رواية لم أكن أنتويه حباً فأصبح بالحلال عشقاً الجزء الثاني

الحلقة الثانية

الحب الطاهر ليس صورة ملونة ولا رسالة مزخرفة ....

الحب الطاهر : ليس حروفاً مذهبة ولا سطوراً معلقة ولا نغمة راقصة

الحب الطاهر يا أبيض يا أ**د، ليس هناك وسطية ولا جدل يختلف عليه إثنان ....

الحب الطاهر : ليس قسوة تغلف بمرارة ، ولا فضاء ضيق ، ولا سراب مستحيل تحقيقه ....

الحب الطاهر : سماء صافية ، وبحراً هادئ ، وبسمة حانية..

الحب الطاهر : يزلزل الروح والكيان ويفجر ثورة البركان ....

الحب الطاهر : ناراً تضويناً

الحب الطاهر: نبنيه بأيدينا فماءه يروينا وزاده يكفينا

هـذا هـو الحب الطاهر : فهو لمسـة من الـوفــاء و العـطـــاء ، لــذا يجب أن يُعطـى التقـديــر اللائق بــه ونحن نحرص على ان يكون الحب وديعـة مهذبـة محفوفه برضا الله

?ملحوظة مهمه ✋?"تم كتابة حرف 'ج' بدل'ق' في نص سهام ليعبر عن اللهجه الصعيديه بقدر المستطاع.. لو في كلمة مش فاهمينها اقلبوا ال 'ج' إلى 'ق' هترجع لوضعها السليم زي كده (عقل ?عجِل)وهكذا ?‍♂️ "

انصدم حسام من كلام اخته و غمزاتها ليه، اتحرك عشان يهرب منها وهو بيقول " انا مش فاهم انتي بتتكلمي على ايه، بس بجد لو حضرتوا العفريت متنادوش عليا عشان اصرفه"

عقدت هويدا حواجبها و ضمت بوقها ناحية الشمال وهي بتقول " يا ساتر يارب للدرجة ديه، انا بفتكر خالتي سمية بتقول كده عشان تطفشه"

ابتسم حسام وقال " ده هي كده كرماه على الاخر"

جه يمشي ويسيبها، ولكنها اتكلمت تاني وقالت" امال خالتي بهيه رافعاه السما و بتقول انه مظلوم بسبب امه واول زيارة"

رد حسام وقالها " انا تعبان جدا من الطريق، هروح اقعد مع خالي لحد ما عمرو يوصل مع زوج سهام واسيبهم معاه وانام "

بصت هويدا على ساعة هاتفها وقالت" انا بعمل نسكافية اعملك معانا "

رد وهو بيحك عينه بإديه " لا نسكافيه ايه الي بالوقت ده، و بلاش تعملي ليهم عشان يعرفوا يناموا"

ضحكت هويدا وردت" امال انا بقولك ايه من الصبح ، سهام خيتك و خالتي بهية حالفين ما يناموا غير لما يجنعوا اميرة بالعريس و كمان يعزموه حدانا يومين "

اضايق حسام و بعد عن اخته وهو بيقول " انتوا حريين اعملوا الي عايزينه، وانتي بلاش تقلبي المحطه كتير "

استغربت هويدا من رده و ضيقه رجعت للمطبخ عشان تعمل النسكافيه وهي بتفكر بحالته ونظراته وكلامه وهو واقف مع اميرة قد ايه كان مبسوط ومنسجم ..

رجع حسام وقعد جمب خاله بالمجلس الكبير وهو بيسمعه بيتكلم في التليفون وبيقول" لا حول ولا قوة الا بالله العلي العظيم، الله يرحمك يا حاج صابر والله كان راجل طيب و اصيل "

استغرب و بص لأمه وهو بيسألها بصوت واطي " هو مين الي اتوفى يامه "

ردت عليه امه وقالت " ابو زهرة مرات عمرو اداك عمره "

كان الكل بيسمع للحج جمال وهو بيقول لأبنه " ازاي ترجع وانت لسه واصل ، تعال ارتاح والفجر ابقى ارجع تاني عشان تاخد ندى معاك لامها "

ردت سمية وقالت" اه بلاش على طول، كفاية عليه تعب النهاردة يرتاح ويرجع، وكمان بلاش حكاية ندى ديه محدش هيكون فايق لرعايتها هناك "

كانت ام سعاد وام حسام بيقول نفس الي قالته سمية، ولكن الجميع سكت و احترم رغبة عمرو انه يكون جنب زوجته بالوقت الصعب ده..

رد ابوه عليه وقال" انت عندك حق يا ابني مينفعش تسيبها بوقت زي ده ، ربنا يهد*كم لبعض، روح يا ابني وخد بالك منها وطبطب عليها، وابقى طمني عليك اما توصل"

بص الحاج جمال لزوجته بعد ما خلص المكالمه وقال " جت من عند ربنا، يمكن يكون ده سبب رجوعهم، مع اني زعلت على الراجل الاصيل ده"

سألته اخته ام حسام " هو مات من ايه يا خوي ، كان تعبان وله موت فاجئه "

رد حسام على امه وقال " كان عمرو قالي مرة انه تعبان وحالته متأخره من شهور "

اكد خاله على كلامه وقال " ايوه فعلا هو بقاله سنتين تعبان، من ساعة ما وقع وهو بيتوضى في الحمام و التعب مش سايبه من شكوى لشكوى لحد ما ادهورت حالته "

وصلت هويدا للصالون و معاها صنية النسكافية و قربت من الام سمية الي رفضت هي والحاج جمال يشربوا معاهم و اتحركوا عشان يناموا، دورت هويدا بعنيها على اميره لتقول بعدها" امال فين عروستنا ، وفين سهام ، خير يا بهيه خالتيني اعمل النسكافيه على الفاضي "

وقف حسام هو كمان وقال لهويدا وهو فرحان فيها " اشربيه انتي بقى بالهنا والشفا، وبعدين اسمها خالتي اتعدلي بالكلام "

دخلت سهام الصالون ، لتقول ام سعاد "اهي جت سهام اتبقت اميرة ونبدأ السهرة، وبعدين يا حسام انا بحب اسمع اسمي بالشكل ده منها اخرج انت منها "

ضحكت ام حسام وقالت " لا سهرة مين مع نفسيكم انا هنام مش بجدر على السهر ولا بحب النسكافية بتاعكم ده، وانتي يا بت يا هويدا اسمعي كلام خيك و اتلمي لالمك اني"

قعدت سهام جنب خالتها و ردت على امها " روحي يامه نامي وارتاحي واحنا هنسهر مع خالتي و اميرة و ان شاء الله نجدر نعجل عروستنا و نفرح كليتنا "

ردت سميه وهي بتتحرك وره جوزها " يارب ما تعقل، هي عجباني كده ربنا يكملها بجنونها "?

اتفرق الكل ولسه حسام واقف بمكانه منتظر خروج اميرة من غرفة الضيوف الصغيرة الي كانت بابها بيفتح على الصالون وكأنها جزء متفرع منه...

بصت هويدا عليه وبلؤم اتكلمت وقالت" عايز حاجه يا حسام "

هز راسه وقالها" لا شكرا انا هروح انام تصبحوا على خير" ?

رد الكل وقاله وانت من اهل الخير?، ولكن متحركش من مكانه لتستغرب سهام وتقوله "بقولك ايه يا خوي متجعد ويانا حبتين ملحج على النوم "

اتحرك وقالها" لا انا تعبان و محتاج انام "

زعل حسام و راح ينام وهو متضايق من تدخل اخواته و اتفاقهم مع خالتهم انهم يقنعوا اميرة بعريسها وكمان يستضيفوه بالبلد عشان تتم فرحتهم...

طلعت هويدا من غرفة الضيافة بعد ما راحت تشوف العروسة اتاخرت ليه وهي بتقول " ديه البت ميرا نامت "

ردت خالتها وهي بتقول " اوعي تكونوا قولتوا ليها اننا هنكلمها على العريس"

انكرت سهام وقالت باللهجه الصعيديه " ماتجوليش كده ياخالتي، هو احنا خرب عجلنا عشان نخبرها، و زي ما جولتيلنا الموضوع انتي هتفتحيه واحنا بنكمل بعد*كي "

رجعت هويدا وقعدت معاهم وهي بتقول" ديه حتى مغيرتش هدومها نامت زي ما هي "

ردت ام سعاد " لعله خير بكرا نحاول نزنقها ونقعد معاها فوق ببيت وحده منكم على روقان "

بصت هويدا لاختها وقالت " صحيح يا سهام هو ايمن فين "

ردت سهام وقالت " والله انتي حلال فيكي الدبح، دلوجيت الي اتفكرتي ولدك "

ضحكت هويدا، لتقول ام سعاد" الله يكمل بعقلك يا سهام ، معلش يا بنتي ا**بي ثواب بالغلبان ده و خودي بالك انتي منه "

زعلت هويدا وقالت " والله انتوا ظالمني، مش كنت بوضب المطبخ و بلاحج على الطلبات وبعملكوا النسكافيه "

ات**فت سهام من خالتها لتقول لاختها" خلاص ان*دي بابور خربان فتح من غير سد، وبعدين هو طلب ينام مع الاولاد وانا نيمتهم كلياتهم مع بعض ، وإلا كنتي لاجتيهم فوج راسنا لحد دلوجيت "

قامت ام سعاد وهي بتتاوب من نعسها، لتقول سهام" على فين يا خالتي لسه مجعدناش معاكي"

ردت عليها وقالت " اسيبكم تتعاركوا وبكرا نكمل تعبت ، شكل الواحد كبر قبل معاده"

ضحكت هويدا وقالت" يا حلاوتك يا بهية وانتي بتعترفي بسنك قدامنا "

ض*بتها خالتها على كتفها وقالت" سن مين يا بنت انا اصغر منكم كلكم، بس هو الطريق بتاعكم طويل ومكنش راضي يخلص هلكنا حتى وصلنا"

ردت سهام وقالت" معاكي حج يا خالتي، نامي و ارتاحي و الصباح رباح "

...........

كان عمرو بطريق العوده بيحاول يكلم زهره بس مش عارف هيبدأ ازاي ولا هيقول ايه، وكمان معرفته بحبها لابوها مخليه خايف من سماع صوت بكاءها و حزنها الي اكيد هيكون كبير...

مرت ساعات الليل بسكون وهدوء على الجميع ماعدا اميرة الي صحيت بليل على بكاء ندى، اخدتها بحضنها وهي بطبطب عليها وتحاول تهديها عشان ترجع تنام ، طلبت ندى تروح الحمام اخدتها عمتها و خرجت بيها وهي بتمشي بالعافية من نعاسها..

رجعت (تقيئت) ندى بالحمام وقعدت تزن و تبكي طول ما عمتها بتغسلها ايدها و وجهها بعد الترجيع ، وزاد بكاءها اما اميرة سابتها عشان تنضف المكان ...

قلق حسام بنومه كان بيتقلب وهو بيسمع صوتهم، كان نومه غالب عليه منتبهش بالاول لحد ما الصوت وضح وخاصه انه غرفته كانت الاقرب لجهة المطبخ والحمام..

قام و خرج من الغرفة ليتأكد الي سمعه صح وله بيحلم، لاقها بالمطبخ بتهز في ندى على كتفها وهي بتسخن ميه على النار

اص*ر صوت شبيه بالكحه ليشعرها بوجوده قبل ما يدخل عليهم ، التفتت اميرة وبصت عليه لتقول " اكيد صوتها قلقك، انا اسفه والله"

دخل المطبخ وهو بيحك راسه من وراء وقال" خير مالها بتبكي كده ليه "

وقرب من راس ندى الي على كتف عمتها وقالها " تعالي معايا قوليلي عايزه ايه"

مارضيتش تسيب عمتها مسكت فيها اكتر وزاد بكاءها وهي بتقول " ماما، ماما هتيجي امتى? "

دمعت عين اميرة وقربت بسرعة للبتوجاز وقفلت النار وهي بتقولها " حاضر هتيجي، نشرب الينسون وبعدها ماما هتيجي "

بص حسام لشاي الينسون وقال " هو انتي ملاقتيش غير البتاع ده تعمليه ليها، استني انا هدفي ليها لبن، ولا اقولك هي ماتغدتش معانا ممكن تكون بتعيط عشان جعانه"

بصت اميره على ندى وقالت ليها " انتي جعانه احطلك اكل"

مردتش ندى عليها كانت بتعيط وهي قفله عينيها، هزت اميرة راسها وقالت " كده مينفعش انا هتصل بعمرو يصحى عشان يسكتها وكمان هي رجعت من شويه اخاف تكون تعبانه وانا مش بعرف اتصرف "

وبصوت واطي رد عليها و قالها " عمرو رجع القاهرة تاني، والد.. اتوفى"

فهمت اميرة انه والد زهرة وخاصه اما حسام مذكرش اسمها وشاور بعينه على الطفلة..

اتحركت اميرة وقالت " لا إله إلا الله، يبقى كده مفيش غير اصحي ماما عشان تشوفها "

خدت بالها اميرة من حركة ندى الي توحي انها هترجع تاني، جريت بيها على الحمام ويدوب مدخلتش بابه حتى رجعت ندى تاني وهي بتبكي فكانت بتتألم عشان بترجع وبطنها فاضيه مش بينزل إلا البسيط البسيط..

اتصل حسام بهويدا و صحاها من النوم وهو بيقولها وضع ندى وطلب منها تنزل تساعد اميرة بدون ما تعمل صوت عشان ماحدش ينتبه ويصحى..

وفعلا نزلت هويدا ومعاها مهدئ للقيء وخافض للحرارة الي اخدتهم ندى بصعوبه، وبعد محاولات كتيره شربت ندى نص كوباية الينسون الدافي ونامت بحضن عمتها بعد زن وبكاء كتير...

رجع حسام ليهم بعد ما صلى الفجر لاقاهم نايمين اخته على الكنبة واميره نايمه وهي قاعدة بمكانها..

قرب من اخته و هو بيقول لنفسه " مينفعش اصحيها دلوقتي هتصرخ من الخضه و تصحي البيت كله "

قرب من اميرة وقال بصوت واطي " اميرة.. اميرة "

اتكلمت ميرا بنومها وهي بتهز بندى " هتيجي كمان شويه بابا راح يجيبها"

ابتسم وهو بيسمع ليها، اتكلم تاني وقال " ده انا يا اميرة، مينفعش تنامي هنا، اميرة "

خرج منها صوت تاني بس المرة ديه وهي بتهز ندى وتقول " ننننننننن، اووووووووو، وووووووووو"

ضحك وجهه اكثر و هو بيتأملها سرح في جمالها وحبه ليها ،لسه مش عارف يعمل ايه عشان يخليها تقوم تنام بمكانها، باللحظة ديه كان اتبقى القليل على خروج ضحكه عاليه من هويدا الي عامله نفسها نايمه و هي بتتف*ج عليه و على طيران عقله قدام حبيبته..... ?

اتحركت هويدا وهي قفله عينيها و بتمثل نعسها وقعدت على الكنبه، قرب حسام منها وقال " كويس انك صحيتي، ياله قومي اطلعي بيتك كفاياكي كده النهاردة و صحي اميرة هي كمان عشان تنام مكانها"

وبضحكه مخفيه قامت هويدا و صحت ميرا عشان تدخل غرفة الضيوف ، قرب حسام منها وقال "هاتيها عنك ادخلها انا جوه " رفضت ميرا وهي خايفه لتصحى من جديد..

دخلت غرفتها وقفلت الباب ونامت وهي بحالتها يادوب رفعت الغطى عليها وده كان اخر حاجه شعرت بيها قبل ما تغرق بنومها تاني..

وقبل ما تخرج هويدا من باب البيت مدت ايديها بالمفتاح ناحية حسام وقالت " اخ مش قادرة ، تعالى ياحسام وصلني لفوق المفتاح تقيل على ايدي ومش قادرة احمله ?"

فهم حسام عليها ابتسم من غير ما يظهر ليها ابتسامته و اداها ضهره و اتحرك على غرفته وهو بيقولها " ابقي اربطي ايمن ومتنزلهوش بدري عشان انا هموت من النعس ?"

ضحكت هويدا وقالت " حاضر بس ابقى غطيه كويس وهو نايم "

وخرجت بسرعة وهي بتجري ، مفهمش حسام قصدها غير اما دخل غرفته واتفاجأ بايمن نايم على سريره ?

ضحك وقال " سلاماً قولاً من رب رحيم، هما بيطلعوا امتى دول" ?

نام على سريره ليلاقي ايمن بيقرب منه وبيحضنه، فرح اكتر و قبله من راسه وهو بياخده بحضنه وبيرفع الغطى عليه..

اتأخر الكل بصحيانه الصبح، قلقت سمية على حفيدتها بعد ما عرفت من هويدا الي حصل دخلت غرفة الضيافة الصغيرة عشان تطمن عليها وهي بحضن عمتها ، حمدت ربنا اما لاقيتها كويسه جت تخرج لاقيت ندى بتتقلب وبتفتح عينيها عشان تصحى ، ابتسمت ليها وقربت منها و رفعتها بحضنها عشان تقبلها وبعدها نزلتها وقالت بصوت واطي " تعالي نسيب عمتك تكمل نومها براحتها" وخرجوا من الغرفة...

فرح الحج جمال بندى اخدها بحضنه وقالها "خير يا جدوا انتي هتقضيها نوم وله ايه"

كانت ندى بتدلع بحضنه وبتحاول تفوق

جابت سهام الشاي وحطته على السفره الي بجانب الصالون وهي بتقول " اتفضل ياخال الفطار جاهز، اتفضلي يا مرات خالي دي هويدا عملتليِكم فطاير البييتزه بتاعتها، هتعجِبوا بيها قوي قوي"

ردت سمية وقالت " وعلى ايه الغلبه يا هويدا كنا فطرنا جبن وحاجات من ديه"

قرب الحج جمال من السفرة وهو بيرد على زوجته " دول مش مخلين حاجه غير حاطينها،ليه كده يا أولاد هو إحنا غرب ولا ايه "

ردت أم حسام وقالت" بجولكم إيه مش كل شوية هتجولوا لينا إحنا اغراب ومعرفش إيش ،إحنا مش تعبانين وفرحانين بيكم هملونا بمزاجنا ، ولا إنت شايفنا مش قد المقام على ضيافتكم اياه "

قربت أم سعاد وهي بتبص على السفرة وبتقول" شكلكم هتكونوا مش قد المقام فعلا، فين يا أختي الفطير المشلتت و الزبدة الطازة بتاعت الصعيد "

وصلت هويدا وبإديها طبق الزبدة والمربى البيتي وقالت " أحلى زبدة و مربى لخالتي حبيبتي "

دخل حسام الصالون وهو بيقول" صباح الخير ، ايه الجمال ده والله البيت منور بالحبايب"

رد الكل عليه الصباح وشكرته الام سمية على كلامه الحلو ، كانت عينه بدور عليها قرب من ندى و قالها " إيه أخبار دلوعتنا النهاردة"

ابتسمت ندى و مردتش عليه لترد بدالها جدتها وتقول" كويسه الحمد لله ،شكل بطنها برد من الطريق ولكنها زي الفل دلوقتي "

كان بيسمع للام سمية و عينة على باب الصالون مرة وعلى غرفة الضيافة جوه مرة تانية "

قربت هويدا منه وغمزة له و هي بتقوله بصوت مسموع"مالك يا حسام بتدور على حاجه يا حبيبي "?

اتضايق حسام منها نبهها بعنيه وقال " لا مفيش حاجه ،أنا مستغرب كلكم واقفين جنب السفره كده ليه "

ضحكت أمه وقالت" عندك حج ياولدي والله ،اتفضلوا يا جماعة الخبز والبيتزا هتبرد ،هي حلاوتهِ تاكلوها وهي سخنه و الجبنه تبقى سايحه من فوق كده ، بصراحه البت هويدا بجت شاطره بالعجن بعد ما خاب أملي فيها اتعلمت واتشطرت زي اختها ديه كمان بجت بتعمل فطير بالسبانخ حلو كتير"

أخد حسام قطعة من البيتزا وقال" بصرآحه إلي يشوف المعجنات بتاعتها ميقولش هويدا إلي عاملاها نهائي وكأنها جاهزة وله معموله بعجان كهربي "?

ردت أم حسام الي متعقدة من الاجهزة الكهربائية الي دلعت البنات وقالت" عجان إيه وايدينا راحت فين بلا دلع ماسخ أنا بناتي ملهمش في الكلام ده، كله طبيعي من جهد أيديهم، جال عجان كهربي جال ده يا ياولدي بيضحكوا بيه على البنات المدلعه ،ولكن حدانا مفيش أحلى من عجن الايد "

ردت أم سعاد وهي بتاكل من البيتزا وقالت" عجان ولا مش عجان كله واحد مدقيش، وبعدين على راي حسام مالك قلبتي المحطة"

ردت ام حسام وهي بتضحك" انا بحاول مقلبهاش واتكلم معاكم مصري بس زي ما تقوله الطبع غلاب، خلاص خدنا على عيشيتهم ولهجتهم وحياتهم ٣٠ سنه عمر مش قليل وله ايه"

رد اخوها و قالها "العمر كله يارب وبعدين كل الي يخرج من ل**نك حلو يا ختي "

رفع حسام حاجبه لهويدا وهو هيبدأ يكمل كلامه مع امه ، لترد بسرعه وتلحقه وهي بتحذره و بتقول " كول ياحسام ياحبيبي بالف هنا ،أعيش واعملك من ايدي♥️ "

خرجت أميرة من الغرفة ، بصت أم حسام عليها وقالت" صباح الخير بليل يا أميرة ،ما لسه بدري يا بنتي "?

رد حسام بسرعة وقبل الكل قال لامه " مسا ايه ده لسه الوقت بدري ياماما وكمان ندى قعدت تعيط طول الليل وقلقت نومها "

إستغربت أمه من كلامه على غير العادة" قربت أميرة وهي بتقول لعمتها أم حسام " سامحيني يا عمتي زي ما حسام قال قلقت آكتر من مرة بليل،وكمان جو البلد جميل وبيخلي الواحد ينام ولا يحس بحاجه ،ده كان نفسي أكمل بس قمت إما سمعت صوتكم"

وقبل ما عمتها ترد أتكلم هو مرة تانية وقال "نوم الهنا ولا يهمك لو تحبي افطري وكملي نومك تاني حتى تستكفي "

بصت لابنها بعيون ضيقه وبعدها بصت لأميرا وقالت" تعالي يا بنتي افطري الأول وبعدها نشوف موضوع النوم وال**ل ده أمال إيه إلي بسمعه عنك وأميرة بتعمل وبتعمل وشايلة مسؤولية البيت "

شاورت ليها سهام و قالت" تعالي حدايا في مكان فاضي "

قعدت ميرا جنب سهام وهي بتبص للشاي اتحركت من جديد عشان تحط لنفسها الشاي سبقتها هويدا وقالت بدلع " أنا هصب ليكي يا مرمر خليكي مرتاحه يا حبيبتي "

اتكلمت أم سعاد وقالت" دوقي البيتزا يا أميره جميله قوي ،عايزاكي تعرفي إزاي بتتعمل عشان تعملي ليا لما نروح "

ضحكت سهام وقالت بس لازم تاخد وصفت الوجه الاحمر ده من هويدا بصرآحه جمالها إنها مش زي بتاعتنا واخيرا المسلسلات التركي نفعتها بحاجه "

ردت أميرة على أم سعاد وقالت " لا ياعمتي أنا مليش بالعجن "

اتخضت إم حسام وكأن وقع على راسها حاجه اتكلمت بسرعة وقالت بضيق " إزاي ملكيش بالعجين يا بت، آنتي عايزنا نتفضح عند أهل جوزك وله ايه "

ضحك جمال وقال " لا يا أختي مفيش فضيحة آنتي شكل قعدتك ببلد أهل جوزك نسيتك فعلا حياتنا بالقاهره "

ردت سمية هي كمان وقالت" دلوقتي يا ام حسام الأجهزة الكهربية بتعمل كل حاجه ،لو بيحب المعجنات يجيب ليها عجان "

دافعت ام سعاد على ميرا وقالت" ولكن الأجهزة متقدرش تعمل كيك زي كيكة أميرة الاسفنجية وله الكريب بتاعها ولا الترايفل بالفواكهه ولا حتى الكنافة بتاعتها ، يا بختك يا أستاذ احمد تلاقي امه القوية دعياله "

بصت هويدا على حسام بالوقت ده وبعدها بصت على أختها سهام إلي قالت " ماتعزمه ياخال عندينا بالبلد يجي آخر يومين نتعرف عليه ونفرح كلياتنا "

رد جمال وقال" ربنا يسهل يا بنتي المرة الجاية لو في نصيب يبقى يجي معانا "

قام حسام من على الفطار نادت أمه عليه وقالت" على فين يا ويلد انت مكملتش فطورك " قالها حسام وهو بيبص على موبيله" هعمل مكالمة مهمه وارجع ليكم"

كملوا كلامهم على العريس وقعدت أم حسام تسأل سمية ليه هي متضايقة منه للدرجة دية مدامه كويس وابن حلال

دافعت عنه بهية وجمال و اتمسكت سمية برأيها إما أميرة فقعدة ساكتة تبص على باب الصالون وكأنها منتظره راجعته ليكمل اكله ولكنها بالاخير لاقيت حجه لتهرب من حديثهم اما ندى طلبت تدخل الحمام..

..............

بحلمية الزيتون و بشغله اتصل احمد بنور عشان يشكي ليها من أميرة وطريقتها الجافة وعدم ردها عليه

كان رد نور غريب وخاصة إنها قالت له يرجع يعيد التفكير ?وانه لو من قبل الجواز بيحصل كده أمال بعد الجواز هيكون التفاهم بينهم إزاي، رد احمد عليها وقال " عندك حق ، الواضح كده إني هصرف نظر على الموضوع ده أنا مش بحب ال مراوغه خلي حسام ينفعها "

ردت نور وقالت " أنا مش عايزه افسد بينكم بس إلي هي بتعمله مش مقبول ،إنت تستاهل كل خير ومية وآحده تتمنى عريس زيك"

ابتسم احمد ورد بثقه وقالها" أشكرك يا نور آنتي الاحسن طبعا،بس أنا هديها فرصه أخيرة وبعدها ننهي الأمر ونخلص الموضوع ،ده خلتني أندم إني مسمعتش كلام أمي من الأول"

ردت نور وقالت" ربنا يكرمك بكل خير وبالي تسعدك يارب "

...........

باسوان و بالصالون كانت ندى بتكلم باباها وهي بحضن جدها جمال وبتسأله عن أمها ،بص جمال لميرا وقالها بصوت مش عالي "بصي يا بنتي احمد هيتصل النهارده عليكي، اخوكي اتفق معاه على كده مينفعش متكلمهوش حتى ولو هترفضي كلميه وبعدها نقوله مش عايزين حتى يبقى شكلنا كويس قدام الناس، لاننا طولنا بدون سبب لو مش عايزاه قولي لينا و نقفل الموضوع "

ردت سهام بسرعه وقالت " نجفل إيه يا خال اصبروا أنتوا ، نجعد معها ونفهم إلي براسها ونردلك خبر "

عيطت ندى وهي بتكلم مامتها وبتقولها" عايزه أروح عندكم ،خلي بابا يجي ياخدني"

وده خلى زهره تعيط مع بنتها وتقولها" وحشتيني يا ندى أنا كمان عايزاكي ومحتجاكي ياروحي "

اتأثر الكل بالمكالمة و بحالة ندى إلي قعدت تعيط كتير ومش قابلة حاجه من حد ،أخدتها عمتها ودخلت بيها غرفة الضيافة

بص حسام لسهام وسألها" أمال فين الأولاد كانوا لعبوا معاها "

ردت أخته وقالت " راحوا الصبح المزرعة مع أبوهم ، عشان البيت يهدى ونعرف نجعد من غير دوشة"

أتكلم حسام وقال" وايمن كمان راح؟ "

ضحكت سهام وقالت " ده جبليهم كلهم ربطه بأيد سامي جبل ما يخرج "

ردت هويدا وقالت " ظلمين الملاك الطاهر بتاعي والله "

ضحكت أمهم وقالت" ابجوا اطمنوا على أيد سامي إحنا مش لاقينه بالشارع "

خرجت أميرة بندى وهي مش عارفه تعمل إيه ،كانت عيون حسام إلي اتعلقت عليها بالروحه والجاية بتثير فضول أمه وأخواته فمكنش من طبع حسام إنه يهتم بحد بالشكل ده ولا يقعد من الشغل وياخد اجازة برغم غيابه الطويل عنه وده اثار فضولهم وشكهم..

وزاد الأمر إما وقف حسام وقال لاميرة" إيه رأيك اخدها وانزل اف*جها الجنينه ،آه نسيت البقر الصغير" وبص لندى وهو بيمد أيده ليها وبيكمل " تعالي يا ندى اف*جك على البقر الصغير ،والبط و الفراخ "

رفضت ندى ودفنت راسها بص*ر عمتها وهي بتعيط ،اتكلمت أم سعاد وقالت " روحي آنتي كمان معاهم يا أميرة هتسكت إما تشوفهم وتلعب بين الزرع "

بصت لباباها إلي بسرعه قالها " روحي يا بنتي ربنا يعينك وتعرفي تسكتيها "

وبخبث اتكلمت هويدا وقالت " وأنا كمان هجي معاكم عشان اف*ج أميرة الجنينة "

أتحرك حسام وخرج من الصالون ومن وراه أميرة و هويدا إلي سابتهم بعد ما قفلت الباب وقالت " أنا هطلع بيتي أعمل شوية حاجات وأبقى اجي ليكم "

ردت أميرة عليها" ماشي مستنينك"وكملت طريقها لتخرج من بوابة البيت

ابتسم حسام وقرب لاخته وقالها بصوت واطي " من الواضح اننا كنا حجه عشان تهربي "

ضحكت وهي بتتغامزله و قالت " أنا قولت اخدمك بس لو مُصر انا ممكن استغنى عن اعادة مسلسلي واجي معاكم "

سابها حسام ونزل الدرجتين الصغيرين وهو بيقول لها " لا ازاي وكمان لو سبتي المسلسل مش هتقدري متعمليش السنابون الرائع بتاعك " وغمز بعينه وكمل " بس ابقي زودي مدة العجان اقصد العجن بتاعه "

ملحقش حسام يكمل كلمته حتى اتفاجأ بيها بتقرب بسرعه وبتمسكه من هدومه وبتقوله" وديني يا حسام لو حد عرف بموضوع العجان بتاعي لاجوزهالك لعيسوي الاهبل واخليك تموت عليها ما تنولها " ?

سحب هدومه من ايدها وقال وهو بيهرب" عيب يا بحر خف انت و اخفي الريش كويس و كله هيبقى في السليم" وطلع من البيت وهو بيجري وبيضحك ...

كان لسه بيضحك وهو بيقرب لاميرة الي ابتسمت على جريه و ضحكه و قالت " خير هي كانت بتجري وراك ولا ايه "

كمل ضحكه وهو فرحان ماقدرش يرد عليها كان بيكلم ندى وبيقولها " تتف*جي على البقر الصغير الاول ولا البط"

مردتش ندى عليه ولكنها نسيت زعلها وكل حاجه اما شافت البقر الصغير? وهو بيلعب جنب امه وبيرضع منها? ، كانت فرحانه قوي و هي بتتف*ج على حسام وهو بيحلب البقرة قصادها.. ?

قربت اميرة من البقرة الكبيرة عشان تتصور معاها بعد ما عجبها لونها الابيض في اسود وقبل ما تدوس على زر الكاميرا خرج من البقرة صوت عالي

خلاها تصرخ وترجع لوره بسرعه مصطدمه بحسام الي من خضته وكهربته اما لامسته انتفض هو كمان لوره و سقط وسط كومة البرسيم و من بعده اميرة الي سقوطها كان اهون شوية منه..

قعدت ندى تضحكو تضحك بصوت عالي من غير ماتقف، سحبها حسام وهو بمكانه وقعد يزغزغها من بطنها ورقبتها ليزيد ضحكها وفرحها

ولكنه ماكنش متوقع الي جه بسرعة البرق ونط على ضهره بقوه وهو غيران من ندى ، ضحك حسام وقاله " انت اتحدفت علينا منين، مش كنت مع ابوك يابني "

ملحقش ايمن يرد على خاله الي سحبه وقعد يزغزغه زي ندى قربت اميرة هي كمان و شاركة حسام بضحك زغزغة الولاد

وبحركته السريعه نط ايمن على ضهر ميرا وهو بيحاول يعمل فيها زي ما هي بتعمل هي فيه، سحبوا حسام من على اميره ليكون فريسه ليه ولندى الي قعدت تعمل فيه زي ما ايمن بيعمل ..

نسيت زعلها و هي بتلعب مع ايمن و بيتنقلوا بين الاشجار و بيتف*جوا على البط ، وبعد اختفاء ايمن بثواني، رجع وقرب لاميرة من وره وهو بيصرخ و رافع ارنب? من ودانه بوجهها

خافت اميرة وبعدت عنه وهي بتقوله " حرام يا ايمن، سيبه من ايدك "

قرب ايمن وهو بيخوفها اكتر، جريت و خرجت من حظيرة البط وهي بتدور على حسام الي اتفاجأ بيها بتجري ناحيته وبتنادي عليه " حسام ، حسام"

نزل التليفون من على ودانه بدون ما يستاذن من الي بيكلمه كان بيبص ناحيتها مزبهل عقله مش بيترجم الي بيحصل رجع لوره خطوات عشان يفهم للحظة كان هيسقط من كتر دقات قلبه المتسارعه حتى توقعت انه يجري ليهرب من قربها منه..

بص وراها ليلاقي ندى وايمن خارجين من الحظيرة وبيجروا وراها ، ابتسم وجهه اخيرا و رجع الدم يضخ بعروقه مرة تانية وهو بيقرب ليمسك الارنب? من ايمن الي كان اسرع منه? ، اصبح حسام في النص اميرة بتتحامى فيه من وره وايمن بيحاول يهرب من خاله ويتخطاه عشان يكمل تخويف اميرة?

اتعصب عليه ومال عشان ياخده منه وهو بيقول" حرام عليك هطلع ودانه في ايدك"

ولكنه مكنش متوقع ان ايمن يرمي الارنب على اميرة? الي حطت ايديها على وشها وصرخت بصوت عالي?..

التفت ليها وقالها بسرعه" مجاش عليكي متخافيش، خلاص هرب" ?

وبص لايمن عشان يزعق ليه ولكن اميره منعته وقالته" اوعى تزعقله"

سبحان من هدى حسام و خلاه يتمالك اعصابه وخاصه ان ايمن مهديش فضل ينط ويلعب ويوقع ندى و يرمي رمله على اميرة?

مسكه خاله ورفعه وهو بيشبك ايده ويعقدها قصاده و هو بيقول لاميرة" خليكم هنا هروح احبس القرد ده وارجعلكم تاني، زعلت ندى انه هيمشي و طلبت يلعب معاها.."

اضطر حسام يسيبه ويمثل الخال الحونين قدام حبيبته ?بس مكدبش عليكم كان بيستغل بعدهم عنهم عشان يستحلف لايمن انه هيعلقوا اما يرجعوا??

كانوا ساعتين بس ولكنهم بجمالهم والضحك الي فيهم يساوي سنتين بحالهم ?

رجعوا البيت لتضحك ام سعاد على حالة حسام وهو داخل عليهم وشايل ايمن على كتفه بعد ما كتف ايده..

قربت سهام وهي بتقول " حد يعمل في الملاك ده كده "

ضحك حسام وقال" ولسه هعلق ليكم الملاك ده في النجفه "

اتكلمت اميرة وقالت لسهام " خديه منه حرام ايده هتوجعه"

ردت سهام وقالت "لا مش تخافي عليه هما متعودين على التعليج "

ضحكت اميرة وقربت من حسام وهي بتحاول تنزل ايمن من على كتفه وبتقول" اخر مرة يا خالو مش هيعملها تاني والله، بس عشان خاطري كفايه الواد ايه وجعته "

بلع حسام ريقه و رجع خطوه لوره وهو ساكت فكل ما تقرب منه قلبه يسرع بنبضه و يخليه بدنيا تانيه.. ?

جت هويدا من وره وقالت بصوت ايمن ابنها " عشان خاطر اميرة يا خالو سبني "

ارتبك حسام من طريقة هويدا الي كانت واضحه قوي انها بترمي عليهم الكلام..

نزل حسام ابن هويدا لتصقف ندى وتجري لتلعب معاه، ضحك وبص لاميرة وهو بيقول " انا حذرتك لو اتنقلت العدوى انا مش مسؤول "

ابتسمت ميرا وهي بتبص ليه بخجل ، فاصبحت نظرات عيونه الي غرقانه بسحر حبه وعشقه بتفضح الي جوه كل ما تقرب منه..

جه صوت ام حسام من الصالون وهي بتنادي على بناتها، ردت هويدا وقالت " ايوه يامه سهام جيالك اهي" وبصت لاختها وقالت" هطلع اجيب عجينه السينابون من فوج عشان انزل لنبدأ بخبيزه و عمايل الصوص بتاعه"

ردت ميرا وقالت " الله انا بحب السينابون جدا"

اتفرق الكل و اتبقوا هما بمكانهم بيبصوا لبعض ب**ت ?كل واحد فيهم منتظر التاني يتكلم

اتحركت ميرا بخجل وقالت" بصراحه انا جعانه مفطرتش كويس، وندى كمان طلبت تاكل "

رد بسرعه حسام وقال" هنادي سهام تحضرلك اكل بسرعه"

قطعته قبل ما يكمل كلامه وقالت" لا سبهم براحتهم، وبعدين انا مش غريبه هحضر لندى بيض بالبطاطس و نعمل سندوتشين صغيرين انا وهي ونستنى بعدها السينابون "

سابته وراحت المطبخ بعد ما جاوب عليه ب**ته و عيونه الي سرحت فيها من جديد، كانت خجلانه قلبها بيدق بسرعه، مكنتش عارفه تبدأ عمايل البيض منين قعدت تدور بالمطبخ وهي مبتسمه بخجل..

سمعت صوت خبطات خفيفه على باب المطبخ، التفتت للصوت لتلقيه واقف بيبص عليها وبيقولها " الواضح انك محتاجه لمساعده"

هزت راسها بوجهها المبتسم الفرحان ليدخل هو ويطلع الطوى الي هتقلي فيه البيض، سالته على مكان البيض ضحك وقالها مش هتصدقي لو قولتلك ان امي لحد دلوقتي بتحتفظ بيه في البلاص.

قربت اميره من حسام وهي بتتف*ج عليه وهو بيطلع البيض من بلاص من الفخار جواه قش، سالته بفرح " هو انا ممكن اصوره" ضحك وقال" مين فينا انا وله هو "

خجلت ميرا و نزلت عينيها ليرفع هو البلاص بين ايده وقال " هسهل عليكي الخيار صورينا احنا الاتنين وابعتيلي الصوره، اهو تكون ليا ذكرى مع بلاص البيض بتاعنا"

وضحك اكتر لتخرج صورته مبهجه وجميله بجمال فرحته وحبه...

كان عايز يساعدها طقش البيضه وكان عايز يحطها بالطوى قبل السمن ، حذرته و مدت ايديها بطبق فاضي عشان يحط فيه البيض، وبعدها قالت" لازم الزبده الاول وبعدين البطاطس الي انا بشرته "

بص باستغراب وقالها" هي ديه مش هتترش على الوجه زي الموزاريلا "

ضحكت ميرا وقالت له " الواضح انك ملكش خبره بالمطبخ، ربنا يخليلك اخواتك ومامتك، ويعين عروستك عليك"

مصدقش انها بتقوله عروستك رجع تاني لوضع الازبهلال وال**ت فقط كان بيضحك و مبسوط، والحاله ديه خليتها خجلانه و مرتبكه طول ما هي بتعمل البيض فشعورها انه جنبها و بيبص عليها بالشكل ده زاد من دقات قلبها وخجلها و ارتباكها..

وبعد ما خلصت البيض بصت عليه وسألته" اعملك معانا سندوتش"

وبدون ما يخرج صوت حرك راسه كدليل على موافقته

نسيوا ندى وهما بحالتهم ديه حضرت اميرة السندوتشات و صب حسام الشاي لتقرب هي وتحط السكر المظبوط بالكوبايات

وقفوا بمكانهم ياكلوا ويتكلموا عن البلد وجمالها وعدها حسام انه هياخدها بكرا هي وندى و يرحوا معبد ابو سمبل اومتحف النوبة الي هي تختاروا هيروحوا الاول وتاتي يوم يروحوا التاني عشان ياخدوا راحتهم و تنبسط و تشبع بالمكان

انسجموا مع بعض لدرجة انقطعوا فيها عن الي حواليهم وكأنهم لوحدهم بالبيت..

بس على مين كان من حظ هويدا من جديد تقف وتسمع كلامهم وتشهد على نظراتهم الي اصبحت الفرحه فيها متبادله

كحت هويدا وقالت " وانا كمان عايزه اروح النوبة خدني معاكم انشالله يخليك"

فرحت ميرا وقالت " ياريت والله، وكمان ايمن يجي معانا عشان ندى تنبسط"

ضحك حسام وقال " مدام فيها ايمن و هويدا يبقى شوفوا حد غيري يوصلكم "

دخلت سهام المطبخ وهي بتقول" يوصلكم لفين، هتروحوا فين وتسيبونا"

جت ميرا ترد عليها ولكن سبقها صوت رن موبيلها، بصت هويدا على السندوتش في ايد اخوها وقالت" بيض يا حسام، هو جار عليك الزمن ياخوي للدرجادي"

ضحك وهو بيقولها" ولكن ده مختلف عجبني طعم البطاطس فيه غيرت جدا منه"

غمزة بعينها وقالت" طبعا لازم يكون مختلف، ما هي البطاطس عليها عامل كبير مع البيض مش بس بتغير طعمه لا وبتغيره هو كمان"