JAKAMOYO NA HADITHI NYINGINE

Ilitokea siku ambayo tajiri mmoja alikisia kufanya mapenzi na mjakazi wake anayesaidia kusafisha afisini mwake. Mjakazi huyo kwa jina la Zora, aliwahi kazini ambako ni Ofisi kwa muajiri wake na kisha kuendeleza kazi za usafi kabla tajiri kufika. Tajiri alipofika dakika chache tu, kabla ya Zora kukamilisha usafi, alimpa mkono kwa salamu. “Hujambo dada?” Alimsalimu Bw. Kababa. “Mara haba Bwana Mkubwa.” Alijibu kwa ustaarabu Zora. Lakini jambo lililomstaajabisha Mjakazi ni kuwa, alipompa mkono Bw Kababa kwa heshima ya salamu, Bwana huyo hakuweza kuuachilia mkonowe Zora kwa wepesi. Salamu kwa mkono, ulibadili maudhui ya kazi na kutawala manthari ya kuchumbiana. Wafanyavyo wapenzi, Bw Kababa aliubana mkono wake Zora kisha akamkazia jicho lililoeleza kwa bayana hisia za kwake. Ama kweli usilolijua jambo ni sawa na usiku wa giza. Dakika chache, walionekana wote wameambatana kuelekea garini. Haikosi muda huo ofisini kulitokea maelewano ya kimapenzi baina yao. Siku hiyo, wengi wa wafanyakazi chini ya uongozi wa Bwana Kababa, walisalia kutikisa vichwa vyao huku wamebana midomo lisitokee la kutamka kutokana na kisa hicho. Siku iliyofuatia, minong’ono ilienea kote mjini Kazamwendo, jinsi wawili hao walivyojistarehesha mnadani Pumzika Resort. Haikosi ilihesabika siku ya kwanza kwake Zora kukionja kinywaji chenye makali mpaka kujisahau. Kilichofuatia ni wote wawili kuzinduka usingizini na kujikuta chumbani mwa Bwana Kababa hasa kitandani. Asubuhi hiyo hamna aliyekuwa na jawabu ni jinsi gani wamejikuta pale na nini hasa kilichotukia walipokuwa mle chumbani. Aisee! Haikosi Bwana Kababa alipata fursa ya kusoma katiba kwa ustaarabu usiku huo. Wote wawili walionekana kujawa na maswali sufufu Kupitia nyuso zao zilizoeleza masikitiko makali. Waama, majuto ni mjukuu, huja baadaye. Ikawa Sasa imepungua miezi miwili mwakani elfu Kenda mia tisini na nne. Zora alianza kuhisi dalili za uja uzito. Ingawa mwanzoni hakuelewa manake aliishia kusikia kutoka kwa Wengine kuhusu uja uzito, na hapo yalimfika yeye. Alijaribu kuvumilia hali hiyo lakini ikamzidi. Alikata kauli ya kuenda zahanatini kupata jawabu mwafaka. Alistaajabishwa sana mara daktari alipomueleza, yeye ni mama mtarajiwa, na angejifungua miezi sita mbeleni. Kwa kweli, mtoto wa watu angefanyaje ilhali yalikuwa yameshamwagika, na kamwe hayangeweza kuzoleka. Alikubali hali hiyo, na Kupiga guu mosi guu pili, hadi kazini afisini kwa Bw. Kababa. “Welcome mammy…” Kwa madaha alimkaribisha mjakazi afisini kwake huku furaha imemtawala usoni mwake. Kwa upande mwingine Zora alivalia tabasamu la bandia. “Shukran Mkuu.” Alijibu Zora. “Hivi ni siku mbili Sasa haven’t seen you at work, nini kikubwa labda? Aliuliza bwana Kababa. “ Ni kweli usemavyo mkuu, sijaweza kufika kazini kama ilivyo ada yangu. Ila samahani, naomba nisiyanene mengi. Labda tu nikutaarifu kuwa, mimi ni mja mzito. “What!!!.... Eti unasemaje… Labda sijakupata hebu rudia!...” Aligutuka bwana Kababa. “Ndiyo… Mimi ni mja mzito, na wewe ndiye mwenye majukumu kwa taarifa yako.” Alisema haya huku ananing’inia machozi mbooni mwake, lakini machozi hayo, hayangeweza kuzuilia tetesi zake Bwana Kababa. Alishinikiza kwamba yeye hana lolote wala hahusiki na uja uzito wa mjakazi wake. Alifungua droo na kitita Cha pesa, kisha akampa Zora na kuamrisha aavye mimba ile. Wasemavyo, aliyetapakaa kinyesi ovyo, husahau ila kwake yeye aliyekanyaga, kamwe huishia kukumbuka. Kwa heshima na taanzia za kwake, Zora alipokea pesa zile, na kisha akaondoka zake. Ingawa mwingi wa majonzi lakini lisilobudi. Alipoteza kazi na kusalia omba omba ili asitiri uja uzito mpaka kujifungua. Alhamdulilahi! Mola hamuachi mja wake. Zora alibarikiwa na mtoto wa kike. Alimpa jina Zawadi. Ikawa siku moja, Zawadi na mamake Zora, wanaandaa chajio. Zawadi alibadili hali ya kwake ghafla. Haikosi mawazo yake yalitalii mbali na kwao. Kisha alimuuliza mamake, “Nataka kufahamu aliko baba…wenzangu wameishia kuniita Mwanaharamu. Baba yuko wapi?” Kweli swali hili lilimzungusha Bi. Zora darmadaru kisha likamueka sawa. Alishindwa ni wapi ataanzia kueleza aliko baba mtu. Kilioonekana ni machozi yaliyomtoka na kutiririka kuwili shavuni mwake. Zawadi naye nani, alikazia na swali lake. Bi. Zora alieleza yalitokea mwanzoni mpaka akamzaa Zawazi. Alimuonyesha baadhi ya picha za Bwana Kababa kabla ya tukio. Alimpa matumaini ya kumpata babake ila shingo upande.