Nakauwi na sila ng Pilipinas. Bago sila dumeretso sa Baguio ay nagtungo muna sila sa dati nilang tahanan at pinuntahan ang Tiya Iska niya. Sa gate pa lamang ay sinalubong na sila ng kanyang Tiya at dalawang pinsan.
"Kayo ba iyan mga pamangkin ko?!" masayang wika nito sa kanila. "Lalo kayong gumanda sa Japan. Aba'y lumutang ang natural niyong kutis doon ha!" dagdag pa nito.
"Opo Tiya. Binobola niyo naman po yata kami. Mano po," wika niya rito. Kasunod niya sina Ysay at Iya na nagmano at bumati rin sa kanyang Tiya.
"Pwede ko bang gawin iyon? `Di parang binola ko na rin ang sarili ko. Kanino ba kayo nagmula kung hindi sa lahi namin."
"Kung ganoon ay dapat sinabi niyo na gumanda tayong lahat hindi ba?"
"Oo nga noh. Pero tama na nga iyan. Pasok na muna kayo sa loob. Siguradong pagod kayo
