البارت الثاني

1886 Words

ماجدة: انت من كل عقلك تحجي يا حارث سرى طفلة شلون انطيها حارث: ليش لا يا ماجدة انتي تشوفين عماد ينرد رجال والنعم منه ماجدة: الشغلة مو شغلة مو خوش رجال لو بي عيب بالع** رجال الا هيبة ومكانه والكل يحترمه بس ليش راد سرى بالذات وليش م**م عليها ليش ماخطب رسل او غسق شمعنى سرى حارث: انتي تدرين بعماد اطباعه شلون صعبة وفاطمة تكول يريدله بنية زغيرة بالعمر حته يعلمها ع اطباعه ماجدة: ولله مادري بس گلبي مامرتاح سرى الوحيدة من بين خواتها هادية ودومها معتزله وما بيوم اذت احد اخاف عماد مايفتهم طبعها ويأذيها ثانيا دراستها شلون وهي كله تطلع من الاوائل معقولة تترك دراستها وتتزوج حارث: شبيج يا عيني قابل گال باجر راح اجي اخذها هسه خطبة بس وبعدين معقولة تگولين عماد يأذيها عماد تربيتنا ولنعرفه احسن من الي ما نعرفه ماجدة: ولله مادري بكيفك بعد حارث: اتركي السالفة يمي سرى بقيت جامدة بمكاني واني اسمعهم معقولة الي دا اسمعه حقيقة لا ياربي لا تحكم عليه بالموت ..شيريد مني ما كفاه الي سوا بيه ليش يريد يدمر حياتي ليش ركضت ودخلت للغرفة لاگاني اكرم واكف يم الباب منتظر رسل حته يرحون للكلية جانوا بنفس الخط اكرم بصوت: يلله رسل عندج عرس الخاطر ربج عبرت من يمة واني مدنكه حته لا يشوف وجهي اكرم: العالم تكول صباح الخير حجيت بصوت مختنك: صباح الخير اكرم: شبيج من الصبح گالبة خلقتج صاير شي هزيت راسي بمعنى لا ودخلت للغرفة حته لا يفتح تحقيق ويايه طلعت رسل راحت للكلية وغسق كملت تبديل وطلعت تتريك طلعت ملابسي اريد ابدل ماكدر احس ايدي ترجف وما مسيطره ع نفسي شدا يصيرلي ياربي ليش هيج احس ماگدر اسوي شي بعد رجليه بقن يرجفن ووگعت بالگاع واحس جسمي نمل وبردت متت برد اريد اكوم ماگدر اريد صوتي يطلع اصيح الماما ماكو ضليت گاعدة بالگاع شويه ودخلت غسق تاخذ جنطتها وشاف*ني غسق; عزه لسه مامبدله شجنتي تسوين لعد اريد احجي وياها صوتي ما يطلع بقيت بس اباوعلها ودموعي تصب تقربت عليه وكعدت يمي من شاف*ني هيج غسق; سرى شبيج شصارلج ليش ترجفين حطت ايدها ع راسي وعاطت: ولج انتي مشتعله نار اروح اصيح ماما تشوف شبيج عاف*ني وطلعت تركض شويه ودخلت ماما مخترعه وغسق وراها كعدت يمي وحجت: شبيج بنيتي هاي شوكت اجيتي ليش هيج حالج ماما تحجي وياج واني ما اكدر اجاوبها صاحت البابا وگومتني حتى ياخذوني للمستوصف وخلت غسق تروح للمدرسة وحدها رحنه اني وياها وبابا حرارتي مرتفعة كلش انطوني علاجات ورجعنه للبيت ماما حطتلي ريوگ وكلتني گوه وبعدها شربتني علاجي شويه صخونتي خفت وصرت احسن بس اني بالي مو يمي بالي كله باللي سمعته الصبح الرجفة البيه مو برد ابد ارجف خوف من الي منتظرني خوف من حياتي الجاية اوووف ياربي لو تموتني لو ترحمني تعبت بقيت ع حالتي متمددة بالفراش امي ماداومت علمودي حطتلي غدة وتغديت وغفيت وره الغدة مادري بنفسي گعدت ع صوت خواتي يسولفن گعدن يمي واطمنن عليه وراهه دخل اكرم گعد يسولف ويصنف ع البنات وحمودي اخويه الزغير اكرم: يلله فضيها عاد گومي مو شفتي اليوم مدلليج حلالج الجو وصدگتي روحج غسق: اي عيني شعليها متكركحة وكاعدة لا دوام لا وجع راس سرى: هههه ولكم ولله تعبانة مدا اجذب شويه ودخل محمد يركض محمد: سرى سرى صديقتج بره سرى: منو محمد: مادري ماما گالت اصيحج عفتهم وگمت طلعت من الغرفة لاگتني ماما سرى: منو عدنه ماجدة: صديقتج لما اجت تسأل عنج لأن ممداومة اليوم.. دخلتها بالاستقبال روحيلها رحت دخلت للاستقبال جانت لما گاعدة اول ما شاف*ني گامت واجت عليه حظنتني وباستني لما: شلونج ولج رحت الغسق اليوم سألت عنج لأن ممداومة كالتلي مريضة خيرج سرى; مابيه شي لا تخافين حبيبتي لما: استغربت لآن ممداومة عرفت بيج شي مو عوايدج تغيبين سرى: تخربطت ولله الصبح مكدرت اداوم ماگدرت اگلها باللي بيه شنو بالرغم من لما صديقتي الوحيدة واقرب شخص الي بس ما حاجيتلها عن الي سوا عماد بيه ماتجرأ اسولف لأي احد عن هالموضوع ضل سر بيني وبين نفسي مانطيته الاحد حتى اهلي اخاف بيوم انفضح والكل يدري ويگدر عماد بكل سهولة ينكر لان ماعندي اي دليل عليه وحتى امه تهديدها ماراح انساه بيوم كعدت لما شويه يمي وكامت سرى: وين بعد وكت لما: لا ولله ماكدر غيث منتظرني بره هوه جابني هاج هذا جدول باجر وكتبتلج كل التحاظير جوه و اي شي تردي بعد رقم ماما عندج راسلي لا تستحين سرى: مشكوره عمري ولله ماعرف شسوي بدونج لما: شسالفة شمسويه قابل يلله باي طلعت وراها اوصلها للباب فتحت الباب وطلعت وجان هوه واگف شوي بعيد عن بابنه لابس تراك سمائي يجنن هاللون طالع عليه جان واگف منطينه ظهره منتجي ويگلب بتلفونه راحتله لما والتفت وشافني واگفة بالباب اجت عينه بعيوني وابتسم احس گلبي رجف من شفته ابتسملي مادري ليش بس هوه احس بالامان من اشوفه ما شكيت بي ولا بيوم واني الي حتى بأبويه اشك سديت الباب ودخلت للبيت واني نفسيتي مرتاحة من شوفته حتى عماد نسيته الساعة صارت 5 واني ما شايفة بيبي دخلت اخذت كتبي وطلعت ماجدة: سرى وين رايحة يمة سرى: اروح البيبي ما شفتها اليوم ماجدة: اخاف متگدرين حبيبتي ترى بعدج ماصرتي زينة اخاف ترجعين تتخربطين سرى: لا ماما مابيه شي لتخافين ماجدة: اخذي علاجج وياج ولا تنسين من تتعشين تشربي هزيت راسي ورجعت جبت العلاج ورحت البيبي دخلت للبيت مالگيت احد بس نورس بت عمي كاعدة بالهول تخابر وتتمويع بالتلفون وتضحك هزيت ايدي بعدم رضا ودخلت ع بيبي گاعدة ع كرسي الصلاة وتسبح ماردت ازعجها عفتها ورجعت يم نورس لكيتها سادة الخط حجيت واني اكعد: مرحبا نورس: هلو سرى; اشو محد موجود نورس: دعاء راحت البيت اهلها وعمج خذاها يوصلها ماتجي الا بليل سرى: شعجب جاية يم بيبي نورس: گالو انتي مريضة متكدرين تجين وبعدين بصراحة فرصة هنا اخذ راحتي اكثر احجي براحتي بيتنه متروس اوادم سرى: لشوكت تضلين بسوالفج ماتوبين من مراسلاتج ومخابراتج حطت المخده بحظنها وانتجت: لاااا هذا غير هذا طگوگ طگوگ طگوگ يعني اذا يخطبني من صدگ امي داعيتلي سرى: شلون يعني نورس: عايش بالامارات عيني واهله ناس واصله والي يريده بس يآشر عليه يعني هذا اني حذرة ويا كلش مو مثل القبله اقطه برصيد رصيدين واگله بيباي سرى: الله يعينج ع نفسج نورس: روحي بابا روحي انتي وحدة عقدة مادري الياخذج شلون راح يتحملج عفتها وكمت دخلت يم بيبي وحجايتها ترن بأذني تذكرت عماد معقولة گدر يقنع بابا بهالسرعة شلون ياربي شسوي لو صارت السالفة صدگ والله مدا اتخيل نفسي شنو ممكن يصيرلي ساعتها صار وكت العشة ورحت البيتنه جبت عشه من ماما الي والبيبي ورجعت لان مرت عمي بعدها مارجعت تعشينه وكملنه وكمت غسلت الماعين ورجعتهن البيتنه ورجعت يم بيبي كملت دراسة بس احس فكري مشوش وبالي مو يمي ساعة بالي يروح يم غيث وشكد شوفته تريح نفسيتي وارجع بعدين اذكر عماد وينخمش گلبي من الي منتظرني لازم الگالي طريقة تخلصني منه.. بس شلون شلون واني مجرد شوفته تخليني استرجع كلشي صار لا اگدر اواجها ولا اگدر اوگف بوجه اهلي واگلهم لا اكيد راح يسألوني عن السبب وهوه لعبها صح وما خلالي مجال للرفض حته دراستي مامنعني منها اووووف ياربي ولله حاسة روحي راح اموت لميت كتبي وفرشت فراشي ونمت بسرعة من التعب گعدت الصبح وانعاد نفس الروتين وخلص الدوام بسرعة بس جان مبين عليه مالي خلگ شي وحتى لما ونور انتبهن وسألني بس ما نطيتهن جواب ما اگدر أمن بأحد واحجيله الي بيه حتى لو جانن صديقاتي طلعنه من المدرسة اني وغسق وماما وراحت لما ويه غيث وندى بس جان بيتهم قريب كلش ع المدرسة احنه مسافة بيتنه عن المدرسة ابعد جنه نمشي اني وماما وغسق وقبل لا نوصل البيتنه بشويه تفاجأت بسياره عبرت من يمي وجان غيث يسوقها وصلنه البيتنه وهوه وگف شويه عن بيتنه امي وغسق دخلن واني دخلت اخر وحدة وبقيت اباوعله جان كاعد بالسيارة ويباوعلي سديت بابنه بسرعة بس جان اكو زرف بالباب ضليت اباوع منه شافني سديت الباب وحرك هوه السيارة وراح اعرفها هالسيارة سيارة ابو لما جان مرات يجيبها النه بيها بس شعنده غيث لاحگني يمه گلبي احسه حيوگف مدري ليش بشوفته يضل گلبي يدگ بسرعة بس مو خوف ابد ..لا شعور حلو ماعرف شلون اوصفه تغدينه وجنه كلنه متجمعين بالهول اني كاعدة يمهم ادرس وهمه يشربون جاي ويسولفون وجان يدك تلفون بابا حارث: الوو… هلا هلا بيك هلا بالبطل شلونك… الله يبشرك بالخير… .الف مب**ك… .مو غريبة عليك خالي رجال وسبع طول عمرك… مايصير خاطرك الا طيب انشالله خير لا تفكر انته… الله وياك سلم ع الاهل سد بابا التلفون واني صابني مغص من طاريه جان وجه بابا مستبشر ومبين اكو شي ماجدة: خير ابو اكرم شصاير حجه وهوه مبتسم :عماد مسلمينه عمليه خطره كلش وقبل جم يوم خابرني وحجالي عنها وحذرته بس اليوم الحمدلله كدر ينجح بيها واترفع بدوامه وصارله منصب اعلى ماجدة: صلاوات ع النبي الله يزيده انشالله حارث: اي ولله هالولد صدگ يستاهل كل خير رجال والثلث انعام منه جان بابا يحب عماد كلش هوه مربي وكلشي يحبه بابا يحبه عماد حتى صار ضابط مثله واتصالاتهم ماتنگطع دائماً يتواصلون ويخبر بابا بكل زغيره وجبيره تصير عنده بالشغل جنت سرحانه وافكر وفاجآني صوت بابا حارث: سرى سرى: ها يابة حارث: اكو موضوع لازم تعرفين بي اني وامج جنه مأجلي وره ماتخلصين الثالث بس الرجال يريد يعرف رأيج ماجدة: شالقضية يا ابو اكرم اشوفك نسيت اتفاقنه لعد شحجينه امس حارث: ما تشوفين يامرة الرجال كلساع يخابر بعدين لا تخافين ماراح يتغير شي من الاتفاق حجينه هوه هوه بس نعرف رأي سرى بالموضوع همه يحجون واني احس ملك الموت واگف ع راسي يا ساعة روحي تطلع حارث: شوفي باباتي عماد ابن عمتج خابر قبل فترة وطلبج مني واني بصراحة يا بنتي لو الغير عماد مستحيل انطيج لأن اولا بعدج زغيرة وثانيا انتي تدرسين ومتفوقة واني شرطت عليه دراستج تكمليها والرجال مامستعجل مستعد ينتظرج علما تخلص السنة يالله يعقد عليج وعماد ترباة ايدي ماراح اكون مطمن عليج عد شخص اكثر منه عفتهم وكمت دخلت للغرفة واخواني يضحكون ويصنفون عبالهم مستحية ما يدرون باللي بيه احس نهايتي قربت بعد مابيها مجال كلشي صار اظلم بعيني گدر ي**ع كل الناس حتى اهلي شلون ياربي خلصني جنت حاطة ايدي ع راسي وافكر واندفع باب الغرفة ودخلت رسل عيونها بگصتها خزرتني ودارت دخلت وراها غسق خايفة وتباوع الرسل وتأشرلها عبالها ماشوفها صاحت رسل بصوت: شبيج خير ليش تآشرين وتغمزين راح اكلها قابل لو شفتيني دخلت جريتها من شعرها هياتني ممسوية شي ارتاحي غسق: كافي رسل ليسمعج بابا لو اكرم عيب رسل; لا ولله اني تگليلي عيب لو هالحية الي الها الف لو وخادعتنه كلنه هي الطيبة الحبوبة الي ع نياتها وتخاف من كلشي وهي تحفر من جوه ليجوه وبالاخير حصلت صيدتها تفاجأت من حجي رسل وماعرفت شنو تقصد سرى: شقصدج بهالحجي رسل: قصدي مب**ك عليج الضابط عيوني خوش صيدة سرى: وانتي ليش مغثوثة هالگد رسل: لا عيني سلامتج ليش انغث بس تگدرين تفهمينه ليش خطبج انتي بالذات وما خطبني لو خطب غسق مثلا وانتي حته من يجي متطلعين ولا تكعدين يمه الا اذا طلعتي عندج شي ويا من ورانه صحت عليها بصوت: رسل احترمي نفسج رسل: انتي لاحترمي نفسج وكافي بيني ع حقيقتج طلعتي غاشة العالم كلهم بس هاي كلاواتج مو عليه بسيطة يا سرى ولله لاخلي العالم كلها تعرف انتي شنو عاف*ني وطلعت واجت غسق كعدت يمي غسق: لتزعلين سرى ميخالف بس رسل تحب عماد من زمان ونصدمت لما خطبج سرى هزيت راسي الها وكمت اخذت جنطتي وانهزمت يم بيبي ماريد اشوف احد ولا اريد اسمع من اي احد كافي الي صار اليوم حقج يارسل بعدج متعرفي شنو ليش الكل عبالهم اني قابلة وميته عليه واني حتى ما اطيق اشوف وجهه بيبي جانت نايمة شويه ودخلت نورس يمي وكامت تخابر احس لعبت نفسي من تمويعها مدري شلون الي تحجي ويا متحملها اكيد مثل طينتها سدت الخط وحجت: شبيج اليوم وجهج مايگصه السيف سرى: ضايجة نورس: شعندج ضايجة يحظي وانتي افرغ من جيب ابوي سرى: يعني الي تضوج لازم تكون عدها علاقات مثلج نورس: حبيبتي اني ما اضوج الي يضوجني انزعه مثل اي حذاء قديم والبس واحد جديد بقيت صافنة عليها متعجبة من حجيها لهناك وسمعنه صوت دعاء مرت عمي تصيح يتبع……… .

Free reading for new users

Scan code to download app

App Store Google Play

Facebookexpand_more