أعد لي حياتي

چنة واگفين اني وبت عمي ع النهر نلعب سويه وبيدها ل**بتي تلعب بيها سرى: نورس انطيني ل**بتي اريد ارجع للبيت نورس: روحي امشي ولي مانطيج سرى: بس هاي ل**بتي كافي لعبتي بيهه هواي انطينياهه خلي ادخل للبيت نورس: ماا.. ما انطي ولي يلله مديت ايدي وجريتهه منهه وجنه واكفين عله حافة النهر سحبت الل**بة من ايدي ودفعتني بكل قوتها تزحلگت رجلي وبعد ما سيطرت وما لكيت شي كدامي اجلب بي غير بت عمي نورس ووگعنا ثنينه بالنهر ثنينه بقينه مجلبين بحديدة جانت عله حافة النهر ونصرخ بكل صوتنه ونبجي ونورس تغلط عليه وتبجي والجهال التمت علينه وشي راحت تركض عله بيتنه تگل لاهلنه اجت مرة عمي تركض شاف*نه ولطمت ع وجهه حيل كوثر: عزة العزاجن كون هاي شطيحجن هنا انحنت ولزمت ايدين بتهه وجرتهه من النهر وجنت منتظرة دوري حته تطلعني بس جانت بتهه تبجي وتشهگ نورس: ماما كله من سرى هي الوگعتنه گامت مرت عمي وسحبت بتهه من ايدهه واشوفهه اندارت تريد تروح وصرخت عليهه بكل صوتي سرى: عمة فدوة طلعيني راح اغرگ ماريد اموت كوثر: طبج مرض وموتتهم الله يخلصنه منكم انشالله خذت بتهه وراحت والحديدة فلتت بيه ووگعت ابطن الماي احس نفسي راح واختنگت والجهال تصرخ ارافس بأديه ورجليه جوه الماي احاول اطلع بس ماگدر اختنگت وبعد ما حسيت بشي وفتحت عيوني نايمة ابيتنه بعد ماتوقعت روحي متت گالتلي امي الجيران مطلعتني وجايبتني البيتنه مغمي عليه اني سرى من سكنة محافظة الديوانية عائلتي متكونه من ماما ماجدة وبابا حارث وخمس اخوة ترتيبي الصغيرة بين البنات ويجي وراي ولد بابا ضابط وماما مدرسة اخواني همه اكرم الجبير ورسل وغسق واني سرى وبعدين محمد جنه كاعدين ابيت جدي كلنه سويه احنه وعمامي جدي متوفي وبس بيبيتي عايشة جان عدي عمام اثنين واربع عمات عماتي كلهم مزوجات تلاثة منهن مزوجات بالديوانية وبيوتهن قريبة علينه عدا عمتي الجبيرة مزوجة ابغداد عشت طول عمري ابيت جدي اني واخواني واحنه نشوف كره وعداوة بيت اهل بابا لامي والنه جانوا يكرهون ماما لأن غريبة ومو منهم وهمه م***ع عدهم واحد من ولدهم يزوج غريبة كلهم مزوجين قرايب الا بابا جان ماخذ امي عن حب وجابر اهله عليها ومارايد غيرها والخلاهم يكرهونها اكثر ان هي متخرجة وموظفة مو مثل باقي نسوان عمامي وعماتي ربات بيوت جانت امي حريصه عليه واني واخواني وع دراستنه كلش وجنه كلنه متفوقين ومن الاوائل بفضلها بابا جان ملتهي بدوامه وشغله وماما جانت متولية امورنه كلها وبالرغم من الاذى الي جانت تتعرضله من بيت جدي بس جانت ماتگل اي شي البابا وتحذرنه مانحجيله شي وبيوم جانت عمتي الساكنة ابغداد زايرة عدنه ومن سمعن بيهه عماتي الباقيات كلهن اجن وصار بيت جدي هوسة طبعاً عمتي جان عدها عماد عمره 16 سنة وحسين وزهراء وزينب وجنان هذول كلهم زغار بعمرنه بالاضافة الجهال عمامي وعماتي الباقيات جنه نلعب كلنه سويه عدا عماد جان معزول عنه لأن مو بعمرنه وبيناتنه فرق جبير بالعمر جان بيت جدي بي حديقة جبيرة وكلنه العصر طلعنه نلعب بيهه ومتونسين لان جهال هواية والتمينه وگلبنه الحديقة بأصواتنه وصريخنه اني جنت الوحيدة من بين خواتي مدبدبة وبيضة وكل الي يشوفني يبقة يصلي ع النبي جان عمري بوكتهه خمس سنوات ومتونسه العب ويه الجهال شفت عماد طلع من البيت وبقه واگف صافن علينه واديه بجيوبه وگفت اني باوعتله وضحكت بوجهه وهوه هم ابتسم وبعدهه اجت اختي غسق جرتني من ايدي وركضنه اني وياهه نلعب بقيت اركض والعب منطلقة ويه الجهال وهوه واگف يباوعلنه من بعيد شويه وسمعته يصيح بأسمي عماد: سرى سرى جنت اركض وگفت والتفتتله واشرلي براسة بمعنى تعاي رحتله اركض وگفت يمة سرى: هااا عماد: تعاي وياي اگلج فد شي اخذني من ايدي وداني وره البيت وگفت وحاجيته وخر مني شبيك انته شتريد اريد اروح اكمل لعب عماد: تعاي نلعب لعبة حلوة انه وياج عوفي الجهال انتي كبرتي وحلويتي وكلشي بيج صار يجنن سرى: لا لا ماريد اريد اروح العب وياهم دا يلعبون لعبة حلوة عماد: واني راح العبج لعبة احلى من لعبتهم سرى: صدگ شنو اللعبة عماد: انتي بس نامي واني العب سرى: لااا ما انام بعدين ماما تض*بني الگاع وصخة اتدمر ملابسي تقرب عليه وعيونه حمرة تخوف دفعني ع الكاع وطحت وصرخت لان تعورت عماد: دنامي مو شعلتي اهلي نامي اشوفه هجم عليه وضليت اصرخ بكل صوتي وابجي وارفس بي ليش يريد يض*بني واني مامسوية شي سرى: اوووي وخر شبيك ليش تريد تض*بني وخر لا اگل البابا عليك اخلي يبسطك وخر لزم ايديه وبقه يرفع ابدلتي ويدور جوه وانه خايفة منه واصرخ وهوه سد حلگي بيده عضيت ايده حيل وهوه گمز وگمت اني بسرعة حته انهزم بس لزمني وجتفني حيل واني اصرخ وهوه يحجي حجي ما افهمه شنو وجان نسمع صوت عمة فاطمة ورانه وصاحت عليه بصوت فاطمة: عمااد شاف امه وعافني واني ابجي وانكت بملابسي الي توصخت تراب وطين من الگاع اشوف عمه فاطمة بقت تدردم عله ابنهه وتض*ب بي وتگله تريد تفضحني تريد تصخمني ولك انوب اندارت عليه وتقربت يمي لزمتني من ايدي حيل وجرتني فاطمة: اسمعي ولج ان سمعت لو دريت انتي گايلة الواحد ع الصار ما تلومين الا روحج اخلي ابني يعيد السوا وما ادخل ولا احميج… افتهمتييي ومن يومها بقت كلمتها ترن بإذني وتهديدها ما يروح من بالي وعيون عماد ابنها ماتفارگني عشت ايام افز بليل مرعوبة لان احلم بي يرجع يض*بني واهلي ميعرفون شبيه واخاف احجيلهم بسبب تهديد عمتي صرت انام بين ماما وبابا واني بعدني ما مأمنة انعزلت عن العالم كله تحولت من الطفلة المرحة الخابصة البيت بصريخها و***بها الوحدة هادئة منعزلة بس ساكتة وتتفزز بليل مرعوبة مضت الايام وكبرت وبيت جدي اتقسم وكل واحد من عمامي سواله مشتمل زغير بعد صراع طويل ومشاكل وطلايب واحنه هم صار عدنه مشتمل وگلنه خلصنه من المشاكل وارتاح بالنه بس الظاهر جنه غلطانين اني كبرت بس ماتغير بيه شي بعدني اخاف من كلشي اخاف حته من اهلي ابقه اصرخ لو شفت ماما لو بابا ض*ب واحد من اخواني يرجعلي الموقف نفسه شكل عماد وصوت عمتي مانسيتهن ابد جان اتعس وقت عندي لما تجي عمتي تزور عدنه ووياها عماد احاول اضم نفسي وما اطلعلهم ابد مجرد شوفتهم ماعرف شتسوي بيه خصوصا لما صار عمري 12 سنة جنت سادس ابتدائي ومرة من المرات بالفرصة كاعدين اني وصديقتي بالساحة وورانه گاعدات مجموعة بنات يسولفن واصواتهن عالية ــ ههههههه لا ولج يگولون ليلة العرس تخوف ــ عزة شلون تخوف ــ يگولون الرجال يصير مثل الوحش وعيونه تخوف وو………. بقن يسولفن واني مركزة وياهن ومادري بصديقتي شدا تحجي احس من گالت عيونه تخوف تذكرت عيون عماد انعاد عليه الموقف بس بطريقة ثانية غير الي افكر بيها كل مرة توني عرفت عماد جان شيريد مني وليش هيج تصرف وياي عماد ماجان يريد يض*بني لا جان يريد ياخذ مني شي اكبر لما: سرى سرى هيييي شبيج صفنتي مو احجي وياج سرى: هاا هاا مابية شي گومي خلينه نروح للصف گمت من يمها ورحت اركض وهي تركض وتصيح وراي لما: تعاااي ولج وين رايحة بعده الجرس مادگ ولج سرى معرفتي بالشي الجان يريده عماد خله حالتي تستاء اكثر صرت اشك بكل شخص اشوفه گدامي حته بابا واخواني صرت اشك بيهم يردون شي مني عشت طفولة صعبة ومراهقة اصعب بعد جان كل همي شلون احافظ على نفسي گمت اتخيل كل ذكر اشوفه عبارة عن وحش يريد ينهش لحمي مشت السنين بسرعة وصرت ثالث متوسط جنت اداوم اني وبنات عمي بنفس المدرسة لداوم بيها ماما جانت مدرسة ثانوية مختلطة بنات وولد من الاول متوسط للسادس اعدادي وهالشي اثر ع نفسيتي كلش جنت دوم متوترة واعصابي مشدودة من الطلاب لوياية جانت صديقتي الوحيدة هي لما هي جيرانه بيتهم قريب علينه وياي من الابتدائية واحبها كلش واختها الاكبر منها هم ويانه اسمها ندى بس علاقتي بيها مو قوية مو مثل لما بهالفترة عماد اتخرج من الكلية العسكرية وصار ضابط وقلت جياته النه مو مثل قبل جان يجي ويه امه بكل مرة صرت ما شوفة الا كل ست اشهر او سبع اشهر مرة وارتاحت نفسيتي ع هل شي وصارت حياتي شبه طبيعية لكن بقيت مثل ما انا هادئة ومنعزلة ومالي شغل بأحد اخواني يتعاركون ويتشاقون ويضحكون بيناتهم بس اني ما ادخل ولا اشاركهم بشي لدرجة ضلو يسموني ال*قدة ومحد منهم يگعد يمي اليوم اول يوم الي دوام بالثالث متوسط بعد العطلة الصيفية گعدت الصبح كلي نشاط ومتحمسة للدوام ومشتاقة اللما هواية بدلت وطلعنه اني واختي ويه ماما للمدرسة لان جنه نداوم بنفس المدرسة الي تدرس بيها ماما جنه نروح مشي لان قريبة علينه وصلنه ورحت گبل ع صفي الجديد انتظر لما لأن ماعندي صديقة غيرها جنت گاعدة وصافنة الوحدي واني اشوف الطلاب والطالبات بدو يدخلون واني حاطة ايدي ع گلبي اذا عبر من يمي ولد وما حس غير احد غمض عيوني من وره لما: ليش الحلو گاعد الوحدة وخرت ايديها واني اضحك وگمت شبگتها حيل سرى: هلا حبيبتي مشتاقتلج موت ولله لما: ولي يا بذاته لو مشتاقتلي جان اجيتي هياته بيتنه شمرة عصا عنكم شدعوة عليج لو اني اجي لو ماكو سرى دنگت وحجيت بصوت ناصي: انتي تدرين بيه اخاف اطلع وحدي لما: اوووووف منج لو بس اعرف شهالخوف الي بيج يابه قابل الناس راح تاكلج سكتت منها وماحجيت لان ادري لو احجي منا الباجر محد راح يفتهمني دك الجرس وره شويه وصار الاصطفاف وصاحو بأسامينه وبدت الصفوف واحد وره الثاني يرحون للمكتبه حتى يستلمون الكتب وصل السره الصفنة ورحنه نمشي اثنين اثنين للمكتبة وكدامنه مرشدتنه جنت لازمة بيد لما وامشي وجان اكو هواي طلاب اباب المكتبة وصايرة هوسة احس كلبي ضل يرجف واني اشوف هوسة الولد وسوالفهم وضحكهم بقيت لازمة بيد لما حيل واتلفت اخاف واحد يدحك بيه لما: شبيج يول ع كيفج ايدي انتبهت ع نفسي ورخيت ايدي من ايدها ضلينه واگفين اباب المكتبة منتظرين دورنا ووگع گلبي بالگاع واني اسمع صوت شباب يضحكون بصوت عالي وراية انداريت وجان اشوف مجموعة طلاب واكفين وره بس شكلهم اكبار يسولفون ويضحكون وهارجين الجو باوعتلي لما والتفتت وين ما اباوع وحجت: غيث صار ويانه بالضييييم التفتت عليها بإستغراب: هااا لما: شبيج غيث اخوي غير السنة بابا نقله المدرستنة بعد ما خلصن فلوسه وهوه يدفع للمدرسة الاهلية وغيث ولا كأنهو مالة نية ينجح ابد سرى: وينه لما: ههههههه هذاك ابو گذلة مدا تشوفي انداريت وجان اشوف واحد واگف بالنص مرجع شعره ليوره عنده لحية خفيفة طويل كلش اطول واحد بالمجموعة عيونه عسليات ومن يضحك عنده غمازة بخده شكله حلو كلش ويمكن اي بنية غيري من تشوفه تنعجب بي الا اني احس ما اگدر اضل مركزة بملامحه هواي لأن ينعاد ابالي كلشي صارلي والدنيا تضل تفتر بيه انتبه علينه ودار يباوعلنه واني دنگت بسرعة مشه اول يوم عادي وما صار بعد اي حدث غير بنات صفنه الي يجن يسألن لما وندى عن اخوهن الصاك الي انتقل المدرستنه وكم بنية من ذني الجريئات راحت تزحف عليه وسون تحدي بيناتهن منو توگعه اول رجعت للبيت ويه ماما واختي وتغدينه بعد ما اخواني اجو من الدوام كلهم وجنه واگفين اني وخواتي نغسل اماعين كلنه وجان يندگ الباب رسل: غسق روحي فتحي الباب غسق: لا ولله وليش ماترحين انتي ع رجلج نقش الحنه رسل: احترمي نفسج من تحجين اني اختج الجبيرة غسق: روحي سرى فتحي الباب رسل: ما لگيتي غير سرى عاد هسه تگلج اخاف اني ما افتح غسق: هههههههههههه خرب اي صدك ولله نسيت حسيت بيهن يستهزأن بيه وضجت كلش گمت واني معصبة: بلا تفاهتجن عاد منين اخاف يعني حگوم افتح طلعت من يمهن وهنه يضحكن وصلت للباب وگلت منو اكثر من مرة بس محد يرد فتحت الباب وجان انصدم عماد: السلام عليكم يتبع……… البارت الثاني عماد: السلام عليكم احس جسمي كله ضل يرجف وعظامي بادن ما اكدر اوصف شعوري خوف ورعب ع كره ع حقد كلهن يتجمعن من اشوفه باوعلي وابتسم ابتسامة خبيثة وهوه يباوعلي من فوگ ليجوه: شلونج سرى عفت الباب وركضت واني اتلفت اخاف منه يلحگني دخلت للمطبخ وايدي ع گلبي غسق: ها منو ضليت بس واگفة ايدي ع گلبي واتنفس بسرعة واباوع من شباك المطبخ اتأكد هوه بعده بره ما دخل غسق: وجع شبيج مو دا احجي وياج رسل: شبيج يول ما تحجين منو بالباب سرى حجيت والكلمة گوه طلعت مني: عماد... ااااا.. هذا عماد.. عماد اجه هوه بالباب جنت احجي مخبوصة وأشر بيدي ع الباب بخوف وربكة وخواتي صافنات عليه مستغربات من حالي غسق: الحمدلله والشكر ولله مخبلة انتي اروح اگل البابا يدخل الرجال حمسته الشمس بهالظهرية طلعت غسق صاحت البابا وطلع اكرم دخله واني اباوع من شباك المطبخ حارث: يا هلا ياهلا بعماد شلونك بوية عاش من شافك صافح ابوي وهوه يضحك عماد: هلا بيك عمي ولله الدنيا تلاهي دخلو للهول وضلو كاعدين يسولفون ويضحكون واني اباوعلهم من المطبخ خواتي طلعن سلمن ودخلن للغرفة ينامن بس اني بقيت محبوسة بالمطبخ اخاف اطلع اباوعله وهوه يسولف عمره صاير بالثلاثينات صاير ضخم وشواربة ثخان شعره مخففة كلش صاير شكله يخوف اكثر من قبل كلشي بي متغير الا نظرته نفسها بعدني من اشوف عيونه گلبي يرجف خوف مادري ليش الناس مخدوعة بي شلون يگدر يمثل ع الناس ان هوه انسان زين وهوه اكبر حقير شفته بحياتي دخلت ماما للمطبخ وصحاني صوتها من صفنتي ماجدة: شعجب ما نايمة اليوم سرى: هاا لا... ااا ماريد اقصد منعسانة ماجدة: خوش لعد همي ايدج خلي نصب غدة للرجال راحت امي تصب الغدة واني واگفة وراها التفتت عليه وحجت: سراوي ماما انطيني صحن من الكاونتر فتحت الكاونتر طلعت الصحن وايدي ترجف ما مسيطرة ع نفسي انداريت اريد انطي الماما وما حسيته غير فلت من ايدي وگع بالگاع وت**ر وفزت ماما مرعوبة ماجدة: ياا عزة شبيج اليوم يا بنتي.. تعورتي بقيت واگفة وصافنة واحس العبرة خنگتني هزيت براسي بمعنى لا وبقيت الم بالگزاز ماجدة: عوفي بنتي روحي ارتاحي يم خواتج خلي اني المه حجيت واني مختنگه: لا ماما كتلج منعسانه ماريد اروح كملت ماما الغدة وخذت الصينية وطلعت لميت اني الگزاز وشمرته بالزبل وگعدت ع الكرسي وسندت راسي ليوره ودموعي بقت وحدها تنزل لشوكت ابقه هيج مو جنت مرتاحة منك شجابك لشوكت تبقى انته الكابوس ليلاحگني بكل مكان عوفني حرام عليك ياربي خلصني اريد ارتاح اريد اعيش مثل باقي البنات ولله تعبت ولله شفت امي دخلت للمطبخ جابت الصينية ومسحت دموعي بسرعة سمعته گام راح يغسل وطلعت من المطبخ ركض حته اروح للغرفة وصلت الباب الغرفة ولاگاني جاي من يم المغسلة خزرني وبينت ابتسامة بطرف شفته وعيونه مركزهن عليه ضليت جامدة بمكاني وهوه ما شال عيونه مني اتحرك ومشى عبر من يمي واتقصد ينطگ بيه من يعبر لفح بخشمي عطرة واحس لعبت نفسي ومعدتي ضلت تگلب ركضت للحمام دخلت وسديت الباب عليه وبقيت اتقيء وابجي گعدت وره الباب بعد مان*د حيلي وانگطع نفسي وبقيت اشهگ كافي ارحمني ياربي بعد ما اتحمل اكثر بقيت گاعدة بالحمام واسمعه استأذن يريد يروح كمت فتحت باب الحمام ع كيف وبقيت اباوع حارث: ولله لو تبات يا خالي شيرجعك البغداد بهالليل عماد: لا ولله خالي ما اگدر باجر دوام بس صار عدي شغل بالديوانية وماگدرت ما امركم حارث: اتشرف بأي وقت البيت بيتك سلم ع اهلك شفتهم طلعو وطلعت اني من الحمام وركضت ع غرف*نه اني وخواتي لميت كتبي وغراضي حته اروح يم بيبي اليوم دوري ابات يمها جانت كاعدة عد عمي الزغير لان ماعندة اطفال. وجنه يوم اني ابات يمها ويوم نورس حته نداريها لأن غسق سادس وطلبات بيبي هواية تشغلها عن دراستها ورسل كلية ومالها خلگ وبيبي اصلا ماتريدها تكول مابيها خير رفعت راسها رسل وشاف*ني ماخذة جنطتي مال مدرسة وطالعة رسل: هييي وين رايحة سرى: يم بيبي رسل: بعد وكت تلحكين تكابلين عجوز النار سرى: رسل احجي عدل هاي بيبي رسل: اوهووو راح تفتحلنه محاظرة شطولها وشعرضها روحي بابا روحي مالي خلگج خلي اكمل نومتي وراي دراسة بعد شوي هزيت راسي بعدم رضا وطلعت بيبي بالرغم ماتحب امي وبس تحجي عليها بس تحبنه وماتنطي بينه واني احبها رغم اطباعها الصعبة مرت عمي الزغير جانت تصير بت اخو كوثر هي كوثر الي دخلتها بعقل عمي وخلته يحبها ويزوجها حته تسيطر اكثر وطبعا ما جانت تختلف عن عمتها بشي نفس الاطباع والاخلاق رحت البيت عمي واول مادخلت خزرتني دعاء مرت عمي وحته من سلمت ماردت عفتها ودخلت الغرفة بيبي لگيتها متمددة ع جربايتها حطيت جنطتي بالكاع وحجيت: ها بيبي شلونج ام حارث: جا شلوني ماتگليلي وانتن عايفاتني لوحيدتي من الصبح سرى: لعد نورس ما اجتج ام حارث: گلعة التگلعها انشالله جا هي هاي بيها حظ سرى: اخذتي دواج ام حارث: لا ولله گومي جيبي گمت انطيتها دواها وعنتها تعدل گعدتها حته تشرب شربت الدوه وحطت گلاص الماي بيدي وحجت: خايبة سريوه جا ابوج شماله صارله جم يوم مايمر ولا يگول عدي ام اروحن اشوفنها سرى: بيبي بابا الصبح اجه البارحة بايت بالدوام ام حارث: اي ومن اجه استلمته المگموعه امج ونسته امه تحجي واني اضحك ع حجيها رغم تحجي ع امي بس اني اتونس ع سوالفها وبس من اگعد يمها انسى همي ام حارث: ادري عليمن فاكة حلگج ومكشرة مو احجي ع امج انا سرى: هههههه تمونين بيبي ميخالف ما ازعل منج اني ام حارث: عوزج بعد تزعلين حته ا**رج ت**ر حطت راسها بيبي ونامت اخيرا وبقيت اني ادرس لليل بعدها تعشينه اني وياها ورجعت كملت دراسة وحطيت راسي ونمت كعدت الصبح وطلعت بيت عمي نايمين رحت البيتنه بدلت وطلعت ويه ماما وغسق للمدرسة وصلنه الباب المدرسة وجان اشوف لما واختها اجن ويمشي كدامهن اخوهن اشرتلي لما وضحكت واستحيت اني اباوعلها بسبب اخوها صفت يمي غسق وحجت: اگلج سرى هذا منو الصاك ويه لما وندى سرى: اخوهن غسق: يماااي يخبل اشو مشايفينه هاي اول مرة يوصلهن سرى: ما يوصلهن يافهيمة هوه يداوم هنا لما كالت انتقل غسق: بربج هذا طالب ويانه دشوفي يطلع عمره بالعشرينات لبكده دخلو كليات سرى: واني شمدريني دوختيني غسق: عابت هوه اني هم هيج اسولف وياج دخلنه للمدرسة واخوهن عافهن وراح وماما دخلت للادارة واجت لما يمي لما: صباح الخييير عيني صار ساعه أشرلج وانتي مامعبرتني سرى: غير اخوج وياج شتردين يكول عني غسق: لعد عندج هيج اخو وضامته علينه ولج لما لما: هههههههه غير اخوي الوحيد اخاف عليه منج غسق: بيا صف هوه لما: مقيم بالسادس والحمدلله غسق: يعني ويانه لما: لا بالشعبة الثانية غسق: خررب حرامات اروح الصفي احسن باااي لما: بايات حبحب دخلنه للصف وبدت الدروس واحد وره الثاني تعرفنه اليوم اني ولما ع نور بنية حبابة كلش وحلوة گدرت اتأقلم وياها واسولف شويه جنه كاعدين اني ولما ونور نسولف واجن رنا وسارة كعدن يمنه هذني ويانه بالصف بس ابد مارتاحلهن تصرفاتهن مو راحة وعدهن هواي سوالف م**رة طبعا جانن ما يطيقني اني ولما بس من شافن اخو لما صاحبنها وبقن يتلوكن الها علمود اخوها رنا: مرحبا لما ونور: هلوو سارة: شلونج لماوي اخوج الصاك شخباره رنا: هههههه ياعزة العزاج گبل اتدخلين بالمفيد سارة: هههههههههه لعد ترديني ابقه الغي السوالف متفيد عيني لما: ارتاحن عيني اخوية ميحب هاي السوالف ومو مال علاقات وخرابيط رنا: علييينه اكو ولد بهالزلگ ميصادق لما: شنو لعد اجذب عليج سارة: لا لا عيني متجذبين گومي رناوي گومي جبح شهالاسلوب گامن ولما تريد تهد عليهن وگعدناها اني ونور خلص الدوام عادي وصارت الحلة طلعنه اني ولما رحت ع صف غسق وجان يم صف غيث وگفت انتظرها لان بعدهم مامخلصين ولما وندى واكفات يمي ينتظرن غيث وجان يطلع هوه من صفه جان يمشي ويه صاحبه ويضحك شكله كلش حلو ملامحه هادئة جدا ع** ملامح عماد عيونه ونظرته ماتخوف كلشي بي هادئ مو ضخم مثل عماد بس طويل بمجرد ما الشخص يشوفة من بعيد يحسه انسان بكل معنى الكلمة اما عماد وحش وخلاني اشوف كل الزلم وحوش مثله ودع صديقة واجه يمشي باتجاهنه غيث: هاا خلصتو ندى: اي منتظريك غيث: يلله لعد امشو باوعلي وحجه: ترحين ويانه بقيت صافنة بوجهه ماعرفت شنو ارد فاجئني بسؤاله ونقذتني لما من الموقف لما: لا تنتظر اختها وامها هم مدرسة هنا غيث: امها مدرسة منو لما: ست ماجدة تاخذ ثاني متوسط متعرفه غيث: اهاا اتشرفنا يلله بنات طلع يمشي وخواته ورا واني صافنة بشكله انتبهت ع نفسي اول مرة اركز بملامح رجال هيج وما تصيبني حالة رعب شنو الي بهالشخص مختلف عن الباقي ليش مطمنتله هيج واني ماعرف شي عنه مجرد اخو صديقتي اففف بس يا سرى انسي كلهم هيج كلهم يتحولون وحوش من يشوفون المرة لا يغرج شكله الهادي ماتدرين شنو وره هالهدوء طلعت غسق ورحنه ع ماما ورجعنه للبيت وصورة هالشخص مافاركت بالي مدا اكدر انسى شكله ضحكته صوته لسه يرن بأذني من سألني اليوم جان دور نورس تنام يم بيبي تغدينه وخلصنه وخابر عمي لابوية گاله امي تريد سرى هسه گمت طلعت واني مستغربة شتريد بيبي واليوم اني مو دوري دخلت البيت عمي سلمت وكالعادة بس عمي رد رحت الغرفة بيبي لگيتها نايمة ونورس كاعدة بالكاع تكلب بتلفونها شاف*ني وكامت نورس: شوفي اني هاي العجوز بعد ماتحملها انتي ابقي يمها خليني اولي لبيتنه لان حأطگ سرى: ليش احنه مو متفقين كل وحدة يوم اني عندي دراسة ماكدر يومية اجي نورس: ولله مادري عيوني مشكلتج دبري نفسج المهم اني ما ابقه بعد كعدت بيبي ع اصواتنه وكامت تعدل بشيلتها اندارت ع نورس وحجت: بعدج هنا جا ماگتلج انگلعي يبت كوثر نورس: ولله صوجي اني كاعدة يمج رايحة عاف*نه وطلعت وبيبي ادردم عليها ام حارث: حريشي كون خايبة ينام بمصارينج يالماعدج تربية ياهو يربيج جا اذا امج كويثر شترجه منج سكتت شويه واندارت عليه: وانتي.. شمالج واكفة جنج شمعة فگر اخافن هم تردين تولين جا ولا وحدة طلعت بيها حظ كلجن طلعن ع المسمومات امهاتجن سرى; لا بيبي اني ابات يمج اليوم ام حارث: هم خوش من طلعتي بيج رحم ولو امج امجيدة منين يجيج الرحم سرى: هههههه كافي بيبي اروح اجيب كتبي واجيج طلعت من يمها رحت البيتنه كلت البابا وماما اني ابات يمها وجبت جنطتي ورجعت كعدت ادرس يمها وكلساع مگومتني ع شغلة طلباتها ماتخلص صارت ب9 ونامت واني ضليت كاعدة اكمل دراسة عطشت وطلعت اشرب ماي من المطبخ وجان اسمع عمي ومرته بغرفتهم يتعاركون وهي صوتها يلعلع ماجد: موتيني يامرة بسج كل يوم ع هالموال دعاء: غير اريدك تحس مليت من هالعيشة بس اني هيج هم حابسني بقفص هالكبرة وهم امك مشاركتني وبنات اخوانك كلساع وحدة ناطة فوك راسي ماكدر اتنفس ماجد: وشترديني اسوي اطرد امي قابل دعاء: لا لتسوي شي علويش تسوي خليني هيج ابيتي وما كادرة اخذ راحتي صاير البيت عبالك سوك ناس طابة وناس طالعة بحجة انشوف امنه اذا يحبون امهم هالكثر ما ياخذوها ويخلصونا منها هزيت ايدي ودخلت للمطبخ طول عمرهم عمامي هيج شخصيتهم ضعيفة كدام نسوانهم وما يكدرون يردونهن ويوكفوهن عد حدهن شربت ماي ورجعت نمت كعدت الساعة ب7 عفت بيبي نايمة وطلعت رحت البيتنه دخلت وجانو بابا وماما يتريكون بالمطبخ ردت ادخل اصبح عليهم ووگفني صوت ماما ماجدة: انت من كل عقلك تحجي يا حارث سرى طفلة شلون انطيها حارث: ليش لا يا ماجدة انتي تشوفين عماد ينرد رجال والنعم منه يتبع......... .