Pumalahaw na ako ng iyak nu’ng nakaalis na kami sa lugar. Tahimik lang naman sa gilid na nagmamaneho si Landon. Hindi siya nagsasalita. Hinahayaan niya lang akong umiyak. Hindi ko alam kung saan kami pupunta pero bahala na rin siya. Humagulgol lang ako sa gilid hanggang sa huminto kami sa tabi ng daan. Sa unahan ay may balut vendor.
“Gusto mo?” tanong niya. Napalunok naman ako at inirapan siya.
“Sino ba may gustong kumain ng balut gayong broken hearted?” inis kong sagot. Nagkibit-balikat naman siya.
“Ako, hindi ako broken. Natatakam ako sa balut pero kung ayaw mo hindi naman kita pipilitin. Buti nga tinanong kita eh,” asar niyang sagot.
“Tsk, galit ka ba?” tanong ko. Hindi naman siya nagsalita at lumabas na ng kotse. Nakaramdam naman ako lalo ng inis. Lalo tuloy akong naiiyak. May
