بوناسه: الحمدلله ..

فارس: من شوي كلمتني .. و زفت لي هالخبر الحلو .. طار عقلي يا حمود ..

محمد: ايه عليك يا فارس .. الله لا يغير عليكم ..

فارس: الحمدلله على كل حال ..

محمد: عيل على هالخبريه الحلوه .. اكيد عازمني على العشا الليله ..

فارس: ولا يهمك .. اختار اي مطعم وادفع الحساب .. انا ما قول لأ ..

محمد: يالزطي .. انت اعزمني ..

فارس: اي ي ي .. انا راضي انك تعزمني يا حمودي ..

محمد: فروس يالع**ط .. العزيمه عليك ..

فارس: والله انك قدها يا حمودي .. بس تحرجني لما تعزمني يالغالي ..

محمد: هههههه .. اوريك بالع**ط ..

فارس: هههاااااااي .. متى لقائنا ؟

محمد: الليله ..

فارس: الساعه كم ؟

محمد: مادري عنك ..

فارس: تعال بسألك .. شو صار على سفرة الم**يك ؟

محمد: سلمان ما قصر .. رتب مع ربعه هناك ..

فارس: والله .. حليله هالريال .. بس متى بنسافر ؟

محمد: احنا اتفقنا بعد ما ارجع انا من السفر ..

فارس: زين انت متى بتسافر ؟

محمد: بعد عرس خلود بكم يوم ..

فارس: حلو .. في وقت الواحد يجهز نفسه حق السفر ..

محمد: الشباب كلهم دخلوا سيايرهم الفحص .. و فنتكوا فيها تفنتك .. اللي مغير اللون واللي مادري شو مركب ..

فارس: والله انهم مقاليع ..

محمد: تحس محد عاقل من بينكم الا انا الله يحفظني ..

فارس: ههااااي .. حلوه منك بن عمي ..

محمد: هههههه .. الله يغربلك يا فروس على هالضحك ..

فارس: والله من زمان ما ضحكت ..

محمد: ان شاءالله دوم تضحك ..

فارس: الله يسمع منك .. زين عيل نتلاقى الساعه 8 ..

محمد: حلو ..

فارس: زين خل اروح اتريق ..

محمد: بالعافيه ..

فارس: الله يعافيك ..

محمد: سلام ..

فارس: سلام ..

محمد وايد فرح لفارس .. و تم يدعي له ان الله يوفقه مع مناف ..

...................

طبعا اليوم هنادي بتسافر شهر العسل .. حانت لحظة الوداع .. كانت في بيت ابوها .. مع سلمان ويوسف والجوهره .. كانت طيارتها الساعه 6 المغرب .. طبعا حزن و دموع بين هنادي والجوهره ..

هنادي حاضنه الجوهره: فديتج يا جوجو بتوحشيني ..

الجوهره: وانتي اكثر يا حبيبتي ..

هنادي: احس مو شي بدونكم ..

سلمان: روحي تونسي حبيبتي .. هاي شهر العسل ..

يوسف: بس تحملي تاكلين بصل ..

الكل: هههههههه ..

هنادي: وااااي .. بتوحشني خفة دمكم .. سوالفكم .. كل شي بيوحشني ..

سلمان: هنوده ليش مكبرتها .. انتي مو رايحه طول عمرج .. كلها كم اسبوع و راجعه باذن الله ..

االجوهره: صح ..

هنادي: فديتكم والله ..

سلمت عليهم وراحت المطار مع نواف وسلمان .. وصلهم سلمان و ودعهم .. رجع البيت وهو مشتاق حق هنادي سلمان " فديتها هنوده والله مكانها مبين .. الله يحفظهم " ..

الجوهره: شخبار فطومه ؟

يوسف: الحمدلله ..

الجوهره: يوسف خف على البنيه ..

يوسف مبتسم: ليش ؟

الجوهره: جننتها .. كل يوم انت عندهم ..

يوسف: لا والله من ملجنا ما رحت لها الا مره وحده .. و يوم جات بيتنا تغديت معها وبس ..

الجوهره: ولا تنسى الفندق .. هاي بعد محسوبه عليك ..

يوسف: هههههههه ..

الجوهره: انت ما شفتها لما كنت كل شوي تناديها ..

يوسف: شفيها ؟

الجوهره: كل ما تدخل علينا و يها يكون احمر .. وحالتها حاله .. عذبتها ذاك اليوم ..

يوسف: هههههه .. تعالي بسألج ؟

الجوهره: هلا ..

يوسف: متى بتطلع صور العرس ..

الجوهره: يبيلها اسبوعين الى 3 اسابيع تقريبا ..

يوسف: يه وايد .. زين ما يصير اروح اطلع صوري انا وفطومتي .. كلها الا كم صوره

الجوهره: اهم شي فطومتك .. هههههه ..

يوسف مبتسم: عاد عديها انتي ..

الجوهره: بس هالمره ..

يوسف: زين بخصوص الصور ..

الجوهره: اي ي ي .. زين مر على المصوره شوفها اذا تقدر اطلع لك صورك قبل ..

يوسف: اكلمها ولا اروح احسن ؟

الجوهره: لا روح احسن .. عشان تختار الصور ..

يوسف: ما تصورنا وايد .. يمكن 4 او 5 صور انا وهي .. و صورتين مع اخوها ..

الجوهره: لا روح احسن ..

يوسف: ان شاءالله ..

رن جوال يوسف .. وفاطمه كانت المتصله .. يوسف شاف التلفون وابتسم ..

يوسف: هلا وغلا حبيبتي ..

فاطمه: هلا فديتك ..

يوسف وهو طالع من الصاله: فديت هالصوت والله ..

فاطمه مبتسمه: شحالك حبيبي ؟

يوسف بهمس: فديت حبيبي لي قلتيها ..

فاطمه انحرجت: يوووووسف ..

يوسف: لا خلاص باذوب من دلعج ..

فاطمه ماتت من الخجل ..

يوسف: شخبارج حبيبتي ؟

فاطمه: طيبه ..

يوسف: وحشتيني حبيبتي ..

فاطمه مبتسمه: وانت بعد ..

يوسف: انا بعد وشو ؟

فاطمه: انت بعد وحشتني ..

يوسف بفرح: يا ربي على الغزل .. والله اني انسان محظوظ ..

فاطمه: هههههه ..

يوسف: فديت هالضحكه وربي ..

فاطمه: يوسف ..

يوسف: عيونه ..

فاطمه: تسلم لي عيونه .. مممممم

يوسف: قولي حبيبتي ..

فاطمه: توديني بيت يدي .. محد فالبيت غيري .. راحوا وخلوني ..

يوسف مبتسم: من عيوني .. حاضرين لج يالبرنسيسه فاطمه بنت محمد ..

فاطمه مبتسمه: ما تقصر فديتك ..

يوسف: متى تبيني امرج حبيبتي ؟

فاطمه: يعني على الساعه 7 ونص يناسبك ؟

يوسف: يناسبني غصبن عني ..

فاطمه: هههههه ..

يوسف: اموت فالضحكه والله ..

فاطمه كانت وايد تنحرج من غزل يوسف لها ..

فاطمه: اول ما اجهز بتصل لك عشان تمر علي ..

يوسف: انا تحت امرج ..

فاطمه: ما تقصر فديتك ..

يوسف: يا قلبي عليج ..

فاطمه عضت شفتها: زين بخليك الحين ..

يوسف: زين حبيبتي ..

فاطمه: مع السلامه ..

يوسف: مع السلامه ..

سكر منها ورجع الصاله عند اخته .. كان مستانس .. الجوهره تمت تسأله وتلعوزه ..

الجوهره: المدام ..

يوسف: اي ..

الجوهره: قلبت كيانك فطومتك ..

يوسف: ههههه ..

الجوهره: شكلك غرقان في حبها ..

يوسف: حدي ..

الجوهره: ايه عليك يا يوسف .. هالكثر تحبها ..

يوسف غمض عيونه ورجع براسه على روا ..

يوسف بهمس: هي حياتي كلها ..

الجوهره: شتقول ؟

يوسف: ولا شي .. زين خالي متى بيرجع من المطار ؟

الجوهره: يبيله شوية وقت .. شوراك ؟

يوسف: بروح اودي المدام ..

الجوهره: وين ؟

يوسف: بوصلها بيت يدها .. ما عندها حد يوصلها ..

الجوهره:بصراحه فطومتك هاذي تنأكل ..

يوسف: ايه والله تنأكل ..

الجوهره: يوسف .. ترا حالتك وايد صعبه ..

يوسف: ساشوي يا اختي .. لقيت كل اللي فقدته عندها ..

الجوهره مبتسمه: الله يخليكم لبعض ..

يوسف: الله يسمع منج ..

الجوهره: الا بسألك .. انا وهنوده نسولف عن اسامي اليهال ..

يوسف باهتمام: زين ..

الجوهره: انا وهنوده بنسمي اول ولد على ابوي .. وانت ؟

يوسف: هي ودها تسمي على اخوها ..

الجوهره: اخوها الكبير صح ؟

يوسف: اي .. ليش ؟

الجوهره: لا بس اسأل .. شسمه اخوها ؟

يوسف: اسمه فارس ..

الجوهره: اسمه حلو ..

يوسف: وايد تحب اخوها .. وهو يموت فيها ومدلعها .. تخيلي لو خواتها طلبوا منه شي لو قدر عليه سواه لهم لو ماقدر يقولهم لأ .. بس فطومتي ما يرفض لها طلب .. خواتها لو يبون شي منه و رفضه يدزونها تتوسط لهم

الجوهره: هههههه .. حليله وايد يحبها ..

يوسف: وانا بعد وايد احبها ..

الجوهره: ههههه .. فديتك يا يوسف ..

دخل عليهم سلمان ..

سلمان: السلام عليكم ..

الكل: عليكم السلام ..

الجوهره: هلا خالي ..

سلمان: هلا يبه .. جوجو فديتج ماي بارد ..

الجوهره: ان شاءالله ..

يوسف: عيل راحت هنوده ..

سلمان: اي والله .. ايه عليها .. من اللي بلعوزه بعد اليوم ..

يوسف: هههههه .. اي والله بشتاق حق عبطها ..

سلمان: والله صاحت لين قالت بس ..

يوسف: مسكينه .. الله يرجعها بالسلامه ..

سلمان: آمين ..

دخلت الجوهره وتموا شوي يسولفون مع بعض .. اتصلت فاطمه بيوسف عشان يمر ياخذها .. استأذن منهم وراح لها طيران .. وصل عند بيتهم واتصل لها .. هي كانت تنتظره فالصاله ..

يوسف: حبيبتي ..

فاطمه مبتسمه: هلا والله .. وصلت ؟

يوسف: اي حبيبتي ..

فاطمه: الحين طالعه ..

سكرت منه وطلعت له .. كانت تمشي وعيونها على السياره .. يوسف كان يناظرها من بعيد ومبتسم ..

يوسف " فديت هالطول .. فديت هالجمال .. يا ربي عليها .. والله ذبت فيها هالبنت " .. قربت فاطمه من السياره ويوسف مد يده فتح لها الباب.. كان يراقبها وهي تركب السياره .. قعدت جنبه وسكرت الباب ..

يوسف مبتسم: تباركت سياراتي يا حبيبتي ..

فاطمه بخجل: زين بنوقف وايد ..

يوسف: اوه نسيت نفسي .. بعد من يشوفج ما تبينه يضيع ..

فاطمه: ههههههه ..

يوسف مسك يدها وحرك طالع من بيتهم .. فاطمه ضغطت على يده بنعومه .. تم ماسك يدها طول الدرب وهو يسوق بهدوء ويسولف معاها .. اتصل فيه عبدالعزيز ..

عبدالعزيز: وينك يالشيخ ؟

يوسف: اوه .. تصدق نسيت موعدنا ..

عبدالعزيز: صج والله ..

يوسف: شاسوي .. مدام معاي القمر مالي ومال النجوم ..

عبدالعزيز: شقصدك ؟

يوسف: انت وين ؟

عبدالعزيز: انا رايح بيتكم ..

يوسف: وانا رايح بيت يدك ..

عبدالعزيز: شو تسوي هناك ؟

يوسف: ناس فديتهم طلبوا مني خدمه .. وماقدرت اردهم .. تعرف مثل هالناس .. طلباتهم اوامر ..

عبدالعزيز: صج والله .. زين اوريكم انتوا الثنين ..

يوسف: من احنا الثنين؟

عبدالعزيز: عرفت من تكونون ..

يوسف: هههههه .. زين بس انزل المدام بيت يدك وبجيك البيت .. ادخل الميلس وخذ راحتك ..

عبدالعزيز: ما تقصر يا بوخليفه .. بس غصبن عنك باخذ راحتي ..

يوسف: هههههه ..

سكر يوسف من عبدالعزيز والتفت على فاطمه .. تم يطالعها بحنان .. وصل بيت يدها ودخل الحوش .. كانوا كلهم فالحوش .. الجد شاف يوسف وقام له على طول ..

الجد: حيالله هالولد النشمي ..

يوسف نزل من السياره وسلم على الجد ..

يوسف: الله يحيك .. شحالك يبه ؟

الجد: طيب طاب حالك الغالي .. اعلومك يبه ؟

يوسف: الحمدلله طيب ..

الجد: اخبار بنتنا ؟

يوسف: اسألها ..

الجد: ها فطيم يبه .. شخبارج مع هالمزيون؟

فاطمه منحرجه: الحمدلله يدي ..

الجد: والله عرفت من تختار يا يوسف .. فاطمه الماسه ..

يوسف بهمس: فديتها ..

فاطمه: زين انا بروح داخل .. تامروني على شي ؟

الجد: لا يبه .. الله يحفظج ..

يوسف: الله وياج ..

راحت فاطمه وهي طايره من الفرح .. وكانت ام فارس تراقبها وهي مستانسه لفرحة بنتها .. بس قلبها متقطع على فارس .. تفكر فيه وايد .. ودها تشوفه معرس ..

يوسف تم يسولف مع الجد شوي .. سلم عليه وراح بيتهم حق عبدالعزيز .. طلعوا يتمشون وراحوا القهوه .. مر هاليوم حلو للكل .. فاطمه و يوسف احلى عصافير .. فارس ردت فيه الروح بعد ما سمع احلى خبر من مناف .. مريم و خالد مشغولين بتجهيزات العرس اللي ما بقى عليه الا كم يوم ..

انشغلت العيلتين بتجهيزات العرس .. فارس طلع مع عبدالله وفيصل .. راحوا المجمع و تونسوا .. دخلهم السينما وتعشوا .. وبعدين رجعهم البيت .. مر هالاسبوع والكل مشغول بنفسه حق عرس مريم وخالد .. مريم كانت متوتره وحاسه برهبة الموقف .. خالد كان ميت من الشوق .. ام فارس كانت طايره من الوناسه .. وما خلت شوي ما سوته من فرحتها .. اما ام محمد كانت فرحتها بفرحة ام فارس .. هيا كانت تشارك الكل في التجهيزات بوفارس و بومحمد والجد كانوا يعابلون عرس الريايل .. فارس ومحمد وباقي الشباب كانوا يرتبون الخيمه مع العمال .. الجوهره كانت عندها مفاجأه حق سلمان و يوسف وهنادي وابراهيم .. هنادي و نواف كانوا عايشين احلى ايام الحب والرومنسيه في ميونخ ..

الجوهره: ابراهيم حبيبي ..

ابراهيم ترك الجريده اللي بيده والتفت عليها مبتسم ..

ابراهيم: هلا حبيبتي ..

الجوهره: ابي اكلمك في موضوع ..

ابراهيم باهتمام: قولي حبيبتي ..

الجوهره بدلع: تبي تعرف الموضوع يا بوخليفه ..

ابراهيم بوناسه: هااا .. بوخليفه .. فديت قلبج يا جوهرتي الغاليه ..

ابراهيم من وناسته شل الجوهره وحضنها بفرح .. الجوهره كانت مستانسه من ردة فعل ابراهيم ..

ابراهيم: مب**ك يا اغلى ام فالدنيا .. مب**ك يا ام خليفه ..

الجوهره منحرجه: الله يبارك فيك حبيبي ..

ابراهيم قعد على الكرسي وقعد الجوهره جنبه وتم يطالعها وعيونه تحكي فرحته ..

ابراهيم: قلتي لاحد ؟

الجوهره: انت اول واحد ..

ابراهيم باس راسها: الله يبشرج بالخير .. والله اني طاير من الفرحه ..

الجوهره: فديت روحك حبيبي ..

ابراهيم حط راسه في حضن الجوهره وتم يسولف معاها .. الجوهره كانت تلعب في شعر ابراهيم ..

ابراهيم: تتوقعين بكرنا بنت ولا ولد ؟

الجوهره: والله مادري ..

ابراهيم: شتفضلين ؟

الجوهره: ما تفرق عندي .. اللي يجي من الله حياه الله .. وانت حبيبي ؟

ابراهيم: انا بعد ما تفرق عندي .. بس حبيبتي لو جات بنت ابي اسميها على امي ..

الجوهره مبتسمه: ولا يهمك حبيبي ..

ابراهيم مسك يدها وحطها على ص*ره .. غمض عيونه ونام في حضنها .. تمت الجوهره تتأمل ملامح ابراهيم ..

الجوهره " الله يحفظك يا ابراهيم " ..

سلمان و يوسف فرحوا بخبر حمل الجوهره .. واخيرا بيمتلي البيت يهال .. سلمان فرح من خاطره .. و وعد نفسه انه يحب كل عيالهم و يكون له دور كبير في تربيتهم .. ويكون مسؤل عنهم .. اما يوسف فرح لاخته وتمنى الوقت لو يمر بسرعه ويشوف عياله يلعبون بحضنه .. احساس الابوه فاض في خاطره .. الجوهره اتصلت لهنادي وبلغتها بهالخبر الحلو .. وهنادي فرحت وايد لاختها .. حست ان فرحتها اكتملت بالخبر الحلو ..

اليوم هو اليوم الموعود لمريم وفارس .. والفرحه عمت البيتين .. في بيت بوفارس .. البنات من الظهر راحوا الفندق .. عشان يتجهزون .. هيا وام محمد وام فارس نزلوا يشرفون على القاعه .. الكل كان مرتبش .. البنات كانوا يتعدلون .. والجوهره كانت معاهم ..

مريم: فديت هنوده .. تمنيتها معانا ..

الجوهره مبتسمه: فديت قلبج يا عروسه .. انتي الحين خلج من هنوده وغيرها .. انتي اهم حدث اليوم ..

فاطمه: صح .. انتي اهم شي .. لا تشغلين بالج ..

الجوهره: لا تتوترين مرايم ..

مريم مسكت يد الجوهره وابتسمت لها ..

مريم: بحاول ..

تموا البنات يتعدلون والحريم يعابلون القاعه تحت .. الساعه 7 ونص هيا راحت الغرفه عند البنات ..

هيا: ها بناتي خلصتوا ؟

ايمان: باقي شوي عميمه ..

هيا: زين من خلصت مكياج ؟

ايمان: انا والريم خلصنا ..

هيا: ومن يتمكيج الحين ؟

ايمان: فطومه ..

هيا راحت صوب فاطمه ..

هيا: فديت هالعيون والله ..

فاطمه: هلا عميمه ..

هيا: من بعدج ؟

فاطمه: مرايم ..

هيا: الجوهره ما تمكيجت ؟

فاطمه: بلا تمكيجت من العصر .. انتي بعدي عميمه ؟

هيا: ان شاءالله .. زين سمعي حبيبتي ..

فاطمه: هلا ..

هيا: خلصوا ونزلوا القاعه زين ..

فاطمه: ان شاءالله ..

ايمان والريم خلصوا من تسريحاتهم .. لبسوا ونزلوا مع الجوهره .. هيا وفاطمه خلصوا ونزلوا مع بعض .. تمت مريم بروحها فتره وبعدين رجعت لها فاطمه .. كانت مريم تضيف اللمسات الاخيره على نفسها .. لبست الفستان بمساعدة فاطمه اختها .. رتبت نفسها وتمت تنتظر ينادونها عشان تنزل .. فاطمه كانت معاها ..

فاطمه: مرايم تجنين ..

مريم: فديت عيونج يا فطيم .. فطيم بقولج شي ..

فاطمه: قولي ..

مريم بخوف: خايفه من خالد ..

فاطمه بدهشه: شلون ؟ و ليش ؟

مريم خنقتها العبره: تذكرين سالفة الجنيه اللي طلعت له .؟

فاطمه مبتسمه: اي ..

مريم: اخاف تطلع لي .. يا ماماي ..

فاطمه: هههههه .. من صجج انتي ..

مريم: اي والله من صجي ..

فاطمه: خالد رجع احسن من قبل وما عليه شر .. بس انتي لا توسوسين .. يعني تطلعين معاه وتكلمينه فالتلفون ما حسيتي ان فيه شي؟

مريم: لا هو وايد عادي ..

فاطمه: عيل ليش متخرعه ..؟

مريم: لان خالد قالي السالفه ..

فاطمه عقدت حواجبها: اي سالفه ؟!

مريم: سالفته كامله .. مره قالي انها طلعت له وقالت له باخذ منك مريم .. ابيه خايفه ..

فاطمه حضنت اختها: مرايم ما عليج من هالكلام .. وبأذن الله ما عليكم شر انتي وخالد ..

مريم: الله يريح قلبج يا فطيم ..

فاطمه: زين لا تصيحين تخربين المكياج ..

مريم: ههههه .. زين

تموا مع بعض فتره لين اتصلت لهم هيا ..

هيا: فطومه .. ابوج جاي الغرفه .. لبسي اختج و تجهزوا ..

فاطمه: ان شاءالله عميمه ..

سكرت من عمتها والتفتت على اختها ..

فاطمه: يلا مرايم .. ابوي جاي ..

مريم: زين ..

بوفارس طق الباب ودخل على بناته ..

بوفارس مبتسم: فديت بناتي والله ..

فاطمه: والله فديتك انت يا بوفارس .. اللي يشوفك يقول انت المعرس ..

بوفارس: هههههه ..

دخل فارس وكان يمدح في خواته ..

فارس: شهالزين .. حلاتين حلاتين .. لو مو خواتي جان تزوجتكم ثنتينكم بليله وحده ..

الكل: ههههههه ..

بوفارس: الله يحفظكم من عيون الناس ..

فارس: زين يلا فطيم .. غطي مرايم خل ننزل ..

فاطمه: ان شاءالله ..

لبست فاطمه عبايتها .. وغطت اختها .. ونزلوا هم الاربعه .. وصلوا لين القاعه .. بوفارس وفارس راحوا برا بعد ما وصلوا البنات لين القاعه .. طلعت ام فارس عند الباب و دخلت بنتها .. مريم دخلت وكل الانظار متوجهه لها .. ام فارس صاحت من فرحتها .. ومريم كانت متوتره ومنحرجه .. و صلت للكوشه والكل قام يسلم عليها .. تمت فتره وبعدين دخل خالد .. اول ما دخل مريم كانت شوي وتصيح .. بوفارس وبومحمد دخلوا مع فارس .. خالد كان مستانس .. وشكله طالع يجنن .. وصل لين الكوشه .. ومريم كانت منزله راسها من الخجل والتوتر .. خالد قرب من مريم رفع راسها وباس جبهتها .. وقف جنبها وهو مبتسم .. بوفارس سلم على بنته .. وبومحمد سلم عليها .. الجد كان جاي من اخر القاعه وهو معصب ..

بومحمد: ويه نسينا ابوي ..

خالد: الله يعينكم عليه الحين ..

بوفارس: شبيفكنا من ل**نه ..

بومحمد: اخاف من هالخيزران اللي بيده ..

بوفارس: معقوله يسويها ..

خالد: مو غريبه على يدي ..

قرب الجد من الكوشه ..

الجد: تروحون عني ..

بوفارس: ما رحنا عنك الغالي .. بس على بالي انك ورانا ..

الجد: انا بسنعكم لي ظهرنا من هني ..

بومحمد و بوفارس تموا يطالعون بعض مبتسمين .. الجد سلم على مريم وخالد و وقف يتصور معاهم .. البنات راحوا يتصورون معاهم بعد .. بوفارس كان مستخف على الريم وايمان ..

بوفارس " حليلهم البنات كبروا .. ماشاءالله عليهم " ..

خالد كان يسوي حركات حق مريم .. يمسك يدها وهي تسحبها من الخجل .. يرجع يمسكها مره ثانيه ويضغط عليها بقوه .. المعاريس قاموا بيطلعون من القاعه .. اول ما وصلوا باب القاعه استقبلهم فارس عشان يوصلهم فوق مع فاطمه .. الريم راحت صوب الباب عشان تشوف فارس .. كانت متعمده تروح وهي كاشفه .. شافها فارس وتم يطالعها بانبهار .. الريم استغلت الفرصه وابتسمت له بدلع .. فارس هز راسه ومشى .. باس مريم وسلم على خالد .. عبدالعزيز سلم على اخته وخالد .. اما محمد الملهوف استرق النظر وشاف فاطمه على السريع عن خاطره .. صد وراح عند الشباب .. خالد ومريم راحوا فوق .. فارس وفاطمه اللي وصلوهم .. رجعوا البنات القاعه وكملوا وناسهتم .. اما الشباب طلعوا وراحوا ساحة الاستعراض ..

فارس: خفوا يا شباب ..

عبدالعزيز: لازم نمرن السياير حق الحلبه هناك ..

محمد: والله انتوا مب صاحين ..

فاضل: رووووووح يا سيارتي الخطيره .. وتم يحفص ويسوي حركات ..

سلمان كان يطالعهم وهو مبسوط على نشاطهم وبرأتهم .. يوسف وعلي تسابقوا على الخط السريع .. والشباب تراهنوا عليهم .. واللي فاز علي .. واللي خسروا هم فاضل و فارس و سلمان .. اما محمد وعبدالعزيز فازوا فالرهان .. وكان رهانهم .. ان لو فاز علي الفريق الثاني يرجعون البيت حفي .. ( بدون نعل ) .. ولو فاز يوسف الفريق الاول يدخلون الفندق حفي ( بدون نعل ) .. بس من حسن حظ اللي شجعوا علي انه فاز ..

علي بشماته: هههاااااي .. فصخوا اشوف .. خل اخذ لكم لقطه تذكاريه .. بذلكم فها ..

سلمان و فارس و فاضل ويوسف وقفوا جنب بعض عشان علي ياخذ لهم لقطه ..

محمد بنذاله: لا رفعوا ثيابكم عشان تطلع الصوره حلوه ..

سلمان: قمة النذاله ولد عمك ..

فارس: تعلمني فيه ..

فاضل: مردوده ..

عبدالعزيز: النسيب هالصوره بوريها للمدام ..

يوسف: اذكر ربك وصل على النبي يالنسيب ..

الكل: ههههه

علي: يلا يالخسرانين .. لاتضيعون الوقت ..

الشباب رفعوا ثيابهم و علي خذ اللقطه الخطيره .. محمد جمع نعلهم وحطها في سيارته ..

محمد: يلا كل واحد يركب سيارته ويروح بيته ..

فارس: والنعل ؟

علي: اتفاقنا انكم ترجعون البيت حفي ..

عبدالعزيز: احم احم ..

يوسف: وجع ..

الكل: هههههه ..

يوسف: صدقوني مردوده ..

كل واحد من الشباب ركب سيارته .. وكانوا حاسين بالاهانه انهم ركبوا بدون نعلهم ..

علي: سباق شباب ..

يوسف بتحدي: قدام ..

......................

كل الشباب داسوا على الريس و شالوا عليه .. طبعا علي كان اولهم .. بس يوسف تحداه وداس حده وطافه .. فاضل لحقهم .. وتموا يزرقون بين السياير فالشوارع .. سلمان و محمد وفارس كانوا يسوقون وراهم بس ما كانوا يتسابقون معاهم كانوا دايسين الريس حده .. يوسف من سرعته طار عند اللفه و سلمان خاف عليه .. اما يوسف كان مستانس على الحركه ..

يوسف: واااااااااااااو .. روعه .. روعه ..

فاضل: والله خطير بوخليفه ..

علي: جابها برافو عليه ..

كملوا دربهم بسرعاتهم الجنونيه لين كلهم تجمعوا عند بيت بوفارس كلهم .. يوسف نزل وهو مستانس ..

علي: جبتها برافو عليك يا رجل ..

يوسف: ههاااااي .. شعور رائع ..

عبدالعزيز: بوخليفه انا اشهد انك فنان ..

فاضل نزل الجامه: عيل ما شفتوا هالحركه ..

شير التاير وطلع دخان وايد .. وكان صوت السياره مزعج بس خطير بالنسبه للشباب ..

يوسف: يا روحي على التشير ..

علي: كوووووول والله ..

سلمان ومحمد وفارس وصلوا ..

فارس مبتسم: بصراحه ابدعتوا ..

سلمان: يوسف خف مره ثانيه .. وعن الينون .. وراك مره ..

يوسف ابتسم بخجل: ان شاءالله ..

فارس: تفضلوا يا جماعه ..

كل الشباب دخلوا بيت بوفارس وكملوا سهرتهم .. لين اتصلت ام فارس في عبدالعزيز ..

ام فارس: عزيز يبه وينكم ؟

عبدالعزيز: احنا فالبيت ..

ام فارس: زين تعالوا اخذونا ..

عبدالعزيز: ان شاءالله .. ابوي وينه ؟

ام فارس: ابوك موجود بس السياره ما تكفي ..

عبدالعزيز: خلاص بنطلع من البيت الحين ..

التفت على فارس اللي كان مشغول بجواله ..

عبدالعزيز: فارس الاهل ينتظرونا فالفندق ..

فارس: يلا نروح نجيبهم ..

سلمان: زين احنا نستأذن يا جماعه ..

فارس: شدعوه يا بوخليفه .. بنرجع نكمل سهرتنا ..

سلمان: تاخر الوقت .. وانا تعبان ابي اريح شوي .. مادري عن يوسف اذا يبي يقعد ؟

يوسف: انا بعد ابي اروح اريح شوي .. بكره عندي شغل ابي اخلصه من الصبح ..

سلمان و يوسف استأذنوا وراحوا البيت .. فارس و عبدالعزيز وباقي الشباب راحوا القاعه يجيبون الحريم .. اول ما وصلوا دخلوا عند باب القاعه راح صوبهم جاسم ..

جاسم: امي تقول تعالوا داخل القاعه ..

عبدالعزيز: جسوم في حريم ؟

جاسم: بس احنا ..

فاضل: خساره ..

محمد: لو خالد هني .. مب كفو تتكلمون جي ..

الكل: هههههه

علي: خالد مب في فنكم الحين ..

فارس: اعتقوا الريال شوي ..

عبدالعزيز: يا ليلي الليل عليك يا خالد ..

محمد: بسكم عاد ..

فاضل: ما نفتك من خالد تطلع لنا انت ..

علي: ولين ..

كملوا دربهم للقاعه .. اول ما دخلوا البنات كانوا قاعدين على الطاولات يسولفون ويضحكون .. طبعا محمد راح عند ساره .. فارس راح عند خواته .. الريم كلت فارس بعيونها .. وفاطمه كانت تراقبها ..

ايمان: عيونج ريمو ..

الريم انحرجت: نعم ؟

ايمان رفعت حاجب: اقول فديت عيونج ..

الريم ابتسمت بتوتر وراحت صوب امها .. فاطمه ما عرفت تفسر حركة ايمان وتمت تفكر فيها ..

فارس: شو هالزين ام فارس .. اخاف انتي العروس ؟

ام فارس مبتسمه: فديت قلبك والله .. انت اللي طالع معرس ..

فارس: فديت عيونج يالغاليه ..

ام فارس: يعلني اشوفك معرس .. وطالعت الريم ..

فارس طالع الريم وصد على طول .. اما الريم كانت طايره من الوناسه .. فاطمه كانت تراقب بهدوء ..

ايمان: انا بختار لك عروسه يا فارس ..

فارس باستهزاؤ: غيرج كان اشطر ..

ايمان: افااا .. شلون ؟

فارس: شلون عاد هاذي مب شغل يهال ..

فاطمه: هههههه ..

الريم كانت تسمع كلامهم و هي ميته من القهر .. تموا شوي فالقاعه وبعدين كلن توجه لبيته .. فاطمه ركبت مع فارس وايمان مع ابوها وامها و جاسم .. عبدالعزيز كان محتج لان محد ركب معاه .. رجعوا البيت ويوسف اتصل بفاطمه ..

يوسف بشوق: حيالله هالصوت ..

فاطمه: هلا فديتك ..

يوسف: شخبارج حبيبتي ؟

فاطمه: طيبه الله يسلمك .. اعلومك ؟

يوسف: فديت هالصوت .. من سعت صوتج ردت فيني الروح ..

فاطمه بوناسه: فديت روحك يا يوسف ..

يوسف بهمس: فطومتي ..

فاطمه: هلا حبيبي ..

يوسف بهمس: احبج ..

فاطمه دمعت عيونها من الوناسه ..

فاطمه: فديتك يا يوسف .. وانا بعد احبك ..

يوسف ضاعت اعلومه يوم سمع احبك من فاطمه .. غمض عيونه وابتسم ..

يوسف: فديت قلبج يا فطومتي ..

فاطمه: الله لا يحرمني منك يا يوسف ..

يوسف: حياتي والله ..

تموا يسولفون لين أذن الفجر ..

يوسف: حبيبتي ..

فاطمه: هلا ..

يوسف: طولت عليج وانتي راجعه من العرس وتعبانه ..

فاطمه: بالع** يا يوسف .. افرح لما اسمع صوتك ..

يوسف: يا قلبي انتي ..

فاطمه: فديت قلبك .. زين يلا قوم صل لان أذن من 10 دقايق ..

يوسف: ان شاءالله حبيبتي .. انتي متى بتنامين ؟

فاطمه: بصلي وبنام ..

يوسف: ممممم ..

فاطمه: قول ..

يوس: زين تنتظريني لين ارجع من المسيد ؟

فاطمه مبتسمه: ان شاءالله ..

يوسف: حياتي والله .. بس ابي اسمع صوتج قبل ما انام ..

فاطمه: ان شاءالله ..